برشام قلبي
متابع من بعيد
برشام قلبي
متابع من بعيد
اليوم مدري جكد ياربي لحظه اشوف
تيوزدي مممم لحظه احول مخي انكليزي هسه ارجعه عربي
اليوم الثلاثاء
24-1-2017
امس كان يوم مشؤوم بحياتي صدمني الاستاذ ابو هندسه الميكانيك بالنتيجه كنت خارج من الامتحان وكل ظني درجه كامله بيه 30 من 30 لان حسب ما يرويه الثقات من الاصدقاء وحسب ما يقوله الاستاذ نفسه انو انا لست اسيا سيل بل زين بالماده
لكن الصدمه الكبرى الي حتى الاء حسين ما ظهرت بيه ناطيني 19.5 من 30 انا تغيرت لوني ورعدت فرائصي وبانت نواذجي ( لحظه هاي مال اسد) فهبط ضغطي وصعد السكر مدري شنو الاستاذ كلي هاي ليش هيج انت زين كما قلت سابقا شوف شنو المشكله
لزمت الورقه كما يلزم المجدي الفلوس
السؤال الاول درجه كامله حلو
السؤال الثاني 3 من 7.5 خرب ما هذا ليش دققت بالسؤال وجان اشوف الكبوه التي ازهقت نفس الفرس كاتب الاخ الي هو انا بس لان ما عجبني تصرفي وقته
كاتب 60-40=40 يعني هاي شلون سويته انا ما ادري المشكله بالحسابات الكثيره خلتني اخطا هذا الخطا بس المشكله الاستاذ روح مني 4.5 درجات وما عندي اي خطا في هذا السؤال يا دكتورنا المبجل اخذ درجه 2 مو فوق النص
السؤال الثالث درجه كامله
السؤال الرابع ناطنيي 1.5 من 7.5 شنو هاي معقوله ما مجاوبه صح قارنت ورقتي ويه الطلاب الي ناطيهم درجه كامله نفس النتائج استغرب شنو المشكله بعد ما خلص الاستاذ من الاوراق
دكتور وين المشكله بهل السؤال النتائج نفسه كال ها
دقق بالورقه جان يكلي انت ما كاتب FA بالرسم فوك المفروض تكتبه
دكتورنا بس هي موجوده بورقه الاسئله يعني ما يحتاج انقله للورقه بالرسم الرسم توضيحي عانديني وبده يجادل انا سكتت لان ما احب اجادل عل درجات بس هذا الظلم بعينه سؤال محلول صح يقيمه بالحضيض قهرني والله الاستاذ يارب يصير بيه شي مع العلم كنت احبه لان افتهم منه بساع
بقيت اليوم كله ضايج وحد هاي اللحظه ضايج لان انقهر اذا بالمواد العلميه اخطا بس عادي الشرح حدث ولا حرج بالجفصات
امس كان موعد امتحان الرسم الهندسي والوصفيه
اعتقد رسم البيضوي ما سويته عدل هو صار بيضوي بس كانو واحد دافره صفح اما الوصفيه الحمدلله لان ارقام وسوالف مجاوب بيه
اليوم كان موعد امتحان هندسه الكهرباء
ما قريت هواي الطلاب صار 3 ايام يقرونه انا قريت البارحه ساعه واليوم ساعه بالكليه
الاستاذ حل الاسئله بالقاعه لان كان عدنا هندسه كهرباء بالمحاضرات
السؤال الاول درجه كامله اخذ
السؤال الثاني درجه كامله اخذ
السؤال الثالث جفصت بالنهايه طرحت التيار من تيار بدل ان اجمعهن اعتقد انا الوحيد الي اجفص هيج جفصه اصلا اكثر من ثلثين الطلاب ما وصلو لهل المرحله من الحل كله جافصه بالبدايه بس كم شخص وصل هيج اخ لو ما جافص بهل جفصه جا درجه كامله
السؤال الرابغ هذا حليته صح كله طلعت وحده من الفولتيات 12 من تعوضه بالمعادله تطلع الثانيه صفر كتبت بعدين كلت وين اكو فولتيه صفر هنا رجعت ادقق بالحسابات كله تطلع 12 حد ما دققت للمره الاخيره بنفس الرقم فطلعت 13وبالتالي طلعت الفلوتيه الثانيه 0 بوينت كذا رقم وهل السؤال حيل قهرني لو مبقي على حاله جا هم درجه كامله بيه اااااااوف ليش جاي اجفص هيج جفصات تافه مشاكل بالحل ماكو بالخطوات ماكو ليش جاي اجفص هيج ما ادري
الطلاب كله تبجي كانت اليوم من اسئله الكهرباء ما عدنا احنا 2 كنه نضحك لان الاسئله تافه شفته ماعرف يمكن نزل علي الوحي وخلاني اعرف احلهن بسرعه وبيسر
هلا احمد انرت الموضوعالمشاركة الأصلية كتبت بواسطة أحمد العثمانيے
برشام قلبي
متابع من بعيد
اسعدتني متابعتك من بعيد ذكرتني بمتابعة الصاكه الي بالجامعه من شدة جماله متكدر اتابعه من قريب ههه
حياك الله
ههههه
صورة هذه الليله
هذه الصوره من فوق جسر الكزيزه ( جسر الرسول الاعظم )
