المشاركة الأصلية كتبت بواسطة ★ نـجـمــــة شـتـــــاء ★
اليوم راح احجيلكم الجزء الثالث من شقاوة طفله وهالمره شقاوتي ويا الجيران تابعو 
سالفتي الاولى ويا بيت ام كرار:
جان عدنا جوارين اسمهم بيت ام كرار هذول بيتهم كلش بصف بيتنا سياجهم شبرين عن سياجنا المهم اذا تذكرون هاي اللعبه مال الليزر الي بيها اشكال .. اول ما اجه محد جان يعرفه ما اذكر منو نطاني وحده بيها وجه احمر شرير مبتسم(نفس هذا الفيس
بس على شكل شرير)
فاخذته ظليت اشغله واجرب بكل مكان مره من المرات كلت خل اجربه على الجيران اشوفهم شيسوون فاصعد على السياج وجانت عدنا شجره جبيره هم اتسلق عليها ليكول شاذي
المهم مره من المرات بالليل صعدت على السياج وجهت الليزر على الحايط الي كدام باب البيت الداخلي مال بيت ام كرار وظليت احركه بكل هدوء يمين ويسار فجاءة سمعت صوت جدر مادري شنو طاح بالكَاع وصحياح قوي ولك كرار طفيت الليزر وظليت اباوع صار هدوء
ثاني يوم هم صعدت وحطيته وهم وره شوي واجت ام كرار ولك كرار الحكلي
ابنهم كرار جان صديق الطفوله والدراسه بايام الطيبين فيجي لبيتنا نلعب سويه فكَالي هاي امي يمكن اتخبلت ما ادري شبيها كَلتله شبيها يكَلي تصيح عليه تكلي اشوف وجه يخوف على الحايط ومن تجي يختفي انوب حتى انا خوفتني بالليل ما اطلع بوقتها ياكاع انشكي وطميني بس لا اضحك كدامه وانكشف
يوم من الايام اجت ام كرار لبيتنا كلت ياستار شعدها جايه كعدت ويا امي تسولف طلعت سوالف عاديه فانا اجيت اجيبلها تظيافه وجان اسمعها تحجي ويا امي على سالفة الليزر تكلها خيه اندري هاي شنو انوب
انا جنت طالعه اخبز والكالج وجه على الحايط يخوف وانوب يتحرك ومضوي خيه ظليت اخاف انوب عبالي جني واصيح لكرار ويختفي ومايلحك يشوفه امي هم استغربت تكلها خيه خاف تتوهمين تكللها ما اتوهم اكثر من مره .. هواي حجن ما اذكر شنو سولفن بوقتها نسيت بس امي هم ظل ابالها الموضوع وظلت اتباوع على حيطان البيت
اجيت اسوي بامي دكه واحطه بس كلت لا انكشف خليني بس على ام كرار وجان يجي الليل وهم اصعد واحط الليزر واباوع المره ظلت تصيح كرار خايب كرار تعال بسرعه واجه كرار وظل يباوع منا ومناك بسرعه طفيت الليزر وطفرت من السياج خفت يشوفني وانجرحت ايدي ومن يومها تبت كلت لا يعرفون انا الي جاي اسوي هيج وفشله وين انطي وجهي
بعد ظميت الليزر وغلست على الموضوع ليومكم هذا
**************************************
سالفتي الثانيه ويا بيت ام هشام
