لو اي واحد من البيت بيوم من الايام ارتفعت حرارته ..., البيت كله لح يتمرض علموده , الكل تهم بيه , يودوه للطبيب , يطوه ابره , ادوية , يسووله كمادات , يسهرون علموده , الى ان يصير زين ويرجع لنشاطه اليومي بدون اي مشاكل....بس لو اخذنا الموضوع على نطاق اوسع بكثير , وباوعنا عـ الارض ..ارضنا الان تعاني من نفس الحالة ! , ونايمه بالفراش, لكن المشكله محد يهم بيهه او يسهر عليهه ,, مشكلة القرن اللي تهدد الارض واللي ساكنين بيهه واللي ممكن تخلي الارض قريبا حالهه حال كوكب الزهرة , صخري جاف حار (حرارته لا توصف ) لدرجة ان مركبة (فينيرا) استسلمت بعد ساعتين فقط من هبوطها على سطح الكوكب (ذابت بصورة بشعه !) ,... هذي المشكلة اللي بدت تطرق ابواب الخطر تسمى ( الاحتباس الحراري _Global Warming ) .
تبدي القصة قبل الاف السنين , ارضنا كانت طبيعية جدا , نشيطه , تفتر بـ رشاقة حول الشمس , ما عدها اي مشاكل , كل الكواكب بالنضام الشمسي تحسدها على جمالها و موقعها المناسب من الشمس والي يخليها صالحة للحياة (موقعها ركن بالنسبة للشمس والعين عليه ) .
و على الرغم من ان الارض يسموهه ( الكوكب الازرق) , وهذا اللون مضاد للحسد , لكن عين احد الكواكب كانت قوية جدا لدرجه خربطت احوال الارض , وهذي الخربطه بدت بعام 1980,,, قبل هالفترة كانت الحراره تصعد وتنزل طبيعيا , لكن نوعا ما كانت بيها زيادة طفيفه مو ذات اهميه , بس بعام 1980 الحرارة قفزت قفزة مخيفة , لدرجة ان العلماء توقعوا بعد 200 سنه لح تكون بالارض مناطق غير صالحة لعيش البشر من شدة الحرارة , الخبر المضحك المبكي ان بعد عام 2000 القفزة تضاعفت بشكل مرعب , و التوقعات انحسرت من 200 سنة الى اقل من 100 سنه !!!.
(لاحظوا بعد عام 1980 والقفزة الرهيبة لدرجات الحرارة)
كلنا نعرف شنو اسباب الاحتباس الحراري وشنو خطورته , طبقا لـ Inter-Governmental Panel on Climatic change , كالوا ان 95% من الاحتباس الحراري سببه الغازات المنبعثه والمخلفات الصناعية , يعني بدون اتهامات (البشر) هم السبب, وطلعت مقالات تصنف بيه الدول على اساس مستوى التسبب بالاحتباس الحراري , وصراحة اكره النفاق , يعني بدون ذكر اسامي (امريكا والصين ) الدولتين الاكثر تسببا بالاحتباس الحراري بحكم الصناعات المعتمده على الوقود النفطي والمخلفات وغيرها من الامور اللي تسبب انبعاثات لغاز ثاني اوكسيد الكاربون .
قبل لا نعرف المشكلة , خلي نعرف النشاط البيئي الطبيعي اللي كانت الارض تمارسة قبل لا تتدهور احوالها ,, الضوء اللي يجي من الشمس للارض يسقط على 3 مناطق (المناطق القطبية الجليدية _البحار والمحيطات _اليابسة). المناطق القطبية وبحكم لونها الابيض ( اللون الابيض عاكس كلي لاطياف الضوء ) لح تعكس القسم المخصص الها من الضوء وتوديه خارج الارض , اما البحار والمحيطات لح تاخذ نصيبها من الضوء ويصير بيهه تبخر وتنزل على شكل مطر , اما اليابسة , لح تاخذ نصيبها من الضوء وتحتفض بيه. هذا النظام البيئي المعروف والمتفق عليه ومابيه اي مشاكل .
