هنا

[أنثى حائرة]

مرحبا جميعاً

عندي مشكله وحبيت اطرحها بهذا القسم لعل اوصل لحل من خلالكم ''
اني احب شخص من 4سنوات هو كذلك ،، يعني حب متبادل ،، من اكول حب يعني حقيقي مو مراهقه وتاگدت منه بأكثر من طريقه ،، هذا الشاب حاول يخطبني اكثر من مره بس مدا تكمل ويانه ،، اول سبب لان هو من غير محافضه واني وحيدة لاهلي وميقبلون ينطوني لمحافضه ،، وشي امي شروطها تعجيزيه يعني تطلب مهر مبالغ بي شويه وتريد بيت لوحدي ،، وهو حالته الماديه عله كده ،، وهويه حاولت اغير طلبات امي وامنعه بس متقبل ،، المهم هسه اني اجوني ناس خطبوني واهلي موافقين لان اجو عالمرامهم ،، وطبعاً اني رفضت بس اهلي كاولو اذا متقبلين بعد اي احد يجي منقبل بي (نطرده) ،، من كلت للشخص الي احبه انجن وكالي نعقد محكمه وشيخ بدون علم اهلج وبعدين نكللهم ،، اني وافقت لان احبه حيل وما اتخيل نفسي اعيش ويه غيرة ،، بس بصراحه خايفه لان اهلي ناسه ملتزمين حيل خايفه يسون شي او حته يمكن يكتلوني اذا عرفو وحايره هسه ماكدر اتزوج احد ثاني وبنفس الوقت خايفه اسوي الشي الي طلبه مني ،،

[لانا احمد]

مراحب عزيزتي

زواج بدون علم الاهل تصرف خطأ وديري بالج تسويه مهما كان حبك له والمفروض هو يخاف عليج وعلى سمعتك وسمعة أهلك وحتى على سمعة أهله ومثل ما تفضلتي عواقبه راح تكون سيئة عليكما .

بخصوص الوالدة أو باقي الأهل حاولي تشوفين شخص يكدر يؤثر عليهم وعندك ثقة بيه والأفضل يكون من العائلة اذا توفر طبعا .


والأهم من هذا كله خلي تكون عندك ثقة برب العالمين وكل شيء لصالحك ولصالح الشخص اللي تحبيه راح يصير ... الصبر ثم التوكل على الله .

يارب تنجمعون بالخير والحب والسعادة
^_^

[عضوية92213]

حبي حاولي اتقنعين امج او خلي الشاب يجهز نفسه لطلبات امج ويرجع يخطبج هيج راح ترضين نفسك وامج واذا عقتوا بلا علم اهلج راح اتصير حياتك صعبه ومراح ترتاحون لا سمح الله وانتي انصحك لا تزوجين غيره لأن راح تعذبنين نفسك وتعذبينه وحتى حياتج راح اتصير صعبه فأنتي حاجي الولد كوليله خلي يجهز نفسه لطالبات امج ويرجع يخطبج ولا مااكو حل وحل الولد خطأ هيج راح اتعرضين حياتج وحياة الولد لخطر واحتمال لا سمح الله متكملون والله يوفقكم

[Ali Ibrahim]

مرحبا اختي الكريمه
الصراحه لازم العبد يلجئ الى الله تعالى في كل شي
ماكو شي ما اله حل ، شوفي اختي اني عن نفسي صارت ويايه شغله خاصه يعني مستعصيه بس فكرت بيها لا اهل يكدرون يخلصوها اليه ولا اصدقاء ولا حتى غريب او اي احد فقط الله تعالى
فكري بيها بالعقل مو بالعاطفه خلي الله بين عيونج ، تصرف الولد خاطئ رغم هو ما عنده حل بس الحل موجود يم الله سبحانه وتعالى
اذا ما قبلت الوالده ضلي ع قرارج لحد ما تفرج ، شوفي اختي تبقه الام حنينه ع اطفالها وابنائها رغم الظروف والمشاكل ، مهما يكون يجي يوم وتحن عليج وتكول خطيه لا اسد بقسمتها وارتكب ذنب باجر اتحاسب عليه
نصيحتي اتركي شغله الزواج السر وضلي متمسكه بعهدج انتي والولد والى الله المستعان

