قصيدة. نوارس ماي ،، كاظم الركابي
نوارس ماي
بعد تنشاف بيه ارسوم
من اشتاگ
وبعدني ألبس وجه ملگاك
واعطش ماي ما ضايگ
حلاة الراگ
وبعد بيه ملامح من بشر ينخاك
متحزم عتب گيعان
وايدور خضار انباگ
من شح الصدگ بالناس
دورتك عشگ سبعين
بي نية نوارس ماي
زفوها اعله بخت الطين
وسولفتك حمل متعوب
ما شايف متن مرتاح
يل اموالف وجه مگفاي
اضم الشوفتك ذله
واكشخلك جرح مندوم
زفو للغرب خله
تعال وخاطري امتانيك
ما حس ابطعم وي ناس يم العين
بس انت البعيد بكلشي احسن بيك
شلت عمرين حتى الگاك
وتناوشت الضحك بشفاف
يبسن من ثگل طرواك
يبو اعتاب الثگيل ابخاطر النسمات
يجنازة نده امن تفوت
فوگ اخدود ذبلانات
اخاف امن العمر يزهگ
واخاف الليل يلبس ناس
واثياب الصبح تعتگ
يوينك ماتوالمني
ذراني العتب واللوم
وازياگ الهوه اتلمني
وين الگاك
دنيه وكل حجيها افراگ
وادم ماتعرف اتموت من تشتاگ
وينه اليشبه ارسومك
واصوغ ابشفته احچايه
حيره وكل وكتنه عيون
ينطي الوين وجهه العاشگ امرايه
اليخطف عالجفن وينام ينزع روح
فشله اعله الهوة ممن ايفوت مايغفه ابحضن رايه
ومو ذنب السمه امن اتطيح
النهر نيشان .. لكن باگها ابمايه ..
الشاعر كاظم الركابي
رد مع اقتباس
المشاركة الأصلية كتبت بواسطة أمجد الاسدي
