بسم الله الرحمن الرحيم
هنا سأحدثكم عن بعض من معاناة الطلبه الجامعيين وموت الاحلام وما عانيته من ظلم من قبل اساتذة الجامعه
جزء 1
***********************************
انا طالبه كلية تربيه علوم صرفة السنه الفاتت (2015-2016) جنت بمرحله رابعه يعني مرحلة التخرج الحمدلله مستواي الدراسي جيد صادفتني ظروف صبعه جدا ومنها مرض شخصين عزيزين عليه كلش ما جنت مهيئة للامتحانات النهائيه زين ويوم عن يوم تزيد ظروفي صعوبه وكملت الامتحانات لحد ما وصل اخر امتحان وماكَدرت اروح للجامعه بسبب الظروف اجلت الامتحان الى الدور الثاني ويوم النتائج رحت واستلمت نتيجتي الحمدلله ناجحه في جميع المواد عدا الماده الي اجلتها .. بالدور الثاني اتحسنت الاوضاع امتحنت الماده الي اجلتها وجاوبت كلش زين .. زوج عمتي جان دكتور بوحده من الكليات داخل الجامعه من معارفه عرف انا ناجحه بالماده يعني اتخرجت باقيه بس استلم النتيجه جان حلمي طول هالسنه اتخرج واشتغل بشركه اي شركه بس جنت مخططه على وحده من الشركات وحاولت وهم انشلع كَلبي وحجي منا ومناك على ما حصلت موافقه مبدئيه منهم كَالو بس تجيب الوثيقه تبلش شغل بقيت انتظر يوم توزيع النتائج وحتى وراها استلم وثيقة التخرج واروح اشتغل بالشركه الي احلم بيها سنه كامله .. واجه اليوم المنتظر ورحت استلم النتيجه ومنا بدت القصة ...
رحت دفعت فلوس وانوب انشلع كَلبي على ماكملت براءة الذمة الي بيها اكثر من 8 تواقيع وختم لازم نكملها وحده منهن لازم نروح لغير جامعه علمود المكتبه المركزيه يوقعولنا حتى لو ما ماخذين اي مصدر منها ومجرد توقيع وختم حتى بدون ما يتاكدون الطالب ماخذ كتاب او لا وبدون اي سؤال يعني شي ماله اي داعي ... المهم كملت كل هالتعقيدات ورجعت للجنه اسلمهم براءة الذمه واخذ النتيجه وهناك انصدمت الاستاذ كَالي راسبه من كَد ما متاكده من جوابي وزوج عمتي دكتور بكليه من الكليات داخل الجامعه من معارفه وصل خبر انا ناجحه بالماده فكلتله استاذ لاتشاقه وياي انا متاكده الف بالميه ناجحه بهاي الماده ومتاكده من اجوبتي كلش زين كَالي لا بنتي انا اقصد غير ماده وانتي اصلا ماجنتي جايه انصدمت لان انا ممتحنه دور اول ونطوني النتيجه ناجحه بوكتها من كَد الصدمه ظليت ساكته صديقتي جانت وياي كالتله استاذ بس هيه ناجحه دور اول كاللها وشلون هسه مكتوب هنا راسبه فكلتله استاذ شلون ارسب وانا ممتحنه دور اول وناطيني نتيجتي ناجحه بيها وحتى لو صح وراسبه شلون ارسب وانا مجاوبه كلش زين والله كال ما اعرف شوفي مكتوب راسبه ومن دققنا انتي اصلا ماجايه للامتحان اصلا .. رحت انا وصديقتي نبلغ رئيس القسم وما اهتم لاي شي من كلامنا ولا حتى سمعني كال بابا هاي نتيجتج وانتي راسبه وهالشي مو يمي يم اللجنه الامتحانيه زين اللجنه الامتحانيه همه نطوني النتيجه وكالولي هذا المكتوب زين المن اشكي انا اذا كلها اتبرت من الموضوع خابرت بابا وكلتله بالموضوع اجه للجامعه ناقشهم وما كالوله غير ما نعرف هاي النتيجه وتم تدقيقها في اللجنه وما مسؤولين عن أي خطا بيها !!! عجيب زين منو المسؤول؟؟
كالوله جان اهمال من بنتك المفروض تتاكد من نتيجتها وماكو مشكله هيه ما راسبه بأي مرحله يحقلها تعيد السنه الجايه وبس بهاي الماده ..
