حسين علي المطوري - غمزة جفن



الماي يعطش يشرب بروحه ويموت
تصير دمعه يصير كتالك ردن

يا كلب لا تحيي جرحك شبعه موت
صدك اكرام الجرح من يندفن

الصوت لتبذره على السمعه ثكيل
احجي يم اليسمع بغمز الجفن

ولا تأمن لليشبهوك وتدير
ابليس من نار وعذابه بنار يصير .. ( بناري صير) طريقة اللفظ

ولا يغرك شكله لو طعمه وحلاه
اليعثر بتفاحه يوكع من سماه

ولا تطيح افياي فوك الما يريد
العلم فارغ فوك كبر المو شهيد

لا ولا كلمن عرك تعتبره حار
محتوى الكاس العرك بارد اكيد

المايعرف يلوكلك ناقص خضار
شجاب ورد المزهرية اعله النده

هو ما شايف نجم بس بالكسوف
وانت ليلك نص نهار الله وبده

الصوت مالك ينطرد يرجع عليك
لا تغشم روحك تسمي صدى

لأمنت لمساتك بجفه ومشيت
عبر جفه بجف غريب امدده

عيوني غمضت مو لان ماردت اشوف
غمضت عيني لان مستبردة

بالك اعله الما يحس تخسر عتاب
الماعرف شيب الهوه يسمي ضباب

ماكو درب فراك يشتاك لجدم
وماكو جف نسيان يمسح بالصور

وماحجت باليسحك اعليها ويفوت
الصخرة بس تتذكر لبيها عثر

السؤال يعيش اذا مابي جواب
صير غامض كلها تحسبلك حساب

الكاتل براسه الف حسبه تفوت
بين دكه ودكه من دكااات باب

الباب مرات بفتحته يردله ضيف
باب عينك سده يله يطبله طيف

الباب دكه يفتن لاهله عليك
اشتاك بس لا تنفضح دكه اعله كيف