يوم من ايام الغربة – 9
ساروي لكم عن تجربتي المنزلية
قالت ام مصطفى ان افضل خيار لنا ان نشتري سيارة
حتى لا نقضي على مدخراتنا
ونسويلنه شغله بالباقيات نعيش منها
علما احنا ما ندفع فلوس ايجار ولا كهرباء ولا مي
اشترينه سيارة
واني قررت ان اربي دجاج محلي لانه بيتنا يساعد وآني عندي خبرة بتربيته
اول خطوة دخلت الانترنت وبحثت عن مفقسات البيض
لكيت مفقسة سعة 500 بيضة فول اوتوماتيك سعرها 1200 ليرة تركية
والشحن من اسطنبول يكلف 200 ليرة يعني المجموع 1400 ليرة تركية
بالدولار تساوي 500 دولار وشوية
.... هذا الموضوع راح يوجهلنه ضربة اقتصادية احنا في غنا عنها .....
رحت الى صديق عنده وكالة لبيع وتصليح الثلاجات والمجمدات واجهزة التبريد
اخذت منه مجمدة قديمة محترك ماطورها
وكصيت فتحة بالباب وخليت جامتين من الداخل والخارج
وجبت ثرموستات ومصابيح صفر لتوليد الحرارة اللازمة
وسويت بداخلهه رفوف تسع 500 بيضة
وكملتهه وشغلتها وضبطت عياراتها
الخطوة الثانية – البحث عن بيض دجاج محلي ملقح
اشتريت بيض من سوك القرويين
وخليته بالمكينة مالتنه وكل كم يوم اشتري 50 لو 60 بيضة واحطهن
وشي يطلع ما ملقح اصلا واذبه
وشي يخرب لانه قديم وشي يطلعن
صار عندي اكثر من 500 كتكوت دجاج وفد 60 كتكوت بط
اللوتية باعوني بيضات بطة خالطيهن ويا بيض الدجاج
سويت قفص جبير بالحديقة الخلفية
وخليتلهن كلوبات للتدفئة ومعالف ومي
وغلفت القفص بنايلون حتى لا يبردن
[
وعدلت الحديقة وزرعت اشجار بيها
والحديقة الجانبية خصصتها للخضرة طماطة وبيتنجان
هذنه ما نكدر نعيش بلياهن احنا العراقيين
ولحد ان كبرن الكتاكيت وبدن يبيضن اني متابعهن يوميا واجيبلهن علاجات ولقاحات
وكل فد اسبوعين اسويلهن (خلطة عافية)
تتألف بشكل اساسي من نخالة الحنطة
واثرم وياهه شوية ثوم وبصل وزنجبيل وخل تفاح
واجوعهن وانطيهن الخلطة وهن ياكلنها اشو يردن يطيرن بالهوا
المدخرات على وشك النفاذ
لكن الدجاج يعطينا يوميا 60 – 70 بيضة
والبيضة بليرة تركية تنباع لانه قيمتها الغذائية عالية واحسن من بيض دجاج الحقول
60 – 70 ليرة تركية يوميا تعادل اكثر من 25 دولار
نعمة كريم
بعدين نصحني صديق ان اربي دجاج(هراتي) لانه مطلوب وغالي
سويت قفص تحتن شجرة التكي
واشتريت ديك ودجاجتين من هذا النوع بـ 3 ورقات
وخليتهن بالقفص وداريتهن
من اول يوم كامن يبيضن يوميا وبيضهن ملقح
بس ما يكركن
واني الم البيض واحطه بالمفقسة
ويطلعن الكتاكيت واخليهن بقفص بوحدهن
صارن 64 كتكوت
بيهن ديوجه 37 واحد
وهذا بس يصير عمره سنة ينباع بورقة ونص لو ورقتين
............
فكرت اسوي قفص اربي طيور الحب هماتين هنا ينباعن غالي
الزوج بـ 50 دولار
جبت العدة وحضرت مكان القفص
..... اشو الامور تخربطت بين الحكومة والكراد
وما اشوف الا اعلنو منع تجول وعلكت
الدبابات من صفحه والقوات الخاصة والمسلحين
اني حطيت معالف الاوتوماتيك الي تكفي للدجاجات شهر
والمي مفتوح
وخلينه جنطنا بالسيارة
واول دبابة وصلت يمنا طلعت عليهم
عاطو بي فوت جوه
كتلهم باوعو اني ما عليه انتو والاكراد تفتصلون
انتو ولد بلد واحد واني غريب خلوني اطلع اني وعائلتي
شوفتهم الجوازات والاقامات
خابرو مدري منو
انطوني اذن اطلع بس على مسئوليتي
كتلهم لا ما اطلع الا انتو تطلعوني خارج المدينة
الضابط كلف سيارة عسكرية ترافقنا الى سيطرة الخروج
................
توجهنا خلف السيارة العسكرية
والشوارع كلها حفر من اثار القصف والعبوات
والبيوت المهدمة
وجان يفتحون المسلحين النار على السيارة العسكرية المدرعه الي كدامنا
اني رأسا رجعت ليوره ختلت بين البيوت
طبعا هماتين كلها نفس سوالف داعش
عبوات وسيارات مفخخه وانفاق .... والله اكبر
فد شوية واشرلي السايق – اعبر من يمنا
اني هم دست وفلتت
ودعمتلي عمود كهرباء متمدد بنص الشارع
وفد ساعتين من الاكشن يلا وصلنا السيطرة مال الخروج
ولكيت كل السوريين النازحين والايزيدية هناك
جاي امر تخلون الاجانب
وبعدين فلتنا باتجاه مدينة الجزيرة الي هي العن من سلوبيا
بس الحرب ما باديه بيها
وطلعنا من طريق يلوف حول المدينة وفلتنا باتجاه مدينة (غازي عنتاب)
يتبــــــــــــــــــع
رد مع اقتباس