هذول ناس متعجرفين وشايفين روحهم وعدهم خمس ولد الشارع كوه حاملهم ذول جانو يضوجون الجيران يكسرون الجرس او يدكونه بنص الليل ويشردون هواي عدهم تصرفات مو حلوه مره من المرات ابنهم باك الطوبه مالتي رحت دكيت الباب طلعلي هوه واخوه كلتله انا ادري انته اخذت الطوبه ترجعها لو اكول للناس عليكم انتم جاي تدكون الجرس وتشردون تره انا شفتكم واعرف كلشي جاي تسوونه ضربني راشدي ابنهم وظل يغلط عليه ورجعت لامي ابجي اخذتني امي وراحت لامهم كالتلها على ولدها شو هاي امهم ظلت تحجي وتصيح تدافع لولدها اخذت امي ورجعت للبيت لان امهم معيديه وام لسان وماتستحي اختفيت فتره من الشارع والي يسال عني من الجهال نكللهم راحت لبيت جدها فكلها عرفت انا مو بالمنطقه ورايحه لبيت جدي بس بوقتها جنت انفذ خطه للانتقام
جنت اراقب بيتهم من فوك السطح او من الباب هذول جانو يخلون الباب مفتوح دائما فشفت الطوبه يم الباب وماكو احد فتت لبيتهم اخذتها ورجعت لبيتنا سويتلي بيها فتحه صغيرة وترستها ماي مجاري
(و خيس وشغلات مو حلوه)
وخيطتها ورحت حطيتها ابيتهم بعد ما اعرف شصار بهاي السالفه اهم شي النتائج اكيد مو حلوه والمجرم مجهول هع
انوب ظليت بالليل هم ادك عليهم الجرس والبد ابيتنا
بيتهم كبال بيتنا وقريب كلش وجان بيتهم كرفان ما اعرف شنو حديد مادري شنو المهم ينسمع بيه كلشي فبالليل انا اشمر حجار فوك بيتهم ويصير صوت قوي يطلعون يباوعون مايشوفون احد وابوهم يصيح شلون واحد ماينام ولان انا بداخل بيتنا مايكدرون يتهموني لان انا على اساس ابيت جدي وهم بنيه مو مال هالسوالف (بس جنت مسترجله الصراحه سوالف ولد سوالف بنات مايهمني الي يعجبني اسويه اهم شي اوصل للي ابراسي
) زين منو يسويها قابل عدهم عداوه ويا غيري.. مثل مايكولون ضاعت الصكَله
وانوب ظليت اطلع بالمنطقه على اساس رجعت للبيت هذول ولدهم هم يدكون الجرس على بيت ام كرار فمره دكو جرس بيت ابو كرار طلع ابو كرار ماشاف احد فرحت كلتله عمو انا اعرف منو يدك جرسكم هذول ولد ابو هشام راقبهم وشوف والله الرجال لبد وره البيت وظل يراقب طلعو راحو يدكون الجرس ولزمهم وما اكلكم جلاليق ودفرات وراشديات:123: .. انا ارتاحيت مثل ما ابنهم ضربني راشدي هسه شبع كتل ردت اشمت بس خفت تكبر الشغله وهم وين اكدرلهم شو عشيره وانوب ولد وهم خليها بالسر احسن خوش طبخه ظليت اتعامل وياهم عادي ومن يلعبون بالمنطقه العب وياهم عادي حتى بعد انتقم منهم
انوب ظليت ادك جرسهم واوكف بالباب واغلس بنيه مو ولد فمحد يشك بيه اسوي هيج شغلات هع
فيسألوني اكلهم اكو ولد دكه وراح مناك وهمه يرحون يدورون وماكو مره من المرات ابوهم كلش ضاج كتلهم وكاللهم من وراكم تدكون جرس العالم هسه العالم تدك جرسنا فأنا كلش ارتاحيت
انوب بطلو بس يدكون جرس احد يشتكون عد ابوهم ويكتلهم صارو اوادم ومن وكتها انا هم صرت ادميه وبطلت بعد ماتسوه اكمل حقي اخذته واتعاقبو مثل ما ضربوني واخذو طوبتي وعليمن ازعج الناس عود شستفاد وعيب
صح شقاوجيه بس تره خوش بنيه
انتظروني بالجزء الرابع اذا الله خلانا عايشين ومتواجدين بالدرر ... وشقاوتي ويا جهال المنطقة والمدرسه
شنو انتي لخاطر ربج
رد مع اقتباس
