وحدة جوزها بحكيلها انتي شو بتعملي طول نهار ؟!!!! شوفو شو جاوبته:
جواب من زوجة متدلعه جداً ...
صحي الزوج من النوم دوّر عالمدام ما لقاها دخل يشرب لقا هالورقه معلّقة عالتلاجة ومكتوب فيها :
زوجي العزيز ...
يا مستتني يا مدلعني
بصراحة يا روحي انت مدلعني علآخر وموريني الهنا ألوان ، وانا خفت اخلاقي تخرب قلت اروح عند أمي كم يوم عشان أحس بالنعمة اللي انت معيشني فيها .. ولحد ما آجي يا روحي عليك كم شغلة بسيطة كثير حتى انت دايماً تقلي شغل الدار هاد ولا اشي ... شوف حبيبي :
المنبه رح يرن عال ٥٥ونص تقوم ركاض تحط البيض ينسلق عالغاز عشان فطور الأولاد وتروق غرفة القعدة مكان سهرة مبارح وتلّم الكاسات والفناجين وقشر البزر اللي حضرتك مبعزقهم من مبارح وتحطهم بالمجلى وتاخدلك لفة سريعة عالغرف لمّ سلات الزبالة وجمعهم بالكيس الكبير اللي بالمطبخ عشان تاخذهم وانت نازل .. يلا حبيبي روح صحي الأولاد غسل ولبِّس وفطِّر ولا تنسى تعملهم السندويشات وانزل معاهم أوعى تتركهم غير لما الباص ييجي .. اطلع بسرعة طلِّع كيس اللحمة من ألفريزر حطه عالرخام وحط الغسيل بالغسالة ساعه ، بهالساعه ادخل الغرف رتب التخوت وسفط البجامات وافتح الشبابيك مشان تهوي البيت وكنس الصالون وليف الحمام وما تنسى ترش ديتول عشان بقرف هههه متزكر ؟؟!
يلا عالمطبخ شطب جلي الفطور وانت بتشرب القهوة وما تغنيش عشان صوتك بشع .. وأكويلك قميص منيح من غير ما تحرقه عشان مكواتك بتقرف ،، ودور عالجرابات ... وين الجرابات؟؟؟؟؟ فش اشي مكانه أبدا ؟؟!! مع انه قدامك بس لازم نسمع تغريدك الصبح ... يييييي الساعة صارت ٨ ونص ركاض سكر الشبابيك عن الدبان وخذ الزبالة بأيد وركاض عشغلك بتخلص الساعة ٣ عشان لازم تروح بدري مشان الولاد ،، وانت طالع هتلك شوية خضرة طازة بأيدك ملوخية كوسا بلاش باميا انا ما بحبها ، مع انك بتمسح الطنجرة بس ما علينا .. يلا ادخل غسل اللحمة وحطها عالنار روح انشر الغسيل اللي حطيته الصبح .... هي الولاد اجو بسرعه دخلهم يغيرو ويغسلو وانت حط الخضار عالنار واقعد اسمع شكواهم ورغيهم ، ماما القلم ضاع ،ماما المس سرخت علي ،ماما بدّي معكرونة، ماما أخوي ضربني .....
يلا حبيبي بتتسلى لحد الأكل ما يستوي ... اه استوى يلا غدّي الولاد وأجلي جلي الغدا عشان تلحق تعمل معاهم الواجبات وتدرسهم ..... خلّصو دراسة ؟؟ كم الساعة ؟؟؟!! مالك هيك مبهدل ؟؟؟ ما تدخل تحلق وتحطلك شوية عطر ؟؟ اللي بشوفك هيك بقول تعبان طول النهار !! اه معلش قبل لا تحلق الولد بده هوت شوكلت والبنت بدها بطاطا مقليه واعمل لحالك نسكافيه .. خلصت يا عمري ؟؟. الولاد جاي عبالهم اشي حلو اعملك قالب كيك او رز بحليب ،، تصرف يا أخي !!
تعبت يا عمري ؟؟؟
بتنام وانت واقف يا قلبي ؟؟
الصداع طالع من عينك يا قمري ؟؟
ليش هيك ؟؟؟ ع رأيك انت شو عملت ما انت قاعد بالبيت طول النهار بلاش دلع عاد وصحصح معاي عشان بدّي ياك بموضوع
رد مع اقتباس
