اسلوبك ممتع يا هاني
الله يوفقك
اسلوبك ممتع يا هاني
الله يوفقك
شكرا صديقي اسعدني مرورك
حياك الله
كن بقرب عليك الله
اليوم الاحد
التاريخ 15-1-2017
اليوم كان اول امتحان فصلي وكانت المادة ميكانيك الهندسي العظيم
امتحنه ساعه 12 ونصف احنا والصباحي بمجمع القاعات بالتحديد امتحنت بقاعة الشهيد سليم هيج شي الاسم اذا ما ناسي
القاعه فد شي كبيره وعلى النظام الاجنبي يعني يكون الاستاذ بالاسفل والستيجات مرتبات بشكل تنازلي يعني مثل لفة الحب الي جنه نسويه من الورق تخيل الاستاذ بالاسفل موجود او اذا مشتري نوع من الموطه يكون على شكل مخروطي وبالاسفل تلكه العلج صح الاستاذ ما يخلي الواحد يغش بس ما اوصفه بالعلج شعلي صدف العلج موجود جوه بنفس الوقت
الحمدلله والشكر كانت الاسئله سهله جدا بالنسبه الي بحيث طلعت اول شخص من الصباحي والمسائي جاوبت كل الاسئله وشما يجي من الله حياه الله عسى ولعل اخذ درجه عاليه
حيل ارتاحيت من خلصت من امتحان الميكانيك لان جنت شايل اله هم مو اخاف ما انجح بس لان اريد اجيب درجه عاليه بيه هو والرياضيات عياره لا اكثر ولا اقل
ماعرف تعتبر ازمه منتصف العمر من حيث بعد كم سنه اصير 30 يعني ازمه سابقه لاوانه مثل الاشاعه يقال انها واقع سابق لاونه او مجرد اثبات الذات مدري شنو علق فرويد بهل الخصوص شي طبيعي ما يخرج عن الشذوذ بالنسبه اله
تذكرت قول شاعر الحب والزحف من يقول اني احبك عندما تبكينا واحب قلبك غائم وحزينا تلك العيون الباكيات احبها واحب من خلف سقوطها تشرينا
بسبب الامتحان وطبيعته البنات بالمعتاد ما يجاوبن بيهج امتحانات وهنا غيم الحزن على تضاريس الوجه وهنا بان الجمال فقلبي اليوم متبول متيم إثرها لم يفد مكبول الله عليك يابن زهير
الي صدمني اليوم ليس اني انصدمت وما اجت الا حسين لا الي صدمني ان بعض الطلاب عدهم سج بشكل مو طبيعي
ورد في حديث احد اساتذة الجامعه انه قال هناك مكان في جهنم للسجاجه وقيل من هم السجاجه يا استاذ قال من يقرا كثير ويجفص بالامتحان
اصدقائي صدموني بعدد الاسئله الي قاريه فوق ما يتخيل عقلي لدرجة موضوع تافه انا قاري عنه موضوع واحد صديق يكلي هاني انا ما مسيطر حليت بس 30 سؤال عنه
ويحك ثكلتك امك يابن مرجانه 30 الف من البعير ولم تحفظ هيبتك
اليوم 16-1-2017
اليوم الاثنين
باجر ان شاء الله امتحان هندسه انتاج ولحد هذه اللحظه ما قاري ومالي خلك اقرا درخ بالله حيل انزعج من الدرخ
الاستاذ جيد كلش ورائع بعد
نشر الاستاذ هسه بحسابه نكته فانا كطعت روحي بالرد عليه من الضحك عسى ولعل يذكر ضحكتني وقت تصحيح الورقه ويساعدني ماعرف ينقص درجتي لان ليلة الامتحان وانا اضحك بصفحته هاي فاتتني
العلويه تكول الاساتذه ماتعبر عليهم هل السوالف فما يساعدون للاسف احبطت معنوياتي وكسرت قلبي الجميل
صورة هذه اللحظه قرب قسم الميكانيك
السج لامتحان هندسة الانتاج
