هنا

[Hani Yaqoub]

صورة هذا اليوم
ليوم الخميس
كنت واقف يم قسم الكهرباء

[Hani Yaqoub]

اليوم الحادي عشر - السبت
2016/12/03
اليوم من الصبح بالكليه حتى منعس جنت طبعا لبست بس قميص لان الجو حار وبقى حار هذا الشي الحلو بالبصرة

المحاضرة الثانية - الهندسة الوصفية
هل المحاضره اخذه الاستاذ الي اخذنا اول مره رسم لان الاستاذ الثاني مريض بقى يتكلم عن اسقاط الجسم وبعض التعاريف وغيرها
حقيقه الكلام كان معروف بالنسبه للجميع
ضوجتني مداخلة الطالب التعبانه عن الزمن هل هو بعد رابع وهنا بقى الاستاذ يشرح الزمن ودخلنا بسوالف حتى يبسط الفكره
اعتقد الطالب اقتنع ولو باعتقادي ان الاستاذ تفه الفكره اكثر مما يجب لان الزمن فد شي معضله بالنسبه للعلماء
وحسب ما قريت قبل فتره عن الزمن نظرية انشتاين وماعرف شنو الموضوع يسطر هواي نظريات هواي حجي دوخه
والطالب يريد الاستاذ يفسره اله خرب

المحاضرة الثانيه - الرسم الهندسيه
اعتقد هيج اسمه المهم هي رسم
اليوم جفصت جفصه مصايره وهي خليت الشيت ( ورقة الرسم ) بالمقلوب وبالتالي توصخت كلش لعبت بيه لعب مع الاسف
الاستاذ قال الي راح انطيك سالب 4 انا قلت اله راح ابطل ارسم وانطيني صفر اعتقد اقتنع بالفكره لان سكت
ااتعس شي بيه تعال اكتب الاسم بالخط الكوفي فلازم تقسم موضع الاسم الى مربعات صغيره 4*4 ملم وهل الشي لعبان نفس ياخذ وقت هواي
كذلك الخطوط الي ترسم ملم وتترك ملم بالعباس ما اشوفه عيوني راحت ردت افتهم شنو القصه ما فتهمه لا والتعس بعد تعال ارسم دائره هم اترك ملم وارسم ملم
هو انا خط ما دبرته نوب اسويه بالفرجال
لعبت لعب بالرسم اخر شي سويته هيج شلون ما كان ونطيته اله
راح اخلي اختي ترسم الي الاساسيات وتكمل اللوحات حتى اروح جاهزه وما اتعب بيه
المشكله نطانا واجب يمته ارسمه ماعرف الله اكبر عليك اي ما واصلك الاوتو كاد الكم
الحمدلله اني اشتريت كتاب ب5000 من المكتبه العلميه للهندسه فكانت نستختي اضبط من النسخ الطلاب جايبينه


المحاضرة الاول - الورش الهندسيه
قسمونا مجامين
فكنت من ضمن المجموعه الاخيره ورحنا ورشة النجاره قالو اسبوعين بعدين ترحون غير ورشه
الكلام عن النجاره جدا ممتع لان عندي خبره بالموضوع
جان عمي نجار واروح الهم هواي فجنت انكرب ( هذه الكلمه الي ما يفهم عراقي يتصور اتكهرب بس هي معناها يطيح حظي وهنا احب احتج على ملحد اكله اذا الطبيعه خالقتنه ليش يكولون الله يطيح حظك مو الطبيعه اطيح حظك ) فقال منو يعرف فقلت اله انا اعرف فجانت تجاوبي ويه الاستاذ افضل من البقيه
وبما ان الموضوع عن النجاره فاطرقنا للغرف مال زواج وبالتالي الى المهر وغلات المهور والزواج والنساء و و و

[Hani Yaqoub]

صورة هذا اليوم
جاي احل اسئلة ميكانيك هندسي

[Hani Yaqoub]

صور هذا اليوم
ليوم الاحد
٢٠١٦/١٢/٤

[Hani Yaqoub]

اليوم الثاني عشر - الاحد
2016-12-4
حاليا جاي اكتب وانا بالستاركس متوجه للشغل للحيس فاعتقد راح اسحك هواي ( لا تتخيلون البنات الي يسحكن عنب علمود الخمر ماكو شبه ) ما كتبت امس كما هو معتاد لان جنت تعبان مدري جنت أزحف ههه

