اكيد سامعين بـ ملحمة كلكامش و صديقه انكيدو ورحلة البحث عن الخلود , وشلون اكو عشبه في قاع البحر واذا اكلها لح ينال الخلود منها و يعيش للابد .. طبعا هو لكا العشبه وراد يجربها على رجل مسن قبل لا ياكلها .. وبالطريق ضاعت العشبه ورجع حزين الى ان مات ..,... لكن بوقتنا الحالي لو نسمع واحد يريد الخلود او يفكر بهالشي لح يكون الامر مضحك ويعتبر ضرب من الخيال ... .
احد الاراء تكول ان الانسان حته يطول عمره اكثر او يوصل لـ(مرحلة الخلود) لازم يكون بصحه جيده كـ خطوة اولى , يعني نظام غذائي صحي متكامل, وافتراضا ان كل مسببات الموت من امراض وغيرها تكون غير موجوده , اما الخطوه الثانيه هي الـ (Biotechnology_التكنولوجيا الحيويه ) واللي لح اركز عليها بهذا الموضوع والخطوه اللي بعدها هي النانو تكنولوجي والذكاء الاصطناعي وصراحه البحث جاري بيها خصوصا ان هية تتطرق لموضوع صناعة روبوتات حجمها اصغر من حجم كرية الدم الحمراء وتتوغل داخل الجسم . .
قبل لا نبدي القصه خلي نتخيل ان كل مسببات الموت اختفت .. الامراض مثل امراض القلب والشرايين , امراض الجهاز التنفسي والعصبي ومرض نقص المناعة المكتسب الـ AIDS , الطفيليات اللي تسبب امراض مميته , السرطان , التهاب الكبد الفيروسي , يعني كل الامراض اللي ذكرتها واللي ما ذكرتها , والمجاعه والحوادث .. لو كلها اختفت ,, وسألنا نفسنا سؤال.. بهالحاله الانسان هم لح يموت لو لا ؟ الجواب .. نعم يموت بالتأكيد !
الصراحه لو زلنا كل الاسباب الخارجيه والداخليه المسيطر عليها والمسببه للموت .. لح يبقى سبب واحد الى الان غير مسيطر عليه وهو (الشيخوخة _ageing) اضافة للـ (oxidative stress and glycation) بس خلي نعوفهن بأعتبار مو موضوعنا ونرجع للـ الشيخوخة _ ageing .
طبقا لـ منظمة الصحة العالمية (WHO) ,بعام 2014 , متوسط العمر العالمي الان هو 69.1 سنه للرجال , و 73.8 للنساء , لكن في بعض البلدان مثل اليابان ,اسبانيا و استراليا , المتوسط يرتفع لـ 83 سنه و اكثر . وهذا يعتبر اقصى ما يمكن ان نوصله بعمرنا عكس بعض الكائنات الاخرى مثل بعض الحيتان والسلاحف اللي توصل اعمارها اكثر من 300 سنه . زين هسه نسأل نفسنا سؤال.. كـ متوسط عمر خل نعتبره 75 سنه , يعتبر شي جيد لو لا ؟ شلون نقيمه ؟ ....
حته نقيمه .. لازم نرجع 10,000 الاف سنه للماضي , كان متوسط العمر للانسان ميتجاوز 35 سنه !! , وقبل 100 سنه متوسط عمر الانسان ارتفع الى 50 سنه , هذا يعني ان متوسط عمرنا الحالي يعتبر تقدم مذهل بفضل العلم و اكتشافاته !
تقرير منظمة الصحة العالمية .. اغلب الدول المتقدمه يتراوح معدل اعمارهم من اللون الاخضر الى الاخضر الغامق يعني من 70 الى اكثر من 80 سنة
نرجع للمهم , عرفنا ان الشيخوخه هي السبب الوحيد للموت ( اذا حذفنا كل الاسباب الي ذكرتها في بداية الموضوع ) ,,, وحتا نفهم الشيخوخه اكثر .. لازم نتعمق بجسم الانسان ,,تيخلوا لو اخذنا جسم انسان وعدنا مايكروسكوب .. اثناء التقريب لح نشوف خلايا جسم الانسان .. بالتقريب اكثر لح نشوف انوية الخلايا,, بالتقريب اكثر لح نشوف الكروموسومات ,, بالتقريب اكثر لح نشوف اشرطه كثيفة ملتفه حول نفسها واللي هيه الـ DNA , نرجع بالتقريب شويه ولح نشوف الكروموسومات مثل اللي بالصورة :
كروموسوم .. والقطع الخضراء تمثل الـ Telomere _ القطعة الطرفية
مثل ما تشوفون .. هذا الكروموسوم موجود بكل خلية من خلايا الجسم , بس ....لاحظتوا شي؟ اللون الاخضر ؟ ..هذا يسمى بالـ telomere , خلي نسميه القطعه الطرفية , زين شنو علاقته بالشيخوخه ؟ ,هذي القطعة تسمى ّالساعة البايولوجيهّ مثل الساعه الرمليه نفس المبدأ , لما ينولد الانسان , هذي القطعه تكون طويله , واثناء حياتة وانقسام المتكرر للخلايا , لح يبدي يقصر تدريجيا وكلما تقصر , تبدي اعراض الشيخوخه تكون واضحه الى ان يختفي , ومن يختفي , الخلايا تفقد قدرتها على الانقسام وبالتالي موت الجسم نتيجه لموت خلاياه تدريجيا وعدم قدرتها على تجديد نفسها مرة ثانية .