كالو صديقتي وبابا خل نعترض انا ادري الاعتراض مامنه اي فائده لان هواي قبلي اعترضو بالدور الاول وكلها تطلع مطابقه وغير شي ماكو ورفضت الفكره وتالي اقتنعت كلت اسوي كلشي عليه واخليها على الله حتى لا اكول انا قصرت ... ولحد هذا اليوم نتائج الاعتراض ماكو .. ومن سالت الاساتذه كالولي بنتي الاعراضات كلها تجي مطابقه واصلا محد يهتملها ماتغير شي
وبعد النقاش والحجي والمذله والاعتراض اتبين اكو خطأ بالنتيجه مال دور اول بس كلشي مافاد ولا غير من الموضوع شي كالو روحي عيدي سنه وبلكي والله يجي دور ثالث
طبعا جان سالفة دور ثالث كلش قافله وزير التعليم العالي رفض الفكره نهائيا ..
.. من رجعت للبيت الكل ظل يلومني انتي السبب انتي القصرتي ليش ما درستي عدل ونجحتي دور اول جان كل هذا ماصار احلف مجاوبه مافاد زين شنكول للقرايب الي كلهم عرفو انا ناجحه ونطوني فلوس زحمه شسوي ارجعهن المهم واكلهم ها والله ماناجحه شنو اضحك عليهم ومنو يصدك هالحجي وهم حجي الشماته يموت واول ناس همه راح يشمتون ومنا الطلاب زميلاتي شيكولون محد يتوقع انا اطيح دور ثاني وتالي اعيد سنه هسه شيكولون اكيد هسه يشمتون ظليت هيج افكر وانوب طلاب طايحين بست مواد دور اول ومايجون للمحاظرات وسعياتهم كلش ضعيفه ونجحو هسه يكولون هذول نجحو والزينه مانجحت شكول شحجي قهر وشماته ومنا الكل يومني وظلم كلشي اجمع عليه حاولنا بالف طريقه ماخلينا احد حتى مفتش المنطقه الجنوبيه ادخل ومافاد
***************************************
جزء 2
***************************************
استسلمت للامر الواقع وكلت يالله الله كريم عسى ان تكرهو شيء وهو خير لكم وخل الي يحجي يحجي اعيد سنه يجوز خيره الله اعلم .. انوب بدت معاناة ثانيه انا المنطقة الي ساكنه بيها بعيده حيل عن الجامعه تقريبا ساعه كامله وماكو خطوط الي وياي اتخرجو بقيت وحدي ولا كراج سيارات وممنوع اي سيارة تدخل للمنطقه الا اذا صاحبها ساكن بالمنطقه وعنده باج للسيارة يصرحله يدخل للمنطقه وماعندي احد يوصلني بابا دوام مرتبط واخوي هم كليه كلها انسدت بوجهي فكلت هاهيه ما اكدر اداوم وبدأ الدوام وماكدرت اروح رغم المحاولات رحت للكليه اسال عن الاعتراضات ومناك عرفت اجه دور ثالث وجان اقرا بالجدول مال المحاظرات عندي محاظره الظهر ساعه يوم الاحد وساعتين الصبح يوم الاثنين فبابا كالي راح اخذ اجازه الاثنين الجايه وداومي يوم بلكي الله يفرجها والاسبوع الي بعده امتحانت الدور الثالث وداومت ومر اسبوعين وماكو جدول وانوب رجعت عليه الظروف الصعبه وبعد حتى لو احصل سيارة ما اكَدر اداوم وطلعلي تنبيه بسبب الغيابات وكال اللجنه داومي اذا ماداومين تنفصلين ورجع القهر كل ليله احط راسي على المخده وابجي وكدامهم اضحك وكأنما ماصاير شي ومحد يدري لان بس يدرون يأذوني باللوم والحجي محد يحس جان النجاح المنقذ الوحيد حتى اخلص من هواي مشاكل بس ضاع كلشي بس جان بداخلي شي مصبرني ويكلي لاتستسلمين هالشي راح يخلص خلاني هالشي اوصل للامبالاة ظليت ما اهتم وين توصل توصل الله يصفيها .. حصلت واسطه تحلي كلشي حتى لو ما اكتب اي شي انجح بس خفت من الحرام راتبي الي اخذه من الشهاده كله مايصير بيه بركه وحرام تركت الموضوع وبقيت محتاره بين اوافق واخلص من كل هذا العذاب والتعب وبين ارفض واخاف اندم بعدين بس كلت اخلي امري يم الله والله يحلها وعفت الواسطه ..ظليت اراسل العميد والمشرف مال بحث التخرج يوميه اسالهم عن الجدول وماكو رغم الظروف الصعبه والضغوط النفسيه ومالي واهس ولا خلكَ ضغطت على نفسي وظليت ادرس لكَيت نفسي كلشي ما اذكر ولا اعرف بالماده ومالي خلك بس استمريت بالضغط وصادف الاثنين الي قبل الاربعينيه صارتلي فرصه اروح ورحت للجامعه على اساس اخذ محاظره حتى لا اتسجل غياب وانفصل للاسف لكيت محد جاي والاستاذ هم ماجاي بس رحت ادور على الجدول هم ماكو نزلت على اللجنه كلتلهم شوكت الجدول كالو بدأ الامتحان هالاسبوع وين جنتي يمكن امس امتحانج او اليوم احس كلبي اجه يوكف الا شويه انوب الاستاذ راح شاف الجدول يمهم وكالي اشاقه امتحانج الخميس وكبل كلت يالله خل ارجع اروح ادرس يومين وامتحاني وبلكي احصل فرصه واجي امتحن ......
