درر العراق

سعد العراقي راقي* · 3/December/2016

قصه اعجبتني فنقلتها

اكو واحد من الطيبين , يگول بعد زواجي بفترة , و بعد مراجعات كثيرة للأطباء نتيجة إلحاح الأهل من الطرفين و سؤالهم المستمر عن وليّ العَهْد ( على أساس آني سلطان بروناي) , وبعد الالحاح الطويل .. تبيّن أننا لا نستطيع الإنجاب رغم عدم وجود سبب يمكن علاجه
- ماكو خلفه و هاي هيّه !!
- ليش ؟
- هَيْچ ... من الله .. :
{ وَيَجْعَلُ مَن يَشَاء عَقِيمًا } .
- , و النعم بالله , و الحمد لله .إشبيدنا .
چا غير يفكّون ياخه أهل الرّحَم و الخير !!!
أبدا , إلا يسَوّون حياتك جحيم و يحرگون أعصابك كل يوم بالأسئلة الصريحة و القبيحة و المبطنة عن نفس الموضوع :
- ما الله رزقك ؟ ؟ ماكو شي منا منا ؟
ثم إنتقلوا إلى حياكة المؤامرات الحريرية :
- ربّك حلّل أربعة . إخِذ عليها . أبوك يريد يشوف خلفتك گبل ما تغمّض عينه . إمّك ما خلّت إمام ما راحتله و نذرتله .
- يابه أدري .. و الله أدري .. بس آنه مرتاح و أحب زوجتي و ما عندي مشكلة . و ما يهمني الموضوع .
آخر شي , إنضمت زوجتي للجَوق الموسيقي و گامت تغرّد مثلهم ( بس مو على تويتر) .
زوجتي هم گامت تحرضني و تحثني على الزواج بإريحية عجيبة و نادرة عند بنات حواء , و الأغرب هيّ بنفسها راحت إختارت عروس و خطبتها !!!!
- يمعودة , عدلي , بدلي , يا بالله عليچ .. ما بيه حيل طلايب . متأكدة ؟ .
ما فاد . ( أصرّ يصرّ .. إلحاحا ).
بعد شسوي ؟ ... قبلت بالأمر الواقع , وأقيمت الأفراح و الليالي الملاح , و جيب العشا , وإعزم أهل المنطقه فرداََ فرداََ , و كل شي تمام , و زفّوني الشباب . .. و عريّس و ربعه يزفّونه .وشايف خير ومستاهلها
و فجأة طفت الكهرباء ... و الدنيا صارت هندس !!!
و .. ٍِش ~ شش ~ ششش ... ..
* فتحت عيني واذا انا بالمستشفى , راسي ملفوف , دايخ ,, و الغرفة تفتر بيه . و الناس اليمي يصيحون :
- سلامات .. سلامات ... سهله .. سهله ... بس عشر خياطات . طيب ان شاء الله --طيب ان شاء الله !!!
أباوع ... أهلي و اصدقائي تارسين الغرفة و ممرات المستشفى , .. و إبطالة الدم و المغذي إمعلّگه
و زوجتي راعية الحفل السعيد تبچي فوگ راسي !!!
- ها ؟ شنو السالفه ؟ منوضربني ؟!
(سكتت والخوف بعينيها)
ثم قالت و دموعها تصب مدراراََ :
- آنا ... گلبي ما إنطّاني .
- إيه ؟؟؟؟؟
- ما إتحملت , إنقهرت على روحي و إنهضَمِت , شلون يزفّونك على وحدة غيري !!!
- خايبه إييييه ؟!
- و صَكيّتك بتوثيه !!!! .
- يا بَعَد طُوايف أهلي !!! ؟؟؟
........................................
* ويگولون بعدين صاروا عنده عشر جهال من مرته أم توثيه , يمكن فتحتله الغدة النخامية , و إنحلّت الچبسة .