هذه اول مره اقول للسائق ينزلني قرب جسر الكزيزه حتى اروح للجامعه تعاجزت اروح للبيت وكنت شوي متاخر
الجو كان غائم بارد ورذاذ خفيف
صعدت ويه كيه بعد طول انتظار ( انتظار ليست انثى بل ملاك )
وصلت للجامعه عل وقت
صح قلت فوك متاخر عل بيت بس وقت عل جامعه
هذا ما يدعى بالنسبيه نظرية أنشتاين كل شيء نسبي بالحياة
وقتي بالنسبه للبيت متاخر لكن بالنسبه للجامعه وقت
مثل اخر
انا بالنسبه لبعض البنات حلو وبالنسبه البعض مو حلو
هسه انا حلو لو لا ياربي اعتقد راح اترك النسبيه وأتحول لمذهب المتشككين ويه برانتد راسل مدري ديكارت الي شك بوجوده حد ما قال انا افكر اذن انا موجود يا الهي خلط عقلي
بما انه اليوم اول مره اوصل للجامعه وقت فشاهدت طلاب الصباحي
نظره مقربه وعجبني ما رأيت ، الحمدلله الصدقه بيه هواي حسنات
تعرفت عل طالب من صباحي مرحله اولى ميكانيك علمته بعض الامور عل ميكانيك حقيقه استغرب شلون اعرفهن .
قبل المحاضره ناقشت ويه طالب ويانا بنفس الوقت هو معيد باحد المعاهد بعض النقاط الي اعرفهن وهو يعرفهن لزياده الأواصر بين خلايا الدماغ لزياده سرعه توصيل المعلومات مثل ما يقول توني بوزان صاحب خرائط العقل حقيقه هذا المؤلف رائع للي يحب يطور دماغه وطريقة الدراسه و و
الطلاب التفو حولنا كربيضه الغنم ينهالون علي من كل جانب مثل ما قال امير المؤمنين في الخطبه الشقشقيه ( هذه الخطبه بيه هواي امور تاريخيه )
احد الطلاب كان دايخ بشغله النتائج تطلع مختلفه للساين والكوساين
الحمدلله هل معلومه حصَّلته بلاش قبل يوم وبالتالي قلت اله شلون يطّلع نفس الرقم عن طريق تحويل مود الحاسبه الى دگري

[Hani Yaqoub]

المحاضره الثالثه - ميكانيك هندسي
المحاضره كانت عن الضرب النقطي وتحليل القوى دوخنه
ما تركنا الاستاذ الى ان انتهى الوقت طلع روحنه


المحاضره الثالثه - الرياضيات
جاي ناخذ الرياضيات وقت متاخر وبعد ميكانيك حتى منفهم شي الموضوع صار بيه قوانين هواي
اسئلة بعض الطلاب غبيه جاي تاخر علينا الوقت للاسف

[Hani Yaqoub]

صورة اليوم
قرب عمادة كلية الهندسه

[تشيللو]

في الهندسة . .
وتحديدا في القسم الداخلي . . يومية طلابة ع اللي يسوي غداء وصلت المرحلة إلى الضرب . . بعدها هدءتهم وسويت جدول أسبوعي لكل شخص بالغرفة يلا ارتاحيت . .للعلم النفسية هناك خاصة الغروب زفتيشن

[Hani Yaqoub]

حالتي الان

[Hani Yaqoub]

بعد هذه المده صرت أتلذذ بمادة الميكانيك الهندسي مثل حب شمسي وقت اللمه
عقلي صار يبدع بيه يارب استمر على هذا المستوى من الاستمتاع جاي احل مسائل كثر كل يوم تقريبا اجي متلهف عليه مريام وهبلر وبير انتم في القلب
الرياضيات هي الاخرى لذيذه مثل رائحة الخبز وقت الصيام
مادة الكيمياء راح تخليني اتقيء الاستاذ ما يعجبنا ابد حساس زياده
هندسه الانتاج الاستاذ اخلاقه عاليه وحباب حفظه الله ورعاه ماده ليست بالجافه كما يقال
الى الان الورش ممتعه ورشة النجاره ورشة البراده مرن على خير يا طيور الطايره مرلي لهلي