*************************
جزء 3
*************************
اجه يوم الخميس الي هوه الاسبوع الفات وضبطت الماده كلش وقريتها اكثر من 5 مرات كلها وماخليت سؤال ماحليتهرحت امتحنت وجاوبت جواب تام بحيث طلعت متأكده اخذ 50/50 رجعت للبيت كالو بشري كلتلهم كلش مجاوبه
امس النتائج رحت ومن 8 لحد الساعه 1 يله طلعت من الكليه هم مصيبه دفع فلوس وبراءة ذمه وهم روحو لغير جامعه ع المكتبه المركزيه وازدحامات وهم على مايكملون استنساخ وطباعة النتائج وانشلع كَلبي وعلى اعصابي كلش شوكت اكمل واخذ النتيجه وافك من هالجامعه الكارثه كملت ورجعت للمصيبه العميد ب11 نطيته براءة الذمه بس يوقعها واروح وجان تجي وحده من القانونيه وتدخل ويأجل ورقتي مال التوقيع ويسوي وياها اجتماع ساعه كامله يمعود انا بس توقيع جرة قلم صارلي من 8 على النتائج وعلى اعصابي وكلبي راح يوكفبابا هم يحجي ناس تحجي مافاد
خلص وقعلي ورحت ع اللجنه طياره وجان ينطيني النتيجه ويكلي راسبه
والله العظيم بوقتها اتمنيت عندي سلاح واكَتلهم كلهم شنو راسبه شنو كلتله مستحيل كال بابا هاي النتيجه وراح ولا سمعني ظليت ابجي وقهر وحسيت الدنيا خنكتني كلش حسيت هاي اخر نبضات بكلبي وبابا ظل يلوم بيه ويكلي كم مره كلتلج ادرسي عدل ماتاخذين الحجي هاي اخر فرصه وشكد انذلينا وتعبنا وضيعتيها كلتله بابا والله مجاوبه وماشفتني شلون درست شسوي بعد واجه مشرفي بالبحث وكال يالله انتي شاطره ميخالف يجوز ارتبكتي او خوف وماجاوبتي زين السنه الجايه حاولي تعوضين كلتله والله العظيم مجاوبه وماكو سؤال ما عرفته تريد احلها الك هسه كدامك لحد الان اذكر الاسئله وحلولي كال مادام هيج واثقه اعترضي وانا حسيت بقوة عصبيه مال تكسير كلتله ليش هوه شيفيد الاعتراض اشو انتم تهملونها وتكولون للعالم مطابق عساس هسه الاعتراض الي قدمت قبل طلع حتى اقدم اعتراض ثاني كليه مهزله ... سكت هوه
رحت لرئيس القسم كلت هالمره ما اسكت لو شيصير خل يصير يفصلوني اساسا انا ما اكدر اعيد سنه كلشي ضدي وكل البيبان مسدوده النتيجه وحده خل انفصل ولا اسكت عن حقي لكيت السكرتيره كلتلها اريد احجي وياه كالت مشغول وبخصوص شنو كلتلها بخصوص النتيجه كالت اعترضي وهالشي مو يم رئيس القسم كلتلها بحق الحسين ما اطلع الا تشوفوني دفتري مال الامتحان انا اشك حتى مامصححينهن كال شنو هالحجي اصلا ممنوع رحت للعميد ولكيت سكرتيرته كلتلها من الساعه ب8 شلعتو كلبي موديني مناك وجايبيني منا وبالازدحامات هسه لو ما ابوي وياي وعدنا سياره انا بنيه وحدي شلون ادبرها ماتفكرون بالعالم وتالي ما تالي تجون تنطوني النتيجه راسبه وانا متاكده ناجحه وروحو اسالو على مستواي يم الاساتذه لو شغلكم بس اخذ فلوس من الطلاب المساكين وشغل واسطات كالت روحي