أيامك عشكَـ منسي
ونوافذ ماعبرها من الشمس مرسال
أيامك سجن ثوار
ومفاتيح الكرامة معلكَات اهناك
اهناك بركَبة التمثال
وأنت المايشبهك ليل
لا مصباح .. لا دمعة .. وحدك محد يشبهك
ضباب وبي صور للخيل من ابعيد
وحدك من بعيد تموت من بعيد جن شمعه
وحدك ناس وولاية
وقطارات
وخسارات
وحزن وحدك
وحدك تضحك وتبجي
وحدك عود واغنية
وروحك صوتها ابعينك
بروحك ضايعة ابنية
وحدك تذبل وتنباع للحطاب
وبحجاية خبز تباكَـ
يالوحدك صدكَـ بالناس ماتكتب لما تشتاكَـ
الك وكَفه ويه كل تعبان
والك كَمره وي كل سهران
وضيمك تستحي تكَوله
النهر كلما يطول .. يطول درب الماي
يالحزنك نهر ماينحزر طوله
الوادم مكَبره ومريت هلهوله
وسنينك ضفيره بجف المتاناة منسوله
وفيت اهلك ... وفيت اهلك ظهر وحزام
وماتانيتهم يووفون
وماتانيتهم يووفون
شحط بجيبه من الكَاع
تره الناعور بي سوله
ياكَلبك يلم الكَاع كل الكَاع
يلهم نهرانها ونسوانها وكل شعب كل تنور
يالكَلبك شرار وماي
الك جم روح وسط الكآس
الك جم رايح وجم جاي
صوتك لاتضمه تموت
بصوتك يفز جم تابوت
بصوتك يفز جم طاغوت
بصوتك جم نبي ... وجم حوت
وضميرك مالكَاله افياي
وغيضك ماتشوفه العين
مثل غيض الشمس والماي
مثل غيض الشمس والماي
رد مع اقتباس