___________
سومريه
وماغفه اعله الكاع طولج
كلشي بيج اندفن بيه
لون كلبج لون اخر ثوب واول ثوب زفتج الدنيه
سومريه
وياربيع المايمر بينه ويفكدج
ياعطش كيعان روحج ماروت وشعلوه مدج
ويارمل غافي بجزيره وعفيه ريح الماتكف من سفر خلكج
نجمه ماضويتي ليلج ليلنه موش اعله كدج
ياغريبه ومن يدليج اعله ناسج
بروحج شكد ناسه غربه؟ شكد ناس غربه وماتحبين النشد ؟
اندلتج ذيج المواسم بعد ماتيه خضارج
وفز دمعنه بعينه يلالي سنابل
وفز صحكنه
وفز بجينه
وصرنه مثل الساجيه التايه نهرهه وما لكت بس حضن هيمه
سومريه لياسمه نزفج حمامه
ليانجم صيتج نزفه
اطفي يا شمس الله اطفي
انتي ياشمس الله اطفي .
يادفوا يلمنه اعله مشراكت مسيتج
وياشبابيج التعزبج من تغربين اعله بيتج
لا نتيه خلي نشربهه وصيتج لانتيه
خاف بينه بليس يعزفه صلاته
واعله كل قبله نصلطن
ندهي كل ذيج الجوامع ندهي طكنه اغروب ناس
طكت الكاس البديهه اعلى من صوت المناير
لا نتيه طولنه الغافي بشبابيجج ستاير
خل نكض الريح لايزوي بحداثي الديره ويطشر الضفاير
لانتيه وين عتبة باب اهلنه
واه عتبة باب اهلنه ؟ التشتم اجدام الغريب استغربت من جدم اهلنه
سومريه ومن طلع نعشج بغفله
اديارنه الهندس خذاهه
ارواحنه الهندس خذاهه
سطوحنه الهندس خذاهه
وما لكيناهه هذيج ذيج رازونتنه ذيج المن عصر تعزل ضواهه
كلشي ضلمه وجه الولايات ضلمه
وجه المرايات ضلمه وتاه من عدهه وجهنه
اتلمس الحيطان كلهه وما لكاهه ولا لكته وتيهته وتيهاهه
.
.
رد مع اقتباس