واعترضي الج حق تاخذينه كلتلها جان الي حق ومن وصل يمكم ضاع مو اعترضت ذيج المره طلعيلي هسه نتائج الاعتراض وانا اروح بكل هدوء وما احجي شي بعد سكتت كالت مو كلنالكم هيه مطابقه كلتلها ما اريد حجي اريد شي رسمي سكتت وانوب الكاعدين كلهم ظلو يحجون عليهم وصارت هوسه واجه واحد من مسؤولين بالعماده وهم ظل يحجي وركز على سالفة براءة الذمه وكال تشلعون كلب الطالب بشغله مالها اي قيمه واجراء روتيني وبعد هالهوسه كلها طلعو الدفتر الامتحاني وطلعت ناجحه وهم صاير خطأ بالطباعه بس درجتي ضعيفه كلتلهم الا تفتحون الدفتر وتتاكدون من الجمع انا مجاوبه هاي مو درجتي وشنو تحطولي مقبول وانا مجاوبه تقديري ينزل جيد ما قبلو مشرفي كال هسه مو طلعتي ناجحه كافي شتردين بعد الا امتياز ومن الاوائل من كد ما طلعت روحي من سوالفهم كلتلهم يله ما اريد شي بعد بس اطبعولي النتيجه الصحيحه وخل اروح رحنا للجنه وانتظرت طبعولي النتيجه ونطانياها الاستاذ كال ان شاء الله نشوفج ماجستير السنه الجايه كلتله والعباس بعد ما تشوفوني دخل اطلع وبعد انسى شي اسمه جامعه ظلو يضحكون الاساتذه كال ها بالتوفيق كلتله حتى مع السلامه ما اكول وخليت وطلعت صح فرحت بوقت استلمت النتيجه بالكليه بس بسرعه راحت ومالها اي طعم
*********************************
طبعا من جنت بالعماده انتظر يوقعولي براءة الذمه وحجو بموضوعي والي صار بالدور الاول كالو اكو بنيه بالصيدله قبل كم سنه هم صاير خطأ بنتيجتها بمرحله رابعه ورايحه مكمله مرحله خامسه ونجحت واتخرجت بعدين دزو عليها كالولها تعالي عيدي طلعتي ما ناجحه وهم كالبه عليهم امة محمد يله امشينا
ومن رحت اسأل عن الجدول مال دور ثالث لكيت وحده من البنات الي وياي بالشعبه نفس حالتي هم صاير عدها خطأ بالنتيجه بس هاي البنيه مشكلتها اصعب من مشكلتي خطيه هيه عدها عبور من مرحله ثالثه ناطينها النتيجه بالدور الاول ناجحه بالماده وطايحه بس بمواد من الرابعه وما امتحنت العبور دور ثاني ومن راحت تستلم النتيجه هم انصدمت والمشكله هيه بمادة عبور فأترقن قيدها بالكليه ومن اجه دور ثالث ما انشملت بالبدايه لان ماده من مرحله ثالثه وجان الدور الثالث بس للرابعه وبعدين ما اعرف شلون طلع يشمل المرقنين ما ادري شلون وامتحنت دور ثالث بالماده العبور بس مال رابعه مايحقلها تمتحن فأذا نجحت تبقى بمرحله رابعه واذا رسبت يترقن قيدها
وهاي غير المصايب الي ما سامعين بيها من اهمال الاساتذه وظلم للطلبه وبكل مكان مو بس الجامعات حتى المدارس
التعليم بالعراق صار فاشل الى درجه
العراق الى اين تسير ... الى تحطيم ابنائك وقتل احلامهم
اسفه على الاطاله هواي حجي واختصرت منه هواي وقدر الامكان
رد مع اقتباس
المشاركة الأصلية كتبت بواسطة Hani Al-Mayahi
