ستانلي ملغرام هو عالم نفس امريكي و كان مهتم جدا بدراسة سلوك الجماعات و مدى انصياعها للسلطة و عمل تجربة كلش مفيدة بالستينات من كان استاذ بجامعة ييل .
المهم .. كلنا نعرف انه مبدا عدم ايذاء الاخرين هو شي اساسي بحياتنا او انسانيتنا و كذلك مبدأ عدم الخروج عن القانون من اساسيات تنظيم الحياة ايضا .. هو راد يعرف شراح يصير لو كان اكو تناقض بين الاثنين .. يعني لو كان شخص ذو سلطة قانونية و شرعية (مو بالضرورة الكل متفق عليها ، حسب فهم الشخص المطيع او الظروف) و طلب منك ان تأذي احد الاشخاص ، فهل ممكن الانسان يبقى مُطيع و ميخرج عن القانون مهما كان الطلب لو عادي مينفذ اذا خالف الطلب مبادئه و افكاره ؟ ..
طبعا ممكن يدخل في المسألة الجبر على فعل الشيء او ممكن الاغراء بمنصب او مال .. الخ
تجربة ملغرام انه طلب من اشخاص المشاركة في تجربته و الي هي يختار 3 أشخاص لنفرض A,B,C و كل واحد يطيه دور ..
مثلا A هو الشخص الي راح يدير التجربة و يعطي الاوامر
وB هو الشخص الي راح ينفذ الاوامر و C الشخص الي رح يتم تنفيذ الاوامر عليه ..
طبعا A , C ممثلين تم استخدامهم لتأدية التجربة فقط و يعرفون كل شي و هنا فقط B ميعرف شنو القصة و الي هو المفروض يعرفون شنو سلوكه ..
اول شي يجي الدكتور او صاحب التجربة A و يعرف الشخص B على C ويراويهم غرفهم المعزولة بس مجاورة .. طبعا الدكتور رح يخلي الشخصين بغرف مجاورة محد يشوف الثاني بس يتواصلون من خلال هاتف بس صوت يعني ..
الدكتور A يشرح للشخص B انه احنة نريدك تسأل الشخص C عدة اسئلة من خلال الهاتف فقط ، يعني متكدر تشوفه و اذا مكدر يجاوب، امامك كيبورد و كل زر يمثل فولتية معينة و تكدر تصعقه بالكهرباء بضغطة زر .. يعني كلما ما يعرف يجاوب تكدر تزيد الفولتية عليه و تصعقه و من تخلص التجربة نطيك فلوس علمود مشاركتك .. و شرحله انه هدف المسابقة هو حتى يعرفون مدى تأثير العقاب على التعليم يعني اذا نعاقب الشخص يتعلم لو لا .. طبعا هو كذب مو هذا هدف التجربة و انما فقط يريد يشوف الشخص B ينفذ الاوامر مهما كانت و يصعق شخص اخر .. طبعا الشخص الاخر من خلال الهاتف يجاوب ع اسئلة B و بالحفيقة هو كذب ما موصول باي جهاز صعق يعني الشخص B كلما يضغط ع فولتية فذاك بس يصيح كذب حتى يحسسه انه انصعق صدك ..
بالفيديو جوة تكملة التجربة و الي هي :
انه الشخص B يسأل و الثاني يجاوب فأذا عرف اول جواب كله تمام عفية .. يسأل ثاني سؤال فالشخص المقابل اذا ما عرفه ، فراح B يضغط ع الزر و يصعقه و يسمع صراخ الشخص لان الغرفة بصفه وفقا لقوانين التجربة المفروض يطيعها و بعدين وي كل سؤال ميعرفه يزيد الفولتية و ذاك يصيح اكثر ..
مرات الشخص B قلبه يحن و ضميره يأنبه فكبل يكول اريد انسحب ما اكدر استمر بصعق الشخص المقابل لان جاي يتألم و مسكين .. الخ فالدكتور A يكله مو بكيفك انت وافقت من البداية ع التجربة و ما عندك اي خيار اخر لازم تستمر فهذا B يرجع يكمل بالصعق بس بداخله متألم و ضايج لان ميكدر يعصي الاوامر بس اذا بقى مصر ميريد يكمل يوقفون التجربة و اذا رجع فلازم يكمل لاخر زر و الي هو 400 او 450 فولت و الي يعني تقتل الانسان مباشرة و اكو بيهم استمروا تحت الضغط و اكو بيهم لمجرد تنفيذ الاوامر ..
المضحك اكو مشترك بدا يزيد بالفولتية و المقابل يصرخ الا ان المقابل كام ميطلع اي صوت منه عود سوة روحه ميت فهذا المشترك بقى يسأل و يكمل و يصعق بيه و هو ميت هههه يعني كان مطيع جدا ..
طبعا بزمنه تم مناقشة تجربته من الناحية الاخلاقية لانه عرض المشاركين لضغط نفسي كبير .
النتيجة الي طلع بيها ستانلي انه :
طبعا كان من المتوقع بس 1 بالمية يكملون بالصعق لاخر فولتية يعني يكملون الى ان يقتلون الشخص بالغرفة المجاورة لكن بالحقيقة طلعوا 65 بالمية مطيعين و ما اعترضوا و كملوا للاخير .. نتيجة صادمة جدا
يقول ملغرام: النتائج كما تابعتها في المختبر، مقلقة، إنها ترجح أن الطبيعة البشرية غير جديرة بالاعتماد عليها لتبعد الإنسان عن القسوة، والمعاملة اللاإنسانية، عندما تتلقى الأوامر من قبل سلطة فاسدة. نسبة كبيرة من الناس مستعدون لتنفيذ ما يؤمرون دون أخذ طبيعة الأمر بعين الاعتبار، وبدون حدود يفرضها الضمير، مادامت|الأوامر صادرة عن سلطة شرعية.
إذا تمكن في هذا الاختبار، مشرف مجهول، من أن يوجه الأوامر لمجموعة من البالغين لقهر رجل في الخمسين من عمره، وإخضاعه لصعقات كهربائية مؤلمة رغم احتجاجاته ومرضه لا يسعنا إلا أن نتساءل عما تستطيع الحكومات بما لها من سلطات أوسع بكثير أن تأمر به .
فهو بقى يتسائل : هل يعقل أن دور الجنود الذين نفذوا قتل اليهود و المجازر لم يتعد تنفيذ الأوامر ؟ هل يمكن أن يكونوا شركاء في الجريمة ؟
يعني هو مجاي يبرر و انما يسأل ليش ما يستمرون بمعارضة هالفعل اذا كان مخالف لضميرهم و مبادئهم ، ام ان الضغط و عقوبة عدم تنفيذك الاوامر ستجبرك ان تفعل اي شي ..
هو يريد يوضح انه الانسان كائن لا يعتمد عليه و لا على انسانيته ابدا .. و انه اي شخص بريء ممكن يتحول الى قاتل بمجرد حمايته من مسؤولية افعاله ، يعني محد رح يحاسبه ع جرائمه لان ديطبق الاوامر من سلطة اعلى منه ..
-------------------------
طبعا استخدمت فكرة الكيبورد و الفولتية للتوضيح و كذلك طريقة السؤال و الجواب عن طريق جهاز ابو اربع اختيارات (1،2،3،4)
-----------------------
المصادر :
..............
http://www.simplypsychology.org/milgram.html
https://nature.berkeley.edu/ucce50/a.../article35.htm
http://journals.plos.org/plosone/art...l.pone.0000039
https://www.scientificamerican.com/a...s-really-mean/
رد مع اقتباس
جديات شي مخيف كلش