تحيتي

[محامي الحب]

التصرف بالعاطفة دون استشار أهل الخبرة والاختصاص.. مصيرك تاخذين رقم بدعاوي الأحوال الشخصية مستقبلنا ..الله ليسويها..تحياتي

[Ćat]

ما انصحج تعقدين دون علم الأهل، اذا عرفوا العواقب وخيمه خصوصاً أنهم ملتزمين، والقتل عدهم مُباح
وبنفس الوقت الزواج من شخص مترديه هو الموت بحد ذاته ، ح تعيشين مثل الميت .. مدام أنج تحبين شخص ثاني

انتِ بين نارين، بالنسبة إلي لو مكانج ارفض الزواج دون علم الاهل طبعاً ( ممستعده اخسر والدي علمود احد)
وارفض كل شخص يتقدم لي ، بالنهاية الام رح تستسلم للامر الواقع وتنطيج للي تريديه ، ماكو اماية تقبل بأن بنتها تبقى گاعده عدها بس لمجرد مسألة "عناد"
هذا يعتمد ع اصرارج وقوة أرادتج وقدرتج بالتمسك بالشخص الي تحبيه، ومدى تضحيته علمودج ، همين خل يحاول هو يجيب ناس معروفين مثل ساده ك واسطة ( بما انو عائلتج ملتزمه فاكيد للسادة مكانه عدهم) خصوصاً إذا جان سيد معروف ، وهمين شيخ عشيرة او اي شخصية الها مكانه ويحترموها اهلج ... وخلي يحاول يحسن من حالته المادية، ، حقها امج متنطيج اله، خو مو تعيشين ع الخبزة والزيتون( هاي بافلام الابيض والاسود بس)...

موفقة

[CaSpEr]

مراحب عزيزتي

زواج بدون علم الاهل تصرف خطأ وديري بالج تسويه مهما كان حبك له والمفروض هو يخاف عليج وعلى سمعتك وسمعة أهلك وحتى على سمعة أهله ومثل ما تفضلتي عواقبه راح تكون سيئة عليكما .

بخصوص الوالدة أو باقي الأهل حاولي تشوفين شخص يكدر يؤثر عليهم وعندك ثقة بيه والأفضل يكون من العائلة اذا توفر طبعا .


والأهم من هذا كله خلي تكون عندك ثقة برب العالمين وكل شيء لصالحك ولصالح الشخص اللي تحبيه راح يصير ... الصبر ثم التوكل على الله .

يارب تنجمعون بالخير والحب والسعادة
^_^

مثل نصيحة الست لانا احمد
لان الاهل قد يقومون بقتلك وقتل الزوج وهذا سوف يشعل حرب بين العشائر ويذهب من خلالها المزيد من الضحايا

[نائل الكناني]

روحي الوالدتج واختلي وياهه وتباصري وياهه يعني احجيلها الحجي اللي بقلبج وابچيلها وتوسلي بيها وهدديها بإنك راح تموتين او بعد مثلا متاكلين (بس حچي خوفيها يعني) وكليلها انك تزوجتيه وانك حامل منه (كذبه بيضه) واللهم يوفقج اختنا لكل صلاح ولاتحطين نفسج مرة الثانية بهيج ضائقة وقبل كل شي اطلبي من الله في صلاتج ان يدبرلج امورج لانه ولي التوفيق.

[Hani Yaqoub]

صديقي خطب اكثر من 6 مرات ويرفضونه وحتى طردو هو واهله ومره خلوهم بالباب ما يدخلون
بس اصراره واصرار البنت رفضت الي اجو كلهم
وافقو اهله بالاخير والحمدلله ينتظر طفل
رفضي الي يجون وان شاء الله تصير القسمه

[99999]

مافي زواج بدون علم اهلش لانه بيسوونه لش مشاكل مالها اول ولا تالي وكذيه تكوني انتي الخسرانه حبيبتي خذت ضيمش اقنعي اهلش بالطيب وراح يقتعون يارب