درر العراق

فقار الكرخي · 8/February/2017

من مثلي يون بالكون ونتام
بَس أنه وچثير الويد ،، ونتام
علي نومي ايتنغص دوم ،، ونتام
سرت بـ عيونكم نومه هنيه
سيد محسن ابو دنوشه

وهي حيره
الشعر تابوت وأحلامه چبيره
ورادو أمدح بارح ابـ عز الظهيره
سامي الزيدي

سهمك صابني وللحين ،، بعداه
ابـ دليلي وگمت اجران اه ،، بعداه
غيرك مايسوي هيچ ،، بعداه
ولايعمل عملتك هاي بيّه
ابراهيم ال طلب

أنه صول الصندل العاصي العتيج
وتنهصي سنون الجمر بـ خلوگي
عشت هدهد ما شفت طعم الأمان
ولو هدل عرفي يتصادر طوگي
أنه طينة آدم بـ أرض الجنوب
قال كن ربي فـ كنت شروگي
سيد يوسف الگوبع

أظل أشمر حچي ياصاح ،، وگطوف
عليك وماتحن وتزور ،، وگطوف
عفتني كل التتن بـ جفاك ،، وگطوف
بـ حلگ شايب عرب مكتول أخيه
فرقد الحسيني

تهيم الروح عيب أدري ،، شملهه
تون ولا فرح ساعه ،، شملهه
متى يَتلم بعد فرگه ،، شملهه
وتعود أيامنه الحلوه الزهيه
ابو معيشي

كلهم يردون باچر ياحمام
كلهم عيون اليتامه لا تنام
باچر ترد الحراير
وتوصل بـ علو المناير
فاضل المياحي

أرد أجيكم
عازت أيامي فَرح وتريدكم
وها كثر گلبي يلح ويريدكم
وأعتب عليه وأگله الليّل عده
وما أظن تلگاهم بـ ذيچ الموده
يگلي روح
لو رحت ياگلبي هَم تنفع الروحه
يگلي روح
الطير من يبعد يزيد الهجر نوحه
أرد اجيگم
زهير الدجيلي

لاتّيهني
الليالي الـ عشت بيهن موحشات
بـ روحي صفنة بوم والدنيه خرابه
والرمل غطه الدروب
ولو شفت وجهك أغرد
شلون مثلي بـ شوگ مثلك مايذوب
شلون أتوب
حتى لو طولك سراب
بـ مشتهاتي أشرب سرابك
انتَ حيّ على الحياة
اوذان روحي يصيح بيّك
مشتهيك
لطيف العامري

ما گلتلي من البدايه
الحُب ظلاله
الشوگ لعنه
حَتى لا أكفر وأحبك
ميثاق الهلالي

مَشكلتي
الفرح ماعرف بابه منيّن
وبـ لون الحِزن من صغري متمشكل
ناورني الدمع
من أول مدب عـ الگاع
وناغمني الحَزن وي رنة الجنجل
عريان السيد خلف

ومن أجيت
زخت الدنيا فراشات وحدايق
والعسل أصبح سبيل
نوفل الصافي

يـ غافي
آعله الثلج والنوح
اجيتك هذا أنه ابن ادم
يَرف گلبي عَله ابن ادم
ذياب گزار

عباس أذا بعدك عدل
ظلمه السمه شبيها
إلا انتَ مابيها
چنت انتَ ضاويها
ايهاب المالكي

گالت وصار من گالت سنين
وجهك المملي حنين أحلى لوحه
وأنتظرتچ ترسمين وذاك يوم وهذا يوم
لآني أبيض لآني أخضر لآني أحمر
وسألته اشلون تعذرتلي
ما لگيت بـ لون وجهك عندي لون
كاظم الركابي

عـَرفتك
وردة القداح بـَرد الصبح جَفلها
ومن حبك هويت الگاع والماي الـ يَغازلها
شَفت بـ عيونك بلادي
سَهل وجبال والوادي
شفت دجلة وفي مثلك
يَفيض بخير ألي ولـ اجلك
زامل سعيد فتاح

الدنيا اتدور
آخ الدنيا من اتدور
تطلع كل جهنم من حِلگ تنور
شاكر الخباز

يـَ نوره
الشوگ لح بـ الروح
لا عرفه ولا وصفه
تمنيت الدليل
گلوب نوم ابـ حايط الغرفه
يظل سهران طول الليّل
لا يغفه ولا يطفه
كامل سواري

أنشفن يادموع الهم ،، وطيري
عَله الـ ما خلص وياهن ،، وطيري
گطه طيور الخلگ تلزم ،، وطيري
حيايه ايجيب ويصلگط عليه
نعيم الخباز

هلي لليوم منكم ما تبريت
هذاك أنه الوفي وذاك أنه ابنكم
هلي روحي عزيزه وعيب ذليت
تستهضم تلوذ بـ غير فيكم
هلي وباچر لوّن للديره رديت
أذوبن شَمعه فوگ حروف أسمكم
جبار الشدود

أمي
سجادة صلاتي بـ ليل الولايه الغريبه
أمي
اجمل لوحه بـ عيون الحبيبه
غانم الفياض

ماتجينه
والعُمر خلصن سنينه
ماعتبنه وياك يوم ولا جرحناك بـ حچينه
ياوكت مر ماتجينه
من غيابك غابت الدنيا بـ أهلها
وروحي صاعت وانتَ أملها
عادل العضاض

الدنيا ضلمه
ومشتهيك بـ ليله وحشه
مشتهيك حجايه ترفه
مشتهيك بـ عينك أغفه
رموشك تغطيني وأدفه
محسن الدخيلي

ساعة العشاق ما ألها ثواني
تَنحسب من الصفر بـ أول عناق
فايق عبد سعدون

علمانه حسين عدلاً ما ننام
نموت وگفه
وما ندنگ روسنه
ابو عارف الصالحي

يَنباس الحلو
بـ وجنات الخدود
وانتَ من الحلاه بـ العچس تنباس
احمد ماضي

شفنه عيون
عيون هوايه
وأفترينه بـ كل ولايه
بَس مثل عيونچ ما شفنه
گلوبين ويضون بـ مرايه
صادق الصافي

جمبذ خد ابو سمحات ،، منفاك
الورد وارد يـَ ساهي العين ،، منفاك
لو بين عليه جفاك ،، منفاك
غصب روحي عليك تحوش بيّه
حسين العبادي

أطوف بـ دورة عيونك
وأتيهن بلـ شفايف عام
ورتلنك تراتيل ابـ صلاة الزاهد المحتام
عبد الامير العضاض

ألمن تَرد
ضل غاد عايش مبتعد
ألمن تَرد
للجوع للحر للبرد
ديرتنه مو ديرة گبل
ضلت حديقه بلا ورد
وادمنه مو وادم گبل
چوه بـ ضمايرها الحقد
والناس ماخذها الوهم
بيهم يرتل القارعه وبيهم يرتل الحمد
ألمت تَرد
صالح السعيدي

گل الشوف ونشد ،، ياهونته
عزيز وعليّ تصعب ،، ياهونته
الحياه والموت گالن ،، ياهونته
هويت الموت بيه الستر ليه
ابراهيم عفريت