السلام عليكم
اكو وليد حباب اسمه حمودي .. حمودي اهله على كد حالهم، فما ينطوه يومية، .. فهو عنده بسطة مال جكاير يبيع سومر وغمدان وفايسروي
.ويحصل منها كمعدل بكل ساعة يكعد 1000 دينار ، يعني اذا كعد 10 ساعات ، يحصل 10 الاف ربح، واذا ما كعد، كلشي ما يحصل بذاك اليوم
حمودي علمود يعرف بكل يوم شكد ربح ؟ عنده مفكرة مال سنة كاملة، ويومية يكتب شكد حصل (بالصفحة المخصصة لتاريخ اليوم) .. و يحط فلوسه بالحصالة وكلشي ما يصرف
من فتح البسطة ، .. امه خلته براحته، بس شافت بدت تصير عنده فلوس .. و هذا من تصير عنده فلوس يتختخ وبعد ما يشتغل .. فشسوت ؟ كامت تحسب اللي يحصلهن بآخر شهر تخلليهن عنده والباقي تاخذه من الحصالة .. تعتمد على مفكرة اللي هو يسجل بيها. يعني تحسب 30 يوم (عكسيا) هاي حصة حمودي، اما اليوم الـ 31 هذه حصتها
هاي العملية تسويها يومية، .. فدائما هو عنده بس آخر 30 يوم
حمودي من شاف امه تسوي هيج .. يركض ويكعد ساعات طويلة بالبسطة .. علمود دائما رصيده يصعد، بس المشكلة شكد ما يتعب، دائما أمه تنطيه بس آخر 30 يوم، والباقي تاخذه
يعني مثلا حمودي بلش بيوم 1-1-2017 حصل 10 الف، .. و مشت الايام وهو يوم يشتغل هواي، يوم يشتغل قليل، يوم ينطي اجازة لروحه ما يشتغل، لحد ما وصل يوم 31، امه شسوت ؟ راحت على يوم 1-1-2017 شافت شكد محصل واخذته من الحصالة، بحيث بقى عنده فقط من يوم 2-1-2017 لغاية 31-1-2017
وهكذا كل ما يمشي يوم بالحياة ، هي تبقي المبلغ مال آخر 30 يوم عد حمودي، وحمودي يتخبل بس شسوي حكم القوي .. و يبقى حمودي يركض علمود حصالته تبقى مليانة بزود آخر 30 يوم بس
هذا بالضبط نظام العمل بالقوائم التالية بالمنتدى:
قائمة المتفوقون (نظام 30 يوم)
قائمة نشاط المراقبين (نظام 30 يوم)
اي سؤال تفضلوا
رد مع اقتباس
المشاركة الأصلية كتبت بواسطة ŤĤĔ ĹŐŔĎ ŐŦ ŤĤĔ ŔĨŃĞŚ