شكثر حلوات من يمي يفوتن
اليوم الثلاثاء
17-1-2017
اليوم كان موعد امتحان هندسه الانتاج الاستاذ ابدع بالاسئله بحيث لو جايب سؤال واحد فقط وكايل (قائل او قال او يقول ) اكتب ما درسناه من اول صفحه لاخر صفحه كان افضل الامتحان كان من 100 واحد الاصدقاء يقول انصدمت تصورته امتحان نهائي من شفته من 100 وماكو شي بالماده ما طلبه الاستاذ بحيث بعض الطلاب او اغلبه طلبت اكثر من ورقه اما انا واعوذ بالله من كلمة انا او I in english ورقه واحده فقط وكانت زايده علي الحمدلله لان البارحه نمت من المغرب علساس اقرا بوقت متاخر من الليل ما احس ( والنائم لا يحس مدري يحس ) اله كعدت بال7 الصبح رحت قرات ثلاث فصول بالكليه
انجح بس مو درجه عاليه المشكله هاي كله والطلاب يتصورون انا اطلع اوائل منين اجتلي هل السمعه التعبانه ما ادري اكلهم ما ادرس ما يصدكون مع اني ابد ما اكذب بس من الكذب يفديني بشي اعتقد هاي قلة ايمان بالله مدري ما واثق من مقولة النجاة بالصدق ولا حبل الكذب قصير على طاري الحبل يكلك الي عاضته الحيه يخاف من جر الحبل
اعتقد بعد ما اروح الصبح لان شفت بنات حلوات بشكل مرعب تصورت اجتماع الجمال والذكاء شيء نادر اشو طلع تصوري مو صحيح
صح اهل المنطق يقولون التصور قابل للصح والخطأ عكس التصديق
لله در احمد بخيت من قال
وانت غزالة بيضاء تمرح في سواد العين
على جمر مشيت اليك قلبا حافي القدمين
وعلى ذكر احمد بخيت شاعري المفضل يقول بالحرف الواحد بعلامة الرفع والضم والكسر نسخا
أَشُمُّ جمالَها بِيَدِي
وأُبصِرُهُ بآذاني
~
وأسمعُهُ بأحداقي
أقبِّلُهُ بأجفاني
~
وأقرأُ فيهِ
توارتي،
وإنجيلي،
وقرآني!
اخذا موضوع جديد بمادة الميكانيك الاحتكاك وبده يحجي الاستاذ عن فوائد الاحتكاك حتى ظننت انه سيقول
تقربوا الى الله بالاحتكاك
او خير الاعمال الاحتكاك
او عليكم بالاحتكاك فان خير اهل الجنه القائمين بالاحتكاك الحافظين لقوانين نيوتن
او في الاحتكاك نصف دين والنصف الاخر قانونين النسبيه
مع هذا الموضوع ممتع وكما هي الحال في كل مواضيع الميكانيك الاستاتيك تخلي العقل يشتغل
اهم شيء انك تركز على الجمال... وجرب اكثر من مكان.. يمكن فد يوم تشوفني كاعد هناكابحث عن الذكاء هههههه
وحاول "الاحتكاك" بمن يحمل الجمال.. والذكاء معاً............ حتى تعلمنا الاساسيات هع
ان الله جميل يحب الجمال لا انسى هذه الكلمات ابداالمشاركة الأصلية كتبت بواسطة Claudius
اهم شيء انك تركز على الجمال... وجرب اكثر من مكان.. يمكن فد يوم تشوفني كاعد هناك
وحاول "الاحتكاك" بمن يحمل الجمال.. والذكاء معاً............ حتى تعلمنا الاساسيات هع
الاحتكاك بمن يحمل الجمال من المسائي مكلف اخاف ادفع قسطها نوب هههه
الذكاء متواجد حولي لكن الجمال قليل والقيمه تزداد بالندره
اليوم الاربعاء
18-1-2017
اليوم ما رحت للكليه لان باجر (غدا Tomorrow) عدنا امتحان كيمياء