والشارع الظاهر بالصوره هو خط السريع مابين البصره ناصريه ولنهاية العراق
بالطبع مشينا هواي انا والاصدقاء حد ما وصلنا اهنا السبب
2 ضايجين لان ما مجاوبين
2 فرحانين لان مجاوبين
بالنتيجه حسب قانون كيرشوف للتيارات والفولتيات ساوينا بعضنا
ءاعبرالا مويلا
7012-1-52
بما ان اليوم كان الموعد امتحان نكليزي فكتبت العنوان بالمقلوب
الامتحان كان اعلى من مستوى تدريس الاستاذ حقيقه الماده الي درسناها كانت تافه نسبيا كانت الاسئله اصعب لولا لطف الله بنا وانعامه علينا بالذاكر المتراكمه جا انعلست من الفك الى الفج جفصت هواي ماكو مشكله يقلك من الجفصات تتعلم مدري من الاخطا ماعرف عقلي صاير يخلط فصحى وعربي من بعد الانكليزي
السؤال الثالث كان الاستاذ طالب تكون سؤال من كلمات مطشره (مبعثره ) انا ما قريت شنو طالب فلزمت النقاط وكعدت ارتب الكلمات اشو كلهن طلعن اسئله بس الاول ما طلع سؤال مع ورود كلمة وير بيه المهم ما قبل يطلع وياي سؤال فما سويته سؤال
شفت الطلاب كل شوي طالب صايح للاستاذ استاذ اكو غلط بالاسئله انا لا شفت غلط لا شئ فقلت ما هذا ليت شعري ما هذا المستوى المتدني مقارنه بهم (بس فكرت بالعامي طبعا ) اشو من طلعت من الامتحان قتلهم ها السجاجه اشو انا حتى ماعرفت وين اكو غلط بالاسئله قالو مو هذا السؤال هو طالب تسويهن اسئله بس الاولى ما تصير سؤال انا هنا صدك وبالواقع وتالله وبالله فرحت لان اصلا مسويهن كلهن اسئله ما عدى الاولى ما تصير سؤال والحمدلله الذي جعل من الجهل بالشيء نعمه
اليوم صديقي قال يا هاني ياهاني بدون ما كرره مرتين بس حبيت اكتب اسمي قال هاي شنو ام المدني قتلت روحه عليك فقلت له من هذه يا غلام اقصد يا صديق قال فلانه كتله ماعرفه قال شسالفه تفتر عليك من ذاك اليوم الي جنت تخابر بيه فديو قتله والله ما ادري ولا اعرفه ولا ملاحظ بنت تفتر علي كاني كعبة عشقها فتطوف حولي ترتل عينيها ايات الغرام قال يمعود هو انت شتدري جكد مطفي قتله والله ما انتبه لما يدور حولي بس انتبه للصاكه واحده فقط
المهم اعتقد باجر اشوف من هذه التي يقصدها حتى اوعضها عن مثل هذا الفعل ههههههه
بطريقي للكليه انتبهت للمدرسه بنص الكليه قرب سكن الاساتذه هنا حيل انقهرت على الطلاب الي بيه
لان هذا الطالب ابو دكتور واذا كان الله خالقه مطفي راح يبتلي ويتعير هاي عود انت ابن فلان وهيج غبي والاب من قهرت قلبه يقول علموه طريق الحق حتى ولو بالقصاص لا يرقى ان يكون ابني وانا ابن التي صرخت يا علي من خلفتني
اعتقد من السيء جدا ان يكون الشخص ابوه شخصيه طاكه ( راقيه ) كلش (جدا) هواي(كثيرا) لان ما راح يعيش براحته دائما يطلب من المزيد
صورة هذا اليوم من الصديق عمر
المصور الطيب عمر
الي بالنص انا
والاخير الطيب سعد
جنه نراجع قواعد الانكليزي قبل الامتحان بربع ساعه
نعود للمتابعة...
بالتوفيق صديقي
انرت صديقي
اليوم الجمعه
27-1-2017
كان اخر امتحان النا يوم الخميس حاسبات كان الامتحان ب 3 فصول اول فصلين المفروض الاستاذ يستحي على نفسه وما يدخلهن بالامتحان انا اشوفه عيب يدرسون اجزاء الحاسبه وانواعه المنقرضه احنا مو تخصصنا حاسبات ولا علماء اثار ولا تاريخ بعد مضيعه الوقت بهل الامور المن هاي نطوها للابتدائيه تنفع
الفصل الثالث هو فصل الخوارزميات انا ما قرات الخوارزميات عدل والسبب لان بمختبر الحاسبه الي نشتغل على برمجه ++c على مرتين اخلص اول شخص فحصلت تقيم زين وبالتالي قررت ارتاح من الدراسه وبالتالي جفصت بيه اعتقد ما متاكد
ما دخلت محاضرات يوم الخميس ضربته هذه اول مره اضرب الرياضيات بالمعتاد هو والميكانيك اهتم فيهن لكن بسبب الفرحه لان انتهت الامتحانات رجعت للبيت حتى انام قضيت امس واليوم على الافلام لان صار فتره ما شايف حسيت نفسي مشتاقه الهن
البقاء في البيت لا يوجد فيه ما يثير الاهتمام
رد مع اقتباس