زين المشكلة وين ؟ .. المشكلة ان الـ 3 انظمة المذكورة تعمل كـ سلسلة واذا تخربط جزء منها , فـ المجموعه كلها تتخربط ! .. صراحة احنا كـ بشر سوينا طلعه ابد ممقبوله منا , وطعنا العنصر الاهم (الجليد) طعنه مميته بالظهر ..شلون ؟ بعد عام 1980 الانبعاثات الغازيه والمخلفات الصناعيه زادت بشكل ملحوض سببت بأنحسار جزء مهم من الجليد ! هنا الجليد بدا يعكس كمية اقل من الضوء الجاي اله .. زين والقسم الباقي وين راح ؟ القسم الباقي توزع مابين المحيطات واليابسه , المحيطات بدت تاخذ قسم زايد عن حاجتها وبدت تتبخر اكثر وتنزل مطر اكثر واللي يزود توديه للارض الللي جواها , و الارض بدورها بدت تاخذ الحرارة الزايده اللي ما امتصها الجليد اضافة للحراره اللي انتقلت الها من المحيطات !!
انحسار الجليد اللي حجينا عنه
الضربه القويه اللي جاي ناخذها ان الجليد بدا يذوب اكثر واسرع , وسبب ذوبانه مو بس الغازات والمخلفات الصناعيه البشرية ولا الحرارة الي تجي من الشمس , وانما بسبب ارتفاع حرارة الارض اللي صايرة جوه الجليد !! وهكذا السلسلة بدت تخرب اكثر واكثر .احد الدراسات تكول ان اذا ارتفعت درجة حرارة الارض 2 سيليزي مستقبلا (طبعا حرارة الارض تختلف عن حرارة الجو للاشارة ) .فهذا لح يسبب مشكلة مجاعه لاكثر من 200 مليون شخص , ونفس الدراسة تكول ان نص العدد (تقريبا 100 مليون ) مهددين بالموت خلال سنوات اذا ( وفقط اذا ) ارتفعت حراره الارض مستقبلا درجتين .
العلم بدا شويه يحس على نفسه وبدا يطرح حلول للمشكله ( باعتبارة نوعا ما مسبب للمشكلة ) , احد البحوث بمجلة Journal of Climatology & Weather Forecasting , طرح فكرة توسيع رقعة النباتات على اليابسة لان النباتات تستهلك ثاني اوكسيد الكاربون (مسبب مهم للاحتباس الحراري) وتنطي اوكسجين .بحوث ثانية تكول ان احنا ممكن نحبس ونخزن ثنائي اوكسيد الكاربون بطريقة معينه بدلا من بقائه بالجو وهنا لح يعاملون المصانع الي تخلف ثانئي اوكسيد الكاربون بـ 3 مراحل ويحاولون بكل مرحلة يسيطرون على اكبر كميه من هذا الغاز ويمنعون انتشاره بالجو , دراسة اخرى تكول ان احنا ممكن نستخدم الوقود الحيوي( اللي جاي من النباتات والحيوانات مثل البايوديزل ) ولو تم استخدامه فعلا لح يقلل 90% من غاز ثنائي اوكسيد الكاربون المنبعث للجو .
زين هسه السؤال اللي يطرح نفسه . .شنو الخطوات الفعليه اللي سوتها الدول للحد من المشكلة ؟؟ الجواب ماكو شي... عباره عن مؤتمرات ووعود وكله حبر على ورق!! .. مرات الواحد بنهاية الموضوع يحب يسمع شي يفرح او حل للمشكلة ( الي ممكن ما تأثر على جيلنا هذا او الوراه .. لكن اللي بعده لح يتأثر بالتاكيد اذا بقينا على هذا الوضع ) ,فـ بصراحه ما احب افكر بهذا الموضوع لان كلما افكر بيه.. يجون على بالي ذولي اللي يعزفون موسيقى بنهاية فلم تايتنك والسفينه تغرق بيهم !!.
هذا رابط لـ مجموعة مواضيع كتبوها الاعضاء عن الاحتباس الحراري بيها هواي تفاصيل ممذكوره هنا اتمنى الاطلاع عليها :
https://www.dorar-aliraq.net/misc.ph...%D9%8A&x=0&y=0
المصادر :
_____________________________
http://www.popularmechanics.com/spac...enus-15939291/
http://www.natureworldnews.com/artic...ming-study.htm
http://www.esciencecentral.org/journ...94-1000171.pdf
https://www.omicsonline.org/open-acc...63-1000291.pdf
http://www.esciencecentral.org/journ...64-1000181.pdf
https://www.omicsonline.org/open-acc...625-S5-009.pdf
https://www.omicsonline.org/open-acc...63-1000258.pdf
http://data.giss.nasa.gov/gistemp/
http://www.climatechange2013.org/ima...er03_FINAL.pdf
https://www.theguardian.com/environm...climate-change
https://www.gov.uk/government/organi...-rural-affairs
رد مع اقتباس
المشاركة الأصلية كتبت بواسطة zeto
