من أهم بوستات الجلديه والتجميل
كل اللي بيعاني من الحالات دي يركن علي جمب ويقري البوست
الاسترتش ماركس وأثار حب الشباب وأثار العمليات الجراحيه وأثار الجروح والتجاعيد وعلامات التقدم ف السن والسيلوليت والمسام الواسعه وبقع السن البنيه وأثار حروق الشمس والأكياس المنتفخه تحت العين وتساقط الشعر الثعلبه وعلامات زياده الصبغي بشكل عام
ايه دا ياعم انت عاوز تعالج كل دول ف بوست واحد!!
أه عندك مانع! هو انت مسمعتش عن العلاج المنشط للكولاجين بالابر الصغيره أو اللي بنسميه Collagen induced therapy
طب سمعت عن derma roller!!
ببساطه كده دي عباره عن أسطوانه شبه الاسطوانات اللي بيلف عليها الخيط وبيبقي طالع منها ابر صغيره بنخرم بيها طبقه البشره للجلد بدون ما ندمرها فبنحثه انه ينتج كولاجين وايلاستين collagen and elastin في طبقه أدمه الجلد ويجدد البشره ف المكان ده ودي فكره عمله وبيستخدمه أطباء التجميل
وعشان كده بنسميه micro needle therapy يعني العلاج بالابر الصغيره أو non-surgical face lift يعني تجميل الوجه غير الجراحي أو skin needle therapy يعني علاج الجلد بالابر
وميزتها كمان الثقوب اللي بتعملها ف البشره بتساعد علي امتصاص كريمات العنايه ف البشره والادويه
عشان كده بيستخدم في تقنيه العلاج بالبلازما الغنيه بالصفائح الدمويه platelet rich plasma عن طريق اننا بنسحب عينه دم من الشخص حوالي 8 مل ويتفصل البلازما عن كرات الدم الحمراء في جهاز الطرد المركزي لمده 5 - 9 دقايق ونحطه للشخص ده في المكان المراد تحسينه
طب هي derma roller كلها نفس النوع؟!
لا في اختلاف علي حسب حجم الابر زي الصوره اللي ف الكومنتات كده :
فمثلا بنستخدم 2.5 ل 3 مل في التجاعيد وأثار الحروق وأثار تمدد الجسم وفتحات القرح الغامقه والحالات الشديدة اللي عندها مشاكل في ليونه الجلد
وبنستخدم 2 مل في علاج أثار الجروح الصغيره والتجاعيد حول العينين وأثار حب الشباب
وبنستخدم 1 ل 1.5 مل في التجاعيد والتفتيح في حالات زياده صبغي الجلد وتنعيم أثار حب الشباب وخطوط الحمل والتجاعيد الغليظه والمسام الواسعه والسيلوليت وتجميل الوجه والجسم
وبنستخدم 0.5 مل في تكوين جلد ناعم وصحي ومنع تساقط الشعر وتحسين صبغي الجلد والتجاعيد وتحسين الثعلبه وتسهيل امتصاص الادويه
وبنستخدم 0.2 و 0.25 و 0.3 في التجميل والعنايه بالبشره وامتصاص كريمات العنايه بالبشره والثعلبه
طب بتستخدم ازاي ال derma roller؟!
الأول بتغسل ايدك والمكان اللي هتستخدمها فيه كويس وتنشفه وتحط مخدر موضعي خصوصا لو بشرتك حساسه جامد و تستخدم ال derma roller بالحجم المناسب اللي قولناه ويتم استخدامها علي الجلد بعدد مرات من 15 ل 20 مره ف الجلسه الواحده في 3 اتجاهات افقي وعمودي وبزاويه مائله ولكن بحيث متعيدش علي نفس المكان في الجلسه الواحده وتضغط عليها بنفس القوه في كل الاماكن بحيث يكون التأثير واحد في كل المنطقه دي ولو في دم بتمسحه بشاش
طب تعمل ايه بعد ما تخلص الجلسه؟!
بتعقم المكان ده بمحلول ملح معقم ومطهر وتحط كمادات بارده ع المكان ده عشان تقلل الاحمرار والالتهاب وبتستخدم مرطب للجلد وواقي شمس لمده أسبوع بعد الجلسه الواحده وتقدر تكرر الجلسه بعد 6 أسابيع ع الاقل لحد ما يديك النتيجه المطلوبه وتضمن أفضل نتيجه
طب ازاي بتعقم ال derma roller؟!
بتغسلها بالماء والصابون وتشيل من عليها أي بقايا وتحطها لمده 5 - 8 دقايق في كحول 90 % وممكن تستخدم كمان معقم بارد زي محلول chlorhexidine لكن مينفعش تعقيم ب autoclave أو ب كلور أو درجه حراره عاليه وبخار
طب مين مينفعش يستخدم ال derma roller؟
اللي عنده عدوي في جلده أو حب شباب أو أي اضطرابات ف الجلد أو مشاكل في تجلط الدم أو مشاكل في الالتئام أو صدفيه أو عد وردي أو اكزيما أو أورام ف الجلد
وطبعا أعراضها معروفه ألم واحمرار ف الجلد وممكن يحصل عدوي ف الجلد
والاحتياطات معروفه محدش يستخدم واحده مش بتاعته ومتعملش كتير ف المكان اللي هتعمل عليه أكتر من اللي ذكرته ولو جلدك حساس جامد يفضل تروح لدكتور التجميل وخلي ال derma roller دايما جافه ونظيفه وتحفظ بعيدا عن متناول الأطفال
رد مع اقتباس
المشاركة الأصلية كتبت بواسطة ★ نـجـمــــة شـتـــــاء ★
