هنا

[سورين]

قبل كم يوم صارت مشادة كلامية بيني وبين عضوة ع الملعون صدام ..
العضوة بينتلي إنه هي مو بعثية جان مجرد ابداء رأي
ع اي حال
أني هم جنت مثلهة ما انكر
قبل سنتين اتأثرت بأعلام تافه ع صدام وحبيت طريقة حكمة !
كون إلي نعيشة هو اسوء من قبل بهواي !
جنت أكَول صدام حاكم نزيه وماكو منه
لو أدفن روحي بالكَاع ع حجايتي هاي هواي أشرفلي ..
جنت اتأثر بسرعة بفترة مراهقتي .. وأغلبنة هجي من جنة مراهقين !
بس الصحيح يبقى مهما صار شكَد ما تبتعد لازم ترجع للصح
هاي قصة قصيرة عن أختلال عقل صدام !
وما ادري الي يقرة هالمأساة مو مجرد سالوفة عادية شنو حيبقى براسة ويأيد صدام
..
مرة جبيرة بباب سجن ابو غريب بسنة ال98
كاعدة كدام جثتين لولدها مستلمتهم معدومين من السجن
وتبجي وتكول اني العدمتهم .. اني الكتلتهم .. اني الموتتهم
جا شبعت منهم .. جا وصوني .. بس اني عدمتهم وما لحكت
تسولف قصتها تكول لزمو ولدي وحكمومهم بالاعدام وبذاك الوكت جان الينحكم اعدام يبقى 45 يوم بالسجن ياله ينفذون بيه الحكم ..
وبوكتها جنت اشتغل فراشة بالاتحاد العام لنساء العراق
ف رحت توسلت برأيسة الاتحاد " منار يونس السبعاوي " علمود تساعدني ..
كالتها منار ماكدر اسويلج شي بس راح احاول ارتبلج لقاء بالسيد القائد حفظه الله ورعاه ..
وره 5 ايام راحت المره تقابل صدام
كلتله يمه ما عندي غير ذولي الاثنين
ماريد تطلعونهم
بس اريد تعدمون واحد وواحد يبقى محكوم مؤبد
ع الاقل يبقالي واحد اروح وارجع عليه
صدام شال التلفون وكال وصلوني بادارة سجن ابو غريب
من ردو عليه كاللهم اكو اثنين يمكم اسمهم فلان وفلان
محكومين بالاعدام وباقي 40 يوم على تنفيذ الحكم بيهم
اريد اليوم تنفذون بيهم الحكم
وسد التلفون
وكاللها روحي هسه استلميهم من السجن
......
شكد نشوف مصايب بس مثل مصايب صدام واختلال عقله ماكو
العراق جان وما زال نفس الشي
صدام او المالكي او اي شخصية سياسية تافهة مرت بينة ..
​ماكو فرق بينهم

ملاحظة*
اي ردود تمس الأعضاء بسوء أو تلميحات سيئة أو تجاوز على أحد يتم مسحه
رجاءاً كونوا لطيفين ^-^

[تشيللو]

كل المصايب اللي صارت بينه سببها احنه لأنه نفاق ودجل وكذب ونقتل بعضنا. . والدليل البعث في الجنوب أقوى من البعث في مناطق صدام حسين. .الأخ كان يقتل أخوه. .ويخبر عليه. . ولحد الآن شعب هش ومتشتت كله أحزاب. . ع الأقل كان حزب واحد. ..
والمخلص صدام حاكم يستحق العراق. . لكن ماعنده عدالة. . وهذه مخلفاته داعش وطائفية. .لعنة الله على روحه

[KASSAR]

مرحبا سورين
اعتيادي كل واحد بينه يحب صدام وبينه الي يكرهه والموضوع اصلا يدعو للمناقشه والمشادات الكلاميه واحتمال حظر
الي احب اكوله بوكت صدام جان كل بيته بي مصيبه وكل بيت رايحله واحد بس هسه بهذا الوكت الحلو والرائع و"WOW" عوائل جاي تموت يكفي بهل وكت ضهور داعش والسيارات المفخخه ....الخ

[KASSAR]

مختصر الكلام وضع العراق من سيء الى اسوء

[Exit]

