تخيل ان بيوم من الايام الله رزقك برحله الى امريكا ,طبعا انت متونس وفرحان لان لح تروح لبلد مصنف من الاوائل (بلا فخر) على العالم بكافة المجالات , لح تشوف تطور , لح تشوف ناس حلوه , ايام الفكر خلاص ولت.. , وانت كاعد بالطياره حسيت ان الرحلة مطوله شويه , فـ حبيت تعرف ان الرحله وين وصلت وشكد بقالهه ؟ ,المهم دكيت الباب على الكابتن (من حسن حظك ان الكابتن مزاجه زين لان ممتعارك وي المدام اليوم ! ) وكلتله اريد اعرف وين وصلنا وشكد بقالنا مسافه حته نوصل ؟ ؟ طبعا الطيار مبتسم جاوب: هسه احنا فوك المحيط ومتجهين لولاية فلوريدا... انت طبعا رديت على ابتسامته بابتسامه اعرض لمدة 3 ثواني وبعدها صارت عندك (الشرارة البيضه) اللي تصير عند المحقق كونان لما يتذكر شي ! ويين؟؟ ؟؟ يعني احنا فوك مثلث برمودا ؟؟!
وانت خلصت المتبقي من الرحلة ادعية وصلوات !!
طبعا مثلث برمودا سالفته سالفه , واكدر اكول ان نسبة جبيره منا عدهم رؤيه ضبابيه عن الموضوع , هل هو حقيقه لو خرافه , زين والاحداث اللي انحجا بيها, ضياع سفن واختفاء طائرات شنو موقعها من الاعراب ؟ والعلم شنو موقفه من الموضوع , قبل لا نبدي لازم نعرف ان الاخ (فينست كادس ) هو اللي رسم حدود منطقة مثلث برمودا (مثلث يربط فلوريدا _بيرتو ريكو _ جزيرة برمودا ) في مجلة (اركوزي )عام 1964 ؟
تبدأ القصة عام 1950 , الاخ (ادوراد .فـ.جونز) نشر موضوع بمجلة (ميامي هيرلاند واللي هيه الاسوشييتد بريس هسه ) , المنشور يحجي بيه عن اختفاء غير طبيعي لعدد من السفن والطائرات .., وراهه بسنتين نشر الاخ جورج ساند بمجلة (Fate) مقالة بعنوان (سر البحر في بابنا الخلفي _ Sea Mystery at Our Back Door ), وهم يحجي عن فقدان طائرات و سفن بهالمنطقه , وهو اول من اقترح وجود قوة خارقه سببت اختفاء الطائرات الـ5 , ومجلة الجيش الامريكي هم فتحت الموضوع بسنة 1962 , وهم نفس الحجي (عن اختفاء الطائرات الـ5 ) ماكو شي جديد !
الاخ لاري كوش مؤلف كتاب (حل لغز مثلث برمودا _ The Bermuda Triangle Mystery: Solved ), كال ان الروايات حول غموض منطقة مثلث برمودا نوعا ما تكون مغلوطه ومبالغ بيهه وتعتبر مصدر رزق لبعض الكتاب اللي يعيشون على هيجي احداث , و بكتابه وضح ان عدد السفن والطائرات اللي تمر خلال هالمنطقه جبير ونسبة الحوادث تساوي _اذا مو اقل _ الحوادث الموجوده بـ مناطق العالم المختلفة .
على الرغم من ان هالمنطقة تمتاز بالاعاصير المداريه الي درسناهه ,الا ان حركة الملاحه البحريه والجويه طبيعيه ونوعا ما تكون مزدحمه , ومثل ما نعرف ان من الطبيعي باي مكان مزدحم اكيد الحوادث تكثر , لكن نسبة الحوادث اللي بيهه طبيعيه حالهه حال اي مكان ثاني. ووضح بكتابه ان اسطورة برمودا هيه اسطورة مصطنعه , صراحه لو بالفعل اكو قوى غامظه موجوده و تخطف الطيارات والسفن , مجان شفنه حركة الملاحه اكثر من طبيعيه .
اثناء بحثي دخلت على موقع بث مباشر لحركة السفن والطائرات , لو تشوفون ان الحركة طبيعيه وطائرات هوايه تفوت من هالمنطقه خلال وقت واحد , الصورة المأخوذه هيه صورة مباشره مثل ما تشوفون والحركة طبيعيه , ونفس الشي بالنسبه للملاحه البحرية , اخذت صورة لخط مسار السفن خلال اسبوع , ومثل ما تشوفون كل خيط باللون الاخضر يمثل مسارالسفينه اللي مرت من هالمنطقه , واللون الاحمر يمثل عدد السفن اللي كملت مسارهه للمنطقة المطلوبه (خريطة مسار السفن مأخوذه لاسبوع كامل) .
