مستوره جانت دمعتي!!
حسين الساعدي
/////
اهنا يمن جنه وجنت نلعب سوى ابمرجوحه
مستوره جانت دمعتي ومنك صفت مَفضوحه
ثارات أطلبك بالزغر
ما تنسي ابكل العمر
ياروحي وبطعنة غدر
منك بقت مجروحه!
واهنا يمن جنه وجنت نلعب سوى ابمرجوحه
مستوره جانت دمعتي وهسه صفت مَفضوحه

/////////////////////////

لاكيتني وما سلمت_ بس لا صدك ناسيني!
ياوسفه جَنك ضَيعت _حُب الزغر و اسنيني!
وعذرني لو ما سولفت_ سبكتني دمعة عيني
ماتذكر اشلون اللعب
نومنه من بعد التعب
مابين صوباط العنب
لمن كدرنه انلوحه!
واهنا يمن جنه وجنت نلعب سوى ابمرجوحه
مستوره جانت دمعتي وهسه صفت مَفضوحه

////////////////////////

ماحسبت هذا الوصف_ تنكر محبتك ياولف!
واحنه ابهوانه المنكشف _ سالوفه وبحلك السلف
وانه العرفتك ياترف _ لكنك امضيع العرف!
وايامنه الحلوه المضت!
ياوسفه شبساع وكضت!
والروح احسنهه صفت
فوك الارض مطروحه!
وهنا يمن جنه وجنت نلعب سوى ابمرجوحه
مستوره جانت دمعتي وهسه صفت مَفضوحه
/////////////////
االساعدي