ست سورين العزيزة من خلال قرأتي القصتج الي ما ادري منين جايبتهة...راح اوضحلج بنقاط الفرق بين زمن حكم صدام الملعون وهسة
* قبل يحكمون الناس بالاعدام بعد45يوم يسلمون جثثهم الاهلهم ويدفنوهم....هسة يعتقلون الناس عالهوية ويساومون اهلهم عليهم بدفاتر $وبعد الدفع يقتلوهم وتجي الشرطة تنقلهم للطب العدلي وهمة وحظهم الي عندة واسطة ويكدر يوصل للطب العدلي من اهلهم يستلمهم والي ما يكدر يوصلولة اهلة يبقة كم شهر يخيس بالثلاجة وبعدين يندفن بقسم الجثث المجهولة الهوية بمقبرة النجف وعمي الله يرحمة واحد من ذولي
* قبل صدام وحدة لو عدد قليل يكدر يصدر امر الاعدام هسة اصغر جندي بالسيطرة يسحب سلاحة ويكوم اي واحد بس بمجرد انو من طائفة معينة لو اسمة ما عجبة
*قبل جان الاعدام اما رمي بالرصاص للعسكريين او شنق بالنسبة للمدانيين المدنيين ...وهسة يعدمون بطرق ما سمعنة بيهة بس بزمن هولاكو من احتل بغداد هاي بعد ما يزرفون المعتقل بالدريلات ويذوبونة بالاسيد والي حظة حلو ومايموت من التعذيب يشنقونة ويعلكونة بكرين(رافعة شوكية)على الطريقة ال...الصينية

* قبل سلطة وحدة بس الي تكدر تعتقل الناس لو الامن لو الحزب هسة عدنة مليون سلطة

* قبل العشائر بالبصرة وبالمحافظات تتعارك بالمكاير والتواثي وهسة يتعاركون بالدوشكات والاحاديات ومدافع الهاون والجيش يتفرج
* قبل بزمن الملعون النجس الي يلزمونة يبوك يسجنوة وهسة عادي تشوف 4او5سيارات رباعية الدفع تسطو على مصرف او مكتب صيرفة بوضح النهار ويكتلون اصحابة ويخمطون الدخل ويفوتون من يم السيطرات الي ما شاء اللة كل 50متر سيطرة
* قبل الي يبوك ويسلب وينهب ويقتل معلوم الهوية ومطارد من كل اجهزة الدولة وهسة الحرامية والمجرمين كلهم مجهولين الهوية وتشكل لجان تحقيقية وتظل تحقق 50سنة الى ان يموتون اصحاب الحق
هاي غيض من فيض ست سورين العزيزة اني اشوف لوظالة مراهقة مثل قبل سنتين هواااي احسن
وتحياتي الج والكل القراء ورجاءاا لحد يزعل ويخلي حقدة على شخص مات من 10سنوات ينسية انسانيتة ويصور الباطل على انة حق بمجرد انو الحاكم من طائفتة لو من حزبة وشكراا

[نائل الكناني]

زين شنو رأيج احنه عدنه كَرايبنه رجل متدين ونزيه واتهموه انه منتمي لحزب الدعوة العميل انذاك تدرين اشسووله عدموه وجابو احدى اطلاقات اعدامه الى والده وكلوله هاي طلقة اعدام ابنك واعتبره اصبع زايد من ايدك وكَطعناه ويا ويلك ياسواد ليلك اذا فكرت ان تسويله فاتحه !!!!!
والله الشاهد على كلامي
فشنو نذكرلة وشنو ننسه منه لو ما ادري سامعين بالمثرامه التثرم الشباب المتدين اذا شكوا بيهم انهم منتمين لأي جماعة او حزب معارض !!! عمي اسوالفه ما تنحجي
بس بنفس الوقت اللي ديسووه بينه ذول الحرامية اللي لازكَين بالكرسي وكل انتخابات يوزعون هالبطانيات جعل البسطاء مننا يترحمون على عهد الطاغية جرذ العوجه عليه وعلى كل ظالم الهذا الوطن لعائن الله
سلام .

[qas!m]

[راهب]

مرحبا :
مع قناعتي بعدم الجدوى من الخوض بهكذا مواضيع ... لكنني اجد نفسي مجبراً لوضع ردٍّ هنا ...
طوال 35 سنة من حكم البعث اصبح الامر وكأنه ثقافة مجتمع ... هذه الفترة الطويلة ليست منفصلة عما سبقها من الفترات المظلمة التي مرّت على هذا الشعب ... صدام ليس شخصاً انما هي ثقافة الى اليوم قائمة فينا ... كلنا نمارسه في احاديثنا الخاصة او طرق تعاملنا مع بعضنا ... ان كان نريد ان نحاربه انما يجب ان نحاربه ثقافة ... فكراً ... فتمجيده لا يختلف عن تمجيد اي ظالم موجود على الساحة الان ...
امرٌ ما يحيرني كثيراً ... هو قياس الفترة الآنية على فترة سابقة ... وكأننا لا نملك انموذجا نقيس عليه ما عداه ... وهذا هو الاختلال بعينه ...
كلمة اخيرة :
من لم يعش ظلم الايام الحالكة ... تخونه الكلمات كثيراً ... والمواقف ايضاً ...

[Suzana]

تسجيل اشتراك

[علي الشمري]

علاوي على كيفك مو الحزب كلة يمعود .. خطية ترة

البعث وداعش وجهان لعملة واحدة ... لا زيتو كله شلع قلع