(الصورة اخذتهه من موقع مباشر للتبع الرحلات الجوية , مثل ما تشوفون عشرات الطائرات تمر من المنطقه خلال اللحظه اللي اكتب بيه الموضوع )
(هذي الصورة اخذتهه لموقع خاص بتتبع مسار السفن , كل خيط اخضر صغيروني يمثل مسار سفينه وحده )
الروايات اللي تكول ان الرادار يقرا خطأ بهالمنطقه , والبعض يكول ان شفت دائره انفتحت بمنطقة المثلث هيه روايات ركيكه مثلهه مثل اصحاب رواية المخلوقات الفضائيه اللي تخطف بيهم وتنومهم وتزرع رقاقات تاخذ المعلومات من دماغهم , لو بالفعل اكو شي مريب كان توقفت السفن والطائرات , لان مستحيل دول عالمية تجازف بسكان واموال بمكان خطر لو فعلا صحت الاقاويل ! .
العلم بطبعه عنيد ويحشر خشمة بكلشي و ما وقف ساكن امام هالموضوع , العلماء سوو بحوث على العقود الفاتت وانتهى البحث بسنة 2013 , صنفوا بيه اكثر10 المناطق البحرية خطورة بالعالم ويصير بيهه فقدان طائرات وغرق سفن , تعرفون مثلث برمودا شكد ترتيبه ؟؟ المثلث ما موجود ضمن هالتصنيف اصلا , واعتبروه منطقه امنه للملاحه ولهالسبب نشوف اليوم مئات اذا مو الاف الرحلات يوميا خلال هالمنطقه .
بأحد الوثائقيات على القناة الرابعة البرطانية عام 1992 , سألوا صاحب (سوق التأمين البحري البرطاني ) بأعتباره مخضرم بهالمنطقه ويشحن بضائع بين امريكا وبرطانيا خلال هالمنطقة, سألوه اذا اكو اي اختفاء غير طبيعي للسفن ؟ والجواب كان قطعا لا و اللي يأكد هذا هو سجلات خفر السواحل الامريكي واللي اكدوا ان ماكو هيجي ظاهره غامضه بهذي المنطقه (اهل مكة ادرى بشعابها ).
وطبعا خفر السواحل الامريكي شكوكي بطبعه , ولهالسبب خلا عيون على المنطقه , بعام 1972احدى سفن الخفر تفجرت لاسباب تم التعرف عليهه , بهذا الوقت المتصيدين بالماء العكر واصحاب الروايات الملفقة تسابقوا يكتبون عن اختفاء السفينه و ان الجثث تبخرت وانطوا سيناريوهات لما ملوا , لكن الضربه القاضيه توجهت لهذوله الكتاب عن طريق تقرير مدعوم بصور ودلائل من خفر السواحل واللي نشروا بيه حطام السفينه والجثث اللي كانت طافيه على السطح !.
احب انوه على شي مهم جدا .. اثناء البحث شفت اكثر من وثائقي لـ ناشيونال جوغرافيك العربيه والانكليزيه ووثائقيات بقنوات يوتيوب عالميه عن مثلث برمودا , صراحه لو ندخل محكمة فـ القاضي يحتاج شهود + ادلة للبت بالقضيه والحكم , لكن اغلب هالوثائقيات تعرض الشهود فقط بدون ادلة وتنهي الوثائقي بحيث الموضوع يبقى مبهم للمتلقي والشخص من يكمل الوثائقي ما اخذ حكم نهائي عالموضوع , تبقى الفكرة ضبابيه عنده.. , اللي اريد اكوله ان العلم اكد النا ان منطقة مثلث برمودا منطقه طبيعيه وامنه, لكن القنوات ما تكول هالشي ,تستغل حب البشر بطبيعتهم للخرافات والاحداث ما وراء الطبيعيه , وهذا السبب اللي خلى موضوع مثلث برمودا والغازه قائمه لليوم ,اضافة الى ان نسبة الرحلات المباشرة من شمال افريقيا وجنوب اوربا و الشرق الاوسط عموما, نسبة جبيره منها تمر خلال هالمنطقة .
هذي مجموعة مواضيع عن مثلث برمودا كتبوهه الاخوة الاعضاء للي حاب يطلع اكثر , بيه تفاصيل ما ذكرتها عن جغرافية المنطقة و عدد السكان هناك :
https://www.dorar-aliraq.net/misc.ph...D8%A7+&x=0&y=0
المصــادر :
________________________________________________
https://www.physics.smu.edu/pseudo/B...centgaddis.txt
http://www.goodreads.com/book/show/3...Mystery_Solved
http://www.physics.smu.edu/pseudo/Be.../evwjones.html
http://www.sciencealert.com/experts-...iangle-mystery
https://www.physics.smu.edu/pseudo/B...eorgeXSand.pdf
http://www.marinetraffic.com/en/ais/...tery:-8/zoom:5
https://www.marinetraffic.com/ar/ais...tery:37/zoom:8
http://www.csmonitor.com/Science/201...ngerous-oceans
https://www.thequint.com/environment...as-puerto-rico
http://www.bfi.org.uk/films-tv-people/4ce2b7c0adf84
http://www.uscg.mil/hq/g-m/moa/boards/vafog.pdf
رد مع اقتباس
المشاركة الأصلية كتبت بواسطة Suzana
