_____________
جرحي دنيه
وصبري ديره
وشوگي صورة امحنطة وغافل ضميره
هدني بيرغ
والوكت بلكيف يلعب
وانه اتلگه ابعذابي أو غربتي اشكال المآسي
الريح يلتَمْ
اويطفيّني اعله حيرة
أو ليلي يعتگ والهوى الحزنان يتخطه جزيرة
أو متّت گبل افراگك ابغيض الوصل والشميه بيك
احچايتي ادموعي التطيح أبين اديك
وتدري بيه
اشتدري بيه..؟!
الروح فحطانة أو توسدت المنية
أو گتلك ابضحكة اعتنيلي اتردني جاهل بيده لعبه
لو بچه اتلوليله امه ابچف حرير
أو لو عبر اول الصيف ابطيف مُرّة اودغدغة
..ينرسم چفها اعله وجهه اتهفي سكته ابجنح طيره
اهناه يمن گلت ابظنوني ايعود والطرشة گصيرة
وانته عن طاري الفشل ما ودعتني
العايل ابعينك طلعت انه..!؟
أو حچي الگلته ذهب.....
عدنه حد اليمشي عالعثرات عمده
يسگط الفنجان منه أو تبرة من عنده العشيرة
لاكن انته الحگ بديك
الشوگ زلمة ابلا بخت وابلاية غيره
آخ يلما ضيفت روحي ابحنينك
مرني لو جية (صُفَّر).. هم ارضه بيك
يلبعتني بسوگ نازل
سوربت عيني أو نزف غفلة ضواها
والدرب عاگول والناطور ليل
أو سولة الچول الصفير......
ضحك كل التعب بجدامي أو عثر
دارت ابدمي سوالف غربتي أو خلتني عود
أو تالي بس احزام وحدي انه صفيت ابلايه رصعة اولاله ليرة
اتگودني الشوغات واتمرجح على احبال الونين
أو حسرة العاشگ چبيرة
الناگه تحزن من يوّن الها طفلها
الشاطي يبچي اعله السفن يترجه اهلها
(دجلة).. شح الماي منها
أو فرفح ابزوده أو ضحك ماي (الفرات)
ما حسب باچر يطش گطراته (بارح)!
.
رد مع اقتباس
