مرحبا شلونك يا حلوين راح اسولفلكم موقف محرج صار وياي .....قبل عشر سنوات كنت مع زميلتي هيفاء وكانت هيفاء انيقة بملابسها جدا وعرفت ملابسها تخيطها عند احسن خياطة واتفقت مع زميلتي اروح اخيط عدها....وفعلا اذكر رحنا يوم الاثنين العصر للخياطة واسمها ام علي.....ودخلنه للبيت ورحبت بينه ام علي وبعد ربع ساعة دخلت فتاة صغيرة ومعها امها تريد تخيط عند الخياطة....طبعا شافتني واندهشت وكالت هاي منو ؟ ايناس ..اشلونج يا عيني .....طبعا اني ما عرفتها بالبداية وبعدين عرفتها كانت صديقتي اسماء وكنت معها معلمة في احدى المدارس بالاقضية والنواحي....وبعد السلام والكلام سألتها بعدج بهاي المدرسة ...... لو انقلتي منها....كالت لا والله بعدني واني مرتاحة.....
هسة اريدكم تتخيلون المشهد ...اني احجي وي اسماء وام علي الخياطة تباوع علينه......
طبعا من اسماء كالتلي مرتاحة .....اني جاوبتها بسرعة وعلى الصلي .....كتلها شلون مرتاحة والمدير مخبل وارعن ومسودن شلون باقية وياه مو اني شردت من سوادينه....طبعا اسماء صار لون وجهها اصفر على اخضر على بنفسجي وكرصتني حيل وكالت اسكتي......والخياطة ام علي رادت اتكوم تكتلني وكالت هاي عليمن تحجين وكانت عصبية وصوتها عالي....وبسرعة اسماء جاوبتها ....عيني ام علي تحجي على الفراش هذا موتنه مخبل واذى ايناس هواي......
لكن ام علي ما صدكت وكالت لا كان قصدها مدير المدرسة....اما اني بسرعة دافعت على نفسي من عرفت الشغلة مو خالية...كلتلها والله ام علي اني حجيت على الفراش هذا هيج وهيج ووو.....وصاحبتي الثانية هيفاء كالت اي ام علي ترى ايناس تقصد الفراش..وبعدين اسماء اداركت الموقف وكالت .....هسة يا ام علي احنه ضيوفج لا ماي لا جاي انتم اهل الكرم عمي كتلنه العطش ...وراحت الخياطة تجيب الماي وهي عاقجة وجهها ودردم......وبهاي الاثناء اسماء كالت هاي اشبيج ايناس شلون هيج تحجين !!!! كلتلها شنو السالفة فهميني.....كالت جا ما تدرين هاي ام علي زوجة مديرنه وهذا بيته......طبعا اني انصدمت وكمت الطم....كاعدة بيت المدير واغلط علي....شلون ورطة....المهم اخذت عباتي وصاحبتي هيفاء وشردت بسرعة ههههههههه.....وراحت ايام وبعد 6اشهر من الموقف تقريبا شفت المدير بالتربية وغلست حتى لا يشوفني......بس هو شافني واجه سلم وكال شلونج ايناس مرتاحة وي مديرج الجديد.....كتله الحمدلله استاذ....كال مديرج زين بس لايطلع مخبل وارعن ومسودن....كتله لا والله كلكم خير وبركة.....كال خير وبركة !!!! مو انت تحجين عليه واني اكول هاي الزينة ليش !!! طبعا اني حيل انحرجت واعتذرت وكتله لا ما اقصدك اقصد الفراش ورضيته واني اسفة واحسبها عليه...وراح الاستاذ وهو ما مقتنع.....ومن ذاك اليوم ولهذا اليوم كمت ما احجي على اي مخلوق واحنه في محفل او اجتماع او جلسة مهما كان نوع الخلاف ما احجي لان اتعلمت الدرس ....وكان مضحكا للبعض وقاسي لي.....
رد مع اقتباس
المشاركة الأصلية كتبت بواسطة هبة الله..
