طنب بيك وبالنكَر..
رحمن الفياض.
أكو واحد من الأصدقاء حضر فتح شباك أحد الأولياء,وهم يعزلون بالغراض لكو جكَاير ودعابل وي الفلوس, وهو خطيه بعده بالجو الروحاني كَال أخوان شنهي هاي, كَلناله هاي الجكَاير يريد يبطل بلكت الله يسهل عليه ويتركه, كَال زين والدعابل شنو, بصراحه أني هم صرت سبع كتله هذا مدمن مال دعابل وناذر بلكت يبطله وشمر الدعابل هنا..
أشو أني طكَت براس سالفه, عود ليش لعبة الدعابل وكت الأمتحانات تطلع, والجهال شيش بيك وبالطنب,وبالنكَر, وأني خايب بويه تعالوا أقروا, وهم بس هذا الداس ونجي ومخلصينه عليه بهاي السوالف, بس الطركاعه وين ماروح الكه الجهال تلعب دعابل تكول عدهم واي فاي.
جبناها على الدعابل, شو أحنه ملعوب بينه شيش بيش والجماعه حاطينه بالنكَر, قبل كم يوم أجاني وليد أعرف أبوه بس روحه طافره, صارله متخرج ثلث سنوات,وكل سنه يقدم على تعين بوزارة التربيه, والي يموت قهر معدله 87 ورياضيات يعني فول موصفات, وهو خطيه كَاعد بالأطراف حواسم يعني فكرأبن فكر, المهم من طلعت الأسماء مال تربية الأطراف أسمه ماكو, وهن مثل خلالات العبد ثمانين أسم.
كَالي ياعمي شو ولا واحد من ربعي طلع أسمه, أني هم أصبر عليه كَتله يجوز ماتعرفهم أنت, وهو خطيه طفرت روحه, كَال ياماأعرفهم, لكيت المقبولين, جماعة حلومه وجسومه, تدري الجماعه قسموهن بيناتهم, المحافظ وربعه أربعين أسم, وجماعة أعضاء مجلس المحافظه أربعين, ولي يموت من القهر جايبين أسماء من الكرخ معينينه بأطراف الرصافه, يعني شهريين وينقل وتظل المدارس فارغه.
.
المهم الوليد دمعة بطرف عينه وأني أصبر عليه, وشده وتزول ومن هاي السوالف,كَالي عمي تدري أني أفكر أنتحر بلكي يصير حل مثل هذا الحركَ روحه بتونس, خايب كتله بعد عمك أحنه يكَولون عليك مخبل والعباس لو مكبسل وحركَ روحه أذكر الله وليدي, كتله أشاء الله السنه الجايه, وهو شاطت روحه كَال ياسنه جايه اذا الجماعه موجودين ماكو لاخير ولاسنه جايه, لان صار ثلث سنوات على الحال المهم هديت وراح لأهله.
أني هم أتذكر سالفه أني صاحبي بالنهروان مقدم كَلت خلي أخابره بلكي طلع تعين بنته, ضحك كَالي صايره بوكسات بالمدائن,على التعينات, جا غير رئيس لجنه التربيه بالبرلمان محير عليه الا كلهن اله وال ربعه, وهسه واكف ماكو الا اكلهن اليه,يكول عود لجنه التربيه علنت الأسماء وطلع أسم بتي وياهم وأني هم سويت عشا لوجه الله, أشو ثاني يوم أنسحبت الأسماء كالوا هاي اللجنه مو شريفه, وأني حسبالي لاسامح الله مسويه شي موزين طلعت يعني مو نزيه, المهم الغت كل الأسماء وهس أحنه ملعوب بينه طنب, ووزير التربيه, نايم ورجليه بالشمس, ومايدري بالدنيا طشت لو رشت.
رد مع اقتباس
استغفرالله