الى الذي تركنا دون رجعة وكأنه يدندن ويطرب على صوت القطار الذي راح به الى المقابر وتركنا لانفقه الى سوى كلمة واحدة هي الحب اهدي هذه الكلمات الى كل والد عراقي ….
الى والدي العزيز
..................................
انه ابوي الفرحة كلها ….
ولو تحسر يذب ضيمه اعلة الجكاير
وامــــــــي
دمعة …..لو تطيح اتصير جبهه
ولو ابوي ايحسهه تحزن ينكلب ويصير ساتر
دوم ابوي بعيني شمعة
جانت اضوي على اعيون الحراير
وجانت اتضوي على اخدود المناير
وباقي شمعة
وللاسف مو مثل الاول
هسة ضوت عل مقابر
انه ابوي اعيونه طاحت وانعمت مدري شجاهه
والسبب جي شاف امي
للاسف غطاهه شيب وراح كل الحيل بيها
والمرض كلش خواهه
وماتحمل انه ابوي بيوم راحت ودعتنة
اعيونة طاحت من وراهه
وعشنه جن عيشة يتيم وي اليتيم
وسمي عصر اليتامى
ولذلك جان ابوي يحترم ذوق اليتامى
ويحترم اصغر حمامة
ولو يجوع بيوم واحد ينزف اعليهم كرامة
انه ابوي اعظم ملك واكبر فقير
غني كلش جان هو
وحسدتة الوادم لان يملك حصير
وجان من يضحك يغني
(ياطيور الطايرة ردي لهلي )
وعوفي النياح
والطيور الطايرة اتهز بجنحهه بكل صباح
هسة حتى اطيورنة جاعت خطية
ومن تجوع ادكوم تاكل بالجناح
وجان من يكعد ابونة
احس جن الدنيا كعدت
وجنت اشوف الجنة مزروعة بوجنتة
وشوف هاي الناس كلهه
تكعد اتصلي لكعدتة
وي اذان الله واكبر
هو يسجد
وشفت جن الشمس سجدت وي سجدتة
والفجر من مستحاته يكوم يشرد
يختل ايلوذ بلحيتة
وجان من يكعد يسولف كلهه تسكت
واحنة متعودين نحجي لان من يسكت مصيبة
والله يستر من سكته
وجنة من نبرد يجينة ايلفنة دوم احنة بعباته
يغطي بينة بكل مسية
راد بس يستر بناته
والليل يصرخ ….
وينصلب في جذع عيسى
والسهر يبجي لسباته
وحتى بيبان المدينة تنشلع لو مر خيالة
وتنحني لهيبة اعكالة
وتنكسر من مستحاته
وشوف هاي الدنيا كلهه تحيا جانت في حياته
وماتت الدنيا اعلة مودة حين سمعت في خبر جابو وفاته
والنوارس جانت اتفي بجنحها اعلة الجروف
وحين سمعت مات ابوي
مات ابوي
طارت وبالعين دمعة وصفكت اعليها الجفوف
في زوايا البيت
ظل صوتة على اشفاف الصور ليهسة طابع
عالكتب والذكريات وعلى المرجوحة القديمة
احس نفس الصوت طالع
ومن اشوفه بطيف صدفة
اشكر الله
واركع واسجد واصلي
وجن اشوفة بعيني جامع
انه ابوي اول صرح عاش بكياني
وكون احط تمثاله بصف الرصافي
وكون اخلي اعليه تنحب كل قصيدة
اعليه مذهولة القوافي
دوم اشوفة بعيني جنة
ومن تراب اكبور اهلنه
كبره الطاهر يفض ومن ترابة صغنه حنة
احنة بعدة من نعرس
مانحني اجفوفنة بحنة عرسنة
انحني دوم اجفوفنة بتراب كبرة
لان صارت ارقى حنة
رد مع اقتباس
