اجمل ماكتب جبار الفلاحي
شخابيط بعد منتصف الليل ... جبار الفلاحي
مكالمة هاتفيه بين ترامب وجبار الفلاحي...
عندي أصدقاء كثيرين في أمريكا واوربا...وارقامهم كلها مخزونة باسمائهم...عالفايبر والواتس آب. ...
جاءتني مكالمة عالرقم العادي من رقم أمريكي غريب غير مخزون عندي...ومن عادتي أجاوب كل التلفونات المعروفة والغريبة....جاوبت التلفون گلت اهلا وسهلا تفضلو منو حضرتك...گالي انا ترامب من البيت الابيض.
گتله اهلا وسهلا بس بشرفك منو إنطاك تلفوني....گالي لاتحرجني ما أگدر احچيلك بالتلفون......گتله اوكي شكو ماكو.....گالي ترامب والله ياجبار مليوصة عليّ..انتو بالعراق شلونكم......گتله والله ياترامب وانت ماحلفتني يمين.....احچيلك ابصراحه امورنا بالعراق كلش زينة......صار عدنا كتلة تاريخية يقودها محمود المشهداني....وصار عدنا المشروع. العربي مال خميس الخنجر. ..وبعد ماسمعوا انك فزت بالانتخابات...صار عدنا المشروع الوطني مال جمال الضاري والتسوية الوطنية مال سيد عمار. ..وازيدك من الشعر بيت ياترامب قبل يومين سليم الجبوري راح يسوي المجلس الاعلى للحوار الوطني.....وگتله راح نخلص من داعش بدون قوات امريكية برية وما نحتاجكم بس انتو ديروا بالكم على نفسكم بامريكا...
ترامب گالي عجل اموركم زينه احنا مليوصة عدنه. ..احنا عدنه مشاكل ويه المسلمين والارهاب والسود وجدار المكسيك والكرين كارد اوووووووف ياجبار كلها مشاكل......
المهم. ..گتله ترامب طولت. المكالمة...هسه انت شتريد مني....گالي اريد اسمع منك ياجبار شتنصحني...
گتله النصيحة مو عيب كلنا نسمع نصايح من الناس ......
اولا كثرو الاحزاب عدكم بامريكا...شنو انتو 300 مليون وعدكم حزبين بس...احنا 30 مليون عدنا 60 حزب.
ثانيا انتو 300 مليون نسمه وعدكم جيش واحد..وهذا خطأ..احنا 30 مليون. وعدنا جيش عراقي وحشد شعبي وحشك عشائري وشرطة محلية وشرطة اتحادية. ...وبيشمركة. ...وگتله ياترامب انتو حتى الجيش مالكم زي موحد...مو عيب عليكم ؟...احنا بالعراق عندنا على الاقل 7 الوان للقوات الامنية جوزي وبيجي وازرق واخضر طوخ ووووو...احنا جيوشنا عرض ازياء انتو شنو متمسكين بالخاكي...؟
بعدين ياترامب. ..شنو جوشكم منتشره بكل العالم...احنا خلينا جيوشنا كلها بالسيطرات...
ثالثا. ..گتله ترامب احنا كلنا بالعراق بس شيعة وسنه واكراد ومتوحدين وناس تحب ناس وإنتو كلكم بامريكا. عبارة عن 180 جنسية مختلطة وكلكم مهاجرين. ليش انتو ناس تذبح ناس ؟
گالي ترامب جبار كافي.. دوختني.. ..بس أهنيكم على هذا العيش الكريم بالعراق...لا تفجيرات ولا مفخخات ولا أحزمة ناسفة ولا عندكم مشاكل تقسيم ولا فيدراليات. ........ترامب گالي طلعت لنا شغله جديدة كاليفورنيا تطالب بالانفصال. .........گتله حبيبي ترامب گول لاهل كاليفورنيا قضية الانفصال هسه مو وكتها....وتدري احنا كلنا. بالعراق موحدين وعدنا تجربه كبيره في موضوع ( مو وكتها )...
گتله شوف ترامب...انتو عدكم مشكله اساسيه اذا ماتحلوها ماراح يصير براسكم خير ...ترامب كالي شنو دخيلك
گتله انتو الامريكان حاصرين نفسكم بهاي القاره اللي اسمها امريكا...مانعين السفر وماتخلون احد يطلع من امريكا ليش هيجي....؟ گتله احنا بالعراق سمحنا بالسفر لكل العراقيين....عندنا مليون في الاردن و3 ملايين في اوربا وكندا. ..وعدنا عراقيين بدبي...وعدنا مليون بأربيل ودهوك وسليمانية...وعدنا منتجع سياحي اسمه جسر بزيبز الناس تتكاتل عليه صيف وشتا...وكله على حساب الحكومة....وعدنا ضباط الجيش السابق والمخابرات والامن الخاص ذوله كلهم الحكومه ارسلتهم للخارج على حسابها حتى يتونسون ويرتاحون. ...
اما شيوخنا ياترامب بالانبار والموصل وصلاح الدين إجت القاعده وبعدين داعش دزوهم ووزعوهم بين عمان واربيل على حسابهم وگالولهم روحوا تونسوا شعدكم گاعدين هنا بالصحراء؟...اما انتو شنو حاصرين مجلس الشيوخ الامريكي بواشنطن...هاي شبيكم ؟
آخر شي گال لي ترامب جبار خلص رصيدي والوطنيه راح تطفى بالبيت الابيض نتخابر بعدين...
گتله لا اخابرك ولا تخابرني وطيح الله حظ اللي انطاك رقمي..
واستغفر الله لي ولكم
رد مع اقتباس
المشاركة الأصلية كتبت بواسطة بِنْتُ الإِبَــا