هسا لح يجي سؤال ويكول شنو سبب نقصان طولها؟ الجواب انو اثناء الانقسام الخلوي لح ينفصل شريطي الـ DNA عن بعضهم , ولح يجي انزيم البلمره خاص بالـ DNA ولح يبدي يصنع لكل شريط منفصل , شريط متمم اله , لكن اثناء عمله ,لح يترك جزء من القطعه الطرفية بدون ما يصنع الها جزء متمم وبالتالي تختفي وهكذا , يعني كل انقسام خلوي , جزء من القطعة الطرفية telomere لح ينقص وهكذا .
زين لاحظتوا ان مثلا اكو شخص عمره 103 سنه ومات موت طبيعي بدون اي مرض عضال ؟, وشخص عمره 88 مات موت طبيعي ايضا وبدون اي مرض مميت ؟, وواحد عمره مثلا 78 ونفس الحاله موت طبيعي ؟ .. اكيد يجي ببالكم سؤال.. ليش هالفوارق بالعمر ؟ اذا كان موتهم طبيعي ليش ما يموتون بنفس العمر ؟ الجواب يرجع الى اختلاف اطوال القطعة الطرفية telomere عند كل شخص , اكو اشخاص عدهم القطعه طويله , واكو اشخاص تكون اقصر وهكذا .
اللي درس علم الاجنه embryology لح يسأل سؤال ويكول .. زين خلايا الجنين اثناء تكوينه تنقسم انقسام مضاعف جدا مقارنه لانقسامات الخلايا بعد ما ينولد , هل هذا يعني انو احنا نفقد جزء مهم من طول الـ telomere اثناء فترة النمو الجنيني وبالتالي نخسر فترة مهمة من عمرنا ؟ الجواب لا , اكو انزيم داخل الجسم اسمة telomerase , هذا الانزيم اله القدره على ايقاف نقصان طول الـ telomere , وحتا اله القدرة على زيادة طولها , هذا الانزيم مفعل اثناء فترة النمو الجنيني , لكن بعد الولاده يفقد خاصية تفعيله وببعض الخلايا يكون مفقود تماما , لكن للأشارة الابحاث تكول ان هذا الانزيم مفعل ببعض خلايا جسمنا واللي هيه الخلايا التكاثرية لان تحتاج الى ديمومه بعملها وتكوينها بأستمرار .
يعني ممكن اذا تفعل هذا الانزيم بطريقه معينه , لح يبطأ نقصان طول الـ telomere , وهذا يعني ان اعراض الشيخوخه ممكن تتأخر الى عمر 120 او 150 وحتا 200 سنه !! وهذا الانزيم مثل ما كلت مو بس يقلل او يوقف نقصان الطول , وانما ...ممكن ان يزيد طولها !! يعني ... الشيخوخه واعراضها متظهر ابدا لـ الاف السنين !!! ...
العلماء شافوا ان هذا الانزيم مفعل بالخلايا السرطانيه , وهذا سبب الانقسام السريع والغير منتهي لخلايا السرطان وهو سبب خطورة هذا المرض , يعني لو تم اكتشاف اليه لايقاف عمل هذا الانزيم داخل الخلايا السرطانية بعقار معين telomerase inhibitors وبنفس الوقت لو اكتشفنا اليه لتفعيله داخل الخلايا السليمه , لح نضرب عصفورين بحجر واحد , الضربه الاولى انو نكدر نسيطر على مرض السرطان والقضاءعليه بسهوله باعتبار سيطرنا على انقسام خلاياه السريع , والضربه الثانيه انو نكدر بتفعيله انو نخلي الخلايا السليمه تعيش لفترة غير محدوده وبالتالي ايقاف مسألة الموت المبرمج والشيخوخه عند الانسان .
اكيد من جاي تقرون تكولون ان هذا خيال علمي مو ؟؟ بعام 2010 الدكتور رونالد ديبينو بجامعة هارفرد سوا هالتجربة على الفيران , كدر بطريقه معينه يفعل انزيم telomerase داخل الخلايا !! والنتائج كانت مذهلة , بعد ما كانت خلاياها توقفت عن الانقسام وبدت عليها الشيخوخه .. الخلايا رجعت لنشاطها وبدت تتجدد نفسها مره ثانية !!, حتا سموا هالتجربة (old mice became young again _ الفئران المسنة عادت لـ شبابها ).
طبعا انزيم الـ telomerase وحده و بحكم البحوث عليه , محصل جائزة نوبل عام 2009 بالطب والفيزيولوجي للعلماء ( اليزابيث بلاكبيرن _ كارول كريدر _ جاك سوزتاك ) . وسبب الجائزه هو بحثهم عن الانزيم وشلون ممكن اذا تفعل لح يحمي القطعة الطرفية من النقصان وايضا علاقته بمرض السرطان .
المصادر
________________________________________
http://www.nature.com/news/2010/1011....2010.635.html
https://en.wikipedia.org/wiki/Epic_of_Gilgamesh
https://www.ncbi.nlm.nih.gov/pmc/articles/PMC4531080/
http://telomeres-aging.com/
https://www.ncbi.nlm.nih.gov/pmc/articles/PMC3057569/
https://www.nobelprize.org/nobel_pri...009/press.html
http://www.who.int/gho/mortality_burden_disease/life_tables/situation_trends_text/en/
https://www.youtube.com/watch?v=_dDqFB-PjWg
http://10mosttoday.com/10-longest-life-span-animals/
https://www.ncbi.nlm.nih.gov/pmc/articles/PMC1933587/
https://en.wikipedia.org/wiki/Telomerase
https://www.omicsonline.org/investig...8.php?aid=8900
https://www.ncbi.nlm.nih.gov/pubmed/27985785
https://www.ncbi.nlm.nih.gov/pubmed/27962735
http://www.sciencealert.com/immortal...ocess-in-worms
http://www.sciencealert.com/watch-ho...-will-you-live
رد مع اقتباس
المشاركة الأصلية كتبت بواسطة نهى الجبوري
، كلشي يصير هع 