(( ندبتك )) 1974
طحت ضيف اعلى بابك لا ترد الضيف
يالجفك كريم ومايرد ضيفــــــــــــــــــه
يا سيف العداله الما يجاديه ســــــــــيف
يا حجة الباري ورايته وســـــــــــــيــفه
يا فيض الهمم يا ضيغم التكليـــــــــــف
يا عزم التعده احدود تكليفـــــــــــــــــه
يا حصن الرساله ومنحــــــر التحريف
يا درع الأســــــــلام المنـــــع تحريفه
يا نهج البلاغه ومصدر التصـــــــريف
يمصرف المعجــــز الناس تصـــــريفه
يمعجز الوصف يانور شمــس الصيف
بيش ايوصف الشـــاعر شمــس صيفه
يشاطر مرحب بميزان حك تنصيـــف
لا زايد ولا ناكص بتنصـــــــــــــــيفه
ويمجندل ابن ود وابن ود بالطيـــــف
لو مر عالشجاع ايخاف من طيفــــــه
ويمحطم بخيبر كل حصون الزيـــــف
والباب الأسطوره اتحطم بزيفــــــــــه
علي أفعالك بيارغ مالهن توصـــــيف
بيهن نوصف النعتـــــــــــاز توصيفه
أنه الماخوذ حيفه ومن يرد الحيـــــف
للما يكدر بدنياه يرد حيفـــــــــــــــــه
-----------
ندبتك وانته للشــــــــــدات منـــدوب
ونخيتك والنخاك بضيج ما خــــــاب
نسب للمكرمه انته وموش منســوب
المجارم ترد ليــك اتدور أنســـــاب
علي ياسيف المجرب بالحـــــروب
وعلي هودج عباده ونــور محراب
وعلي باب المدينة علم الغيـــــوب
وعلي منبر عداله وعتك الأركاب
وعلي سر النجاة وكشف الكروب
وعلي حامي الدخيل وداحي الباب
علي حبك فرض من الله مكتوب
أو ولايتكم أمر بآيات الكتــــــاب
ابو الحسنين الك منزل بالكلـــوب
ثبت بكلوبنه حب امن الأصـــلاب
دخيلك والدخيل شما جنه ذنــــوب
ايحمونه والدخل عد حيــد ينهـاب
طلبت حماك ماتبخل يمهيــــــوب
وبسطت ابحضرتك يمناي طـلاب
بوجهي أتسددت بيبان الـــــدروب
أنه بهيمه وعلي تفتـــــــر الذياب
أهم بالليل لوحل وكت الغــــروب
وأصبح من لهيب الآه عطــــــاب
أناحط بالعذاب وروحي تلـــــــوب
الوكت فر بيـــــه الولايات دولاب
بحر العوز أفوجن بيه جـــم دوب
وللديانه أشاجف ذل العتـــــــــاب
وشجم دوب أظل بالغربه منكوب
أدور بغربتي ومحروم الأصحاب
مالي امن الصبر صبر النبي أيوب
والمكابر على الكلفات جـــــــذاب
أذعنت روحي لذلها اذعان مغصوب
وشحم اجلاي بوجاغ العســــر ذاب
أنا بشارب علي امن الجايني انوب
زماني الجاي مدري اشجاب ماجاب
ولو بسهام وكتي امرار مصــــيوب
لجن مابعد بيــــــــه أتحمل صواب
شنو ذنبي ولحلك الحــوت مطلوب
الوكت حطني أبين النـاب والنــاب
لا ني البلحيا ولا ميت محســــوب
أموتن وأحتيي ويوميه الي احساب
وأخافن لني بالنابين مصـــــــلوب
ضحك سن الشماته ولوم الأحباب
يابالغيث غثني البلم معيــــــــوب
وبأكتاره الكواسج تفتر أســــراب
أحضرني يا علي ســـتار العيوب
يبن عم الرسول ونســل الأطياب
ندبتك وانته للشــــــــدات مندوب
ونخيتك والنخاك بضــيج ماخاب
الشاعر عبد الرضا الرماحي
رد مع اقتباس
المشاركة الأصلية كتبت بواسطة حشداوي هيبة
