هنا

[مواطن عراقي]

يوم من ايام الغربة - 13

حاولت تعويض خسارتي لدجاجاتي العزيزات
اللواتي استشهدن بالحرب
بتغيير الانتاج الى مسار آخر

طبعا مشروعي هذا قررته بناء على حسابات شاملة للجدوى الاقتصادية
فانا اولا لن احتاج الى مكان للعمل
والذي يترتب عليه موافقات رسمية عديدة
واسحب كهرباء باسمك وادفع تأمينات
واسحب مي باسمك
وسوي اذن عمل وموافقة الجهات المختصة
وفواتير بيع وشراء الحكومة تاخذ نسبة 18% منها
والى اخر قائمة المضايقات الرسمية
مشروعي بالبيت واني كاعد واتابعه
واكو مجمع سكني قريب يحتوي 450 وحدة سكنية (شقق)
وكلهه موظفين ونازوكيين
ويخربون على بيض الدجاج المحلي وخاصة اذا انتاج نفس اليوم
واني كنت مسوي قائمة باسماء وعناوين المشتريه مالتي
وهذا يريد يوميا بيضتين
وذاك يريد 3 لو 4
واوصلهن لباب الشقة بسيارتي
وسويت عرض للموظفين راس الشهر نتحاسب
واكو جماعة يريدون الا بيض احمر

فكان مشروع كلش مرتب وما بي اي منغصات رسمية
وماكو عمال ولا رواتب بس اني
والمحاسب ..... ام مصطفى

احيانا مصطفى يتدخل ويطب للقفص يكسر كم بيضة
لو يهد علدجاجات بالعصا لو المكناسه وينعل سلفاهن
وتكب العيطة والصراخات مالتهن
فسويت
السركي مال باب القفص عالي حتى ما يلوحه

بعد النكبة
شفت انه لازم اشتري دجاج بياض لكن هذا يتطلب مبلغ كبير لانه الدجاجة البياضة
سعرها فد 20 دولار

قررت ان انشئ جيل جديد من الدجاج البياض بس ينرادله
6 شهور حتى يبدأ بالتبييض

فلذلك وحتى يتم انتاج جيل جديد لازم احاول ايجاد مصدر ايرادات
فشفت انه انواع من الدجاج الغالي
سليماني, هراتي, سمان, وانواع غيرها
راح يفيد انتاجه
فرحت اشتريت ديك هراتي وياه دجاجتين هراتيتين
وسويتلهن مكان توب
وعندي علاجات ومنشطات تخلي الدجاجة تظل تبيض وما تكطع
اول يومين وباضن الدجاجات وطبعا بيضهن ملقح
كمت اجمع البيض وكل 5 ايام اكتب عليهن تاريخ واحطهن بالمفقسة ... وهكذا

بينما الدجاجات القديمات اشتريتلهن 3 ديوك محلية
وعزلت كل ديج و4 دجاجات بقفص
وباقي الدجاجات اكلناهن

(الا توحي هذه العبارات باننا مجموعه من الواوية وبكنا الدجاج واكلناهن؟ ههههه)

وهم كل يوم ام بيضاتهن وكل 5 ايام اكتب عليهن تاريخ الدخول واحطهن بالمفقسة
ورا فترة بدأ التفقيس

كتاكيت الهراتي احطهن بوحد
وكتاكيت الدجاج المحلي اخليهن وحد

ارتفعت نسبة التفقيس لانه البيض ملقح مو حزورة مثل الي كنت اشتريه من سوك القرية
واول وجبة كتاكيت هراتي 8 من اصل 10 بيضات
انباعن بسعر 10- 15 دولار
اشتراهن واحد ابو واهس ويحب يربيهن

وجمعت تقريبا 60 كتكوت هراتي وكلت اكبرهن كم شهر وابيعهن بسعر زين
وكتاكيت دجاج محلي صارن اكثر من 100

اشتريت 50 بيضة سمان من حقل متخصص بانتاج السمان بمدينة أزمير عبر الانترنت
وهذا السمان(القبج) 17 يوم ويفقس
طلعن 46 كتكوت ما ادري زنبور لانه بس تحطه بالكاع يفلت وبعد ما تشوفه
هذا السمان لمدة 45 يوم بعد التفقيس وتنطي علف فني
يصير طائر كامل للتزاوج

قررت اسويلهن قفص مغلق واخليهن يبيضن واخلي بيضهن بالمفقسة
لانه الواحد ينباع بضعف سعر الدجاجة وهنا يحبون لحمه وياكلوه
وخاصة آخر 5 ايام قبل الذبح تخلطله كزبرة ويا العلف
يصير بي طعم مميز


...........
يتبــــــــــــــــع

[كمــال انمار]