صديقي يروي لي حكايته مع احدى السيطرات من السنين التي مضت
رحت لبغداد بعت سيارتي بمعرض بيع السيارات التابع لصديقي
واخذت فره بالمعارض القريبه ادور على سياره حديثه فملكيت
بعد مقررت ارجع كعدت يم صديقي وصيته اذا اجته سياره برادو ينطيني خبر حتى نتفاهم عليه
كالي : مدام انت راجع للكوت وبدون سيارة متاخذ هاي السيارة توصله لبيت فلان مكلفيني عليه ؟
المتحدث : ماشي ...
اخذت السيارت وانطلقت للكوت اثناء الطريق لاكتني سيطرة ومن مسافه اشوف الكل في حالة تهيئ وكأني اني المقصود ... الاسلحة بجميع انواعه توجهة عليه اخوانا الشرطه والجيش انتشروا اخذو الحيطة والحذر الشديد منهم الواكف ومنهم الي برك ويأشرولي بالوقوف على بعد لا الكلك ولا تكلي هاي الهوسه كله متصير الا على السيارة عليه بلاغ ومتابعة من داخل بغداد وبهل المكان افضل طريقه للسيطرة على الموقف .
كلت ياستار ياحافظ احفظني وحفظ عويلي وسترني من الهاويات ... يصير ابو المعرض مغري بجم شده ومفخخ السياره ورطني بيه ...هاي الهوسه مو مال مشتبهين .... رحت بالرجلين شيثبت اني مالي علاقه بالموضوع ... شورطني ... الله يلعن ساعة السوده العرفني بيه .... هسه اني مو ما اصعد الا سيارتي ... المهم كل هذا الي دار ابالي خلال لحظات قصيره
وكفت اسمع واحد من مسافة يبعد عني وكأنه جن جنونه ووجهه عابس ملامحه غاضبة بصوت ملئه غضب وحذر ... يكلي افتح الباب وترجل من العجلة و ايديك فوق!!! ( ياطركات السوده )
ياساتر فتحت الباب وترجلت ورجليه وحده تضرب بالثانيه
السيطره : ارفع ايديك وخليهن وره راسك....... واحد ثاني يكلي يم الحايط ودير وجهك عليه
بصراحه مستوعبت شلون اسوي الحركه شنو ارفع ايدي وشلون اخليه وره راسي لان بذيج اللحظه فقدت السيطره على التحكم العقلي والسمعي والحركي لان الجهاز السمعي احس بي صدى صار ... وجهاز العصبي الناقل للخبر من العقل للعصب تشوش ..... والحركي ،، الرجلين والادين ماحس بيهن عندي .... الله لا يوفقك الي ابالي
عموما هم رجال ومسيطرين على الموقف ... هذا يصيح وذاك يكله دير بالك وغيره يكول لزمناها وبينهم وبين جهاز النداءات خبصه صارت بس بصراحه ماعرف شجاي يحجون لان ما عندي أي تركيز ... كل جسمي يطكطك ومن راسي لرجليه عبالك اركص شرقي خو الورك ابد ما وكف ... احاول اعرف شجاي يصير وراي يم السياره بطرف عيني , شفتهم وعينك لاتشوف الكلاب البوليسيه واجهزة الفحص وفتحو بطاين السياره الدواخل والجنطه والبنيد مفتوح لاكلك ولا تكلي السياره العب بيه طوبه واخوك ماضلت قطرة دم بية سمعت واحد يكلهم يابه هذي السياره فرق رقم هاي هنا 3 شوفو والمطلوبه هنا الرقم 2 ... جابو القوائم وبعد متاكدو صاحوني اجيت واخوك ما جنه ذاك الزلمه اليوكف بوجه عشيره صاير وجهي نوميه صفره طلبوا هويتي ورجعوها والناس امانة لله اعتذرو مني وجابولي مي
كعدت على الرصيف ومددت رجليه خابرت صاحبي
الو خويه تعالي بسرعه بالمكان الفلاني
هو : شكو
اني : لا ماكو شي تعال وسديت التلفون .
اجه وشاف السياره اتفاجئ
سألني شكو ؟ هاي شصاير بيها السيارة ؟
كتله هاك سويج السيارة و اني رايح للنهضة اسأل الاخوان عليه في امان الله
اجرت تكسي للنهضه ومناك اجرت سياره للكوت
رغم هذا اني بعدين هواي فرحت لان عدنه ناس تضحي بنفسه وعلى يقظه رغم الي يصير من انفجارات
ربي يحفظ ابطالنا المضحين من اجلنا واجل العراق
رد مع اقتباس
المشاركة الأصلية كتبت بواسطة Mu5hTaQ
