(( ياســـــــيد الثـــــــــــــوار ))
مولاي -- الك بينه جرح يكبر ويانه شما كبر بينه العمر
لاوكف نزفه ولا ركد
لا محن ذكرك سيدي سنين الصبر
مولاي جرحك مو جرح
جرحك شتال ويطك كل عام اليمر
مشتول بين ضلوعنه
سهم الضغينه الذبح ومضات الفجر
وخيل العلى صدرك مشن
طبعن حوافرهن وسام بكل صدر
يا سيدي -- وحزنك يظل
رايات سود مشرعبات بكل كتر
ودموعنه -- اتجدد عهد وياك
كل ما يمر طاريك تدر
منبر حزن بكلوبنه
وهاون يدك بكهوته وموكد جمر
ودلال ما همها الوكت
ظلت تطش أعلى الخلك هيل وعطر
لا هفت جمر اوجاغها
ولا فشلت فنجان بسنين العسر
مولاي الك ماتم يظل
منصوب بين أعيونه اليوم الحشر
يا ســـــــــــــيد الثــــــوار
يا بيرغ تدور أعليه هوسات النصر
يا هوسة الأحرار
يا غنوه على شفاف الزمن ما تنحزر
يا رمز بعيون الدهر
ثورتك منهل للأحرار بكل عصر
ما ساومت
لا جفك أنمدت ذليله وبايعت جف الكفر
ولا جفل كلبك سيدي
ولا هزت أيمانك دهاليز الغدر
مولاي يا سر الأله
الشتل بينه أسرار ما ندري أشكثر
مولاي مدري أشبينه ألك
بينه الك لهفه وشوك رابي أمن الزغر
مولاي -- لو طفنه ألى شباجك
نحس اكلوبنه أتريد أعلى شباجك تفر
وأرواحنه تحوم بضريحك
والفراشه أعلى الضوه تفتر لمن توفي النذر
عشاك ألك ياسيدي
وأسمك يظل محفور بالريه حفر --- محفور بالريه حفر
الشاعر عبد الرضا الرماحي
رد مع اقتباس
المشاركة الأصلية كتبت بواسطة حشداوي هيبة