الاستاذ ابد ما يعجبني ابد ولا يعجب غيري للاسف الاستاذ يتحسس بسرعه من اي كلمه ويمشي بالماده سريع بحيث عدنا فصل اخذا محاضره وحده وداخل بالامتحان من 38 صفحه عن التاكل
وحسب ما فهمته من هذا الفصل بعد قراءه سريعه اله مثل ما علمنا الاستاذ الكبير توني بوزان اكتشفت ان التاكل اله اسباب ومسببات واو ماهذا الاكتشاف العظيم
وهناك عدة طرق تكدر نحد منه بس ما نتخلص منه مثلا
لازم ويجب وقيل احتياط وجوبي على الزوجه ان لا تنشر ملابس الغسيل على الحديد لان هنا راح يسبب تاكل بسبب الماء
كذلك ومن الممكن التخلص من التاكل او تقليله بالتصميم يعني مثلا من تريد تزوج لازم تفكر قبل لا تخطب وتزوج لان يجوز مرتك راح تسبب تاكل للراتب بصرفه الغير دقيق
ومما يقلل التاكل الصبغ يعني تخيل بنت بدون مكياج تدخل مقهى محد راح يعزمه وراح تضطر تسوي تاكل لفلوسه الشخصيه وتصرفه بس اذا صبغت الجهره هنا الصبغ راح يقلل التاكل لان البقيه راح يعزمونه و هـ م
و بهذا الصدد يقال ان الحكومه تخفض الضرائب على العمارات المصبوغه ماعرف الجديده او المهم الي واجهيته حلوه والله العالم و المختصين بهذا الامر ايضا
ومن الاحاديث المهمه بهذا الصدد الحسد ياكل الحسنات كما تاكل النار الحطب اكو تاكل بالموضوع حاول تستنتجه وقيل القيره (الغيره) تسبب تاكل للروح وتمزق الاحشاء هذا اختصاص الاطباء النفسين
اما الفصل الاول وهو المزعج الاوربيتالات والمدارات والنظريات التي تفسر ارتباط الذرات يعني الموضوع مثل الزواج عند الشعوب وكل شعب عنده عادات وتقاليد تختص بيه
بعض الشعوب والي هو الشعب العربي المسلم وبالخصوص العراق يفضل الارتباط حسب نظرية الثمانيه والي تقول مثنى وثلاث ورباع فلكل رج حق بالزواج باكثر من بنت حتى يصل الى حالة الاستقرار وكلما كانت المره لا توصل زوجها الى الاستقرار اضطر الرجل الى التشارك مع ذرة اخرى اقصد زوجة او انثى اخرى
فهنا الرجل هو البروتين والانثى هي الالكترونات تدور حوله بمدرات واعز الله المسلمين
ومن مشاكل هذه النظريه هي عدم تفسيرها لبعض الاشخاص المتزوجين المكتفين بواحده فقط او بعض العزابيه المستقرين نفسيا
وهناك بعض الشعوب تعتمد نظرية التكافؤ هيج شي اسمه ما متاكد وهي الي بنات فارس الجميلات رزقنا الله واياكم احتلالهم وادخالهم الى الاسلام وهذا النظريه تعمد على المشاركه الفعاله من الطرفين فيجب على الطرفين التضحيه بجزء مما يملك وليس مثل العراقيات الي يجي كلشي الهن حاضر مجهز بعد ان ذل زوجها سنوات طوال الى ان استطاع على الزحف لها بطرق شرعيه مقبوله بالمجتمع ظاهرا
فبنات ايران حسب النظريه يشاركن بالنصف لكن من مساوئها القواميه لا تكن للرجل مثل الرجل العربي الشهم
يمكن راح انجح زحف بسبب طول الماده ولان اكثرها درخ وانا تلعب نفسي اكثر مما تلعب نفس الحامل وقت النساوه من الدرخ
ايييي يَ بنات فارس اييييي
رد مع اقتباس