هنا

[أنثى حائرة]

السلام عليكم ورحمة الله وبركاته
فكرت كثيرا قبل الكتابة ولكن هل موضوع أتعبني جداولااكدر أكلم احد لان اني ببلاد الغربه ولا اكدر أتواصل ويه اهلي لان ممنوع عليه اني تزوجت قبل سنتين بعمر صغير لا يتجاوز ال١٨سنة وزوجي كان مقدم على لجوء وطلع بهل اثناء كنت لازم استقر وياه وسافرت وتركت دراستي وأهلي علموده بس هوه ما قدر هل شي بالبداية كانت حياتي بمنتهى الاستقرار والهدوء وابد ماكو مشاكل بعدين صار عندي بنت وراها تغيرت حياتي زوجي كام يمنعني من الطلعه من الموبايل حتى البرامج التلفزيونيه لدرجة شفر معظم القنوات وجبرني على متابعة الأشياء الي هوه يريدها اني ما ناقشته كلت من حقه وبعدنه بالبداية ويجوز غيره قليله بس وصل الامر يحاسبني على محادثاتي مع اهلي ويناقشني بالكلام ويغضب ويعوفوني اله لمن أنفذ الي يكوله وصل الى درجة منعني من اهلي تماما ميقبل احجي وياهم نهائيا وغير الشريحة مالتي مع العلم الشريحة دوليه هل شي تعبتي عزلني عن العالم الخارجي تماما واني طلبت منه ينطيني أسباب على الي كاعد يسوي لعل اكو سبب منطقي ويكولي انتي بعدج صغيره وفاهمه الدنيا غلط واني ماريدج تختلطين بأحد اني تعجبت كتله أهلي شنو اختلط كال هل موضوع ينسد واذا اسمعج تحجين بي بعد ميصير خير اني سديته بس بداخلي نار مشتاقه لاهلي وماعرف ليش قطعني عنهم لدرجة كمت اشوف اخبارهم بالخفية وحتى من يشوفني ابجي واباوع على صورهم لو يمسح الصور لو يمنعني من الموبايل وفكرت انفصل عنه بس اني بالغربة وماعرف احد ولا اعرف الأسباب الي كاعد تخلي يتصرف ويايه بهل طريقة مع العلم اهلي ناس محافظين جدا وما صار اي خلاف بينهم وبينه اني عمري حاليا ٢١وزوجي عمره٣٤سنه يدرس ماستر وتخصصه طبيب أطفال يعني وصلت لمرحله أتجنب الكلام وياه لان أحسه دمرني وعزلني اريد حل لان اني هسه شبه مقطوعة عن العالم الخارجي

[غصن الياس]

حبيبتي هذا النوع معقد نفسيا واعتقد هو مار بتجربة جعلت منه إنسان شكاك لدرجة الاحتكار يعني يريد يحتكر وجودج بالحياة ومشاعرج واهتمامج و ... بس اله هذا النوع صعب تتعاملين وياه واذا اكتشف تتصلين بأهلج من ورآه حيسويلج مشكلة وانتي وحدج بالغربة .. حاولي تتناقشين وياه بهدوء وتفهمي هاية صلة رحم وميجوز نقطعها وانتو بعيدين عنهم هو مجرد اتصال للاطمئنان ومثل أهو متواصل مع اهله مو من حقة يرحمج من اهلج وان شاء الله الله يهديه عليج ويفهم معاناتج

[ٱجَمل ٱنٌسًٱنٌة]

حبي الحل تتصلين بأهلج يشوفونلج حل وياه اذا تغير اتغير واذا لا ارجعي لاهلج وانفصلي عنه

[bnota]

هيج زوج يعجبني بالعكس مااشوف تصرفه غلط بالعكس هو يكون زوجي واهلي بنفس الوقت لو اني مكانج مااعترض اكول الحمدالله وثانيا انتي ترجعين لزوجج اهلج خطار عدهم ومايدومون الج ومااشوفه فد مشكله ولاتفكرين بالانفصال هجمان بيوت

[ملكةه]

يعني شي عادي واذا ماحجيت ويا اهلج
زوجج اهم من اهلج
وحافظي ع زوجج وخصوصا ابيناتكم طفله شنو ذنبهه لو تنفصلون
وماعتقد هذه مشكله
يجوز صاير شي من اهلج وانتي ماتعرفين ومايريد يكلج والله اعلم
حبي افضل لكم تعيشون وحدكم
ولا ادخلوا احد بمشاكلكم
محد يفيدج غير زوجج

[Narnia88]

لاجوهرة هذا مايصير هذولة اهلها برضاهم وبعقوقهم نار وجنة الزوج شيسويلها

[ملكةه]

لاجوهرة هذا مايصير هذولة اهلها برضاهم وبعقوقهم نار وجنة الزوج شيسويلها

صحيح كلامج لكن لابد يجي يوم والله يهدي القلوب مو تسرع واتكول انفصل خل شهر شهرين متخابرهم شيصير يعني اتموت لا والله ماتموت

[أُمنية]

أهلچ كل اسبوع او اسبوعين اتصلي عليهم
حافضي ع زوجچ وبنتچ ..لإن إذا انفصلتي عنة
شنو ذنب الطفلة ..شلون راح تعيش ..مع منو تعيش؟؟
وية امة ..لو ابوهة ..راح تدمر الطفلة ..قبل لا تتخذين أي
قررار فكري بيه شلون راح يكون مستقبلهة
انتي صغيرة وتعرفين نضرة المجتمع شلون تكون ع المطلقه وعدة طفله

[برائتي]

الله يهدي زوجك يارب ويحل مشاكلك آمين لكن اصبري عزيزتي ونفس الوقت
فتهمي منا ليش هذا التصرف الي يسوي لابد وجود سبب اذا هو ماستر وطبيب اطفال
يفهم هذا الأمر أكيد صلة الرحم واجب ويجب عليهِ ان لايبعد بنت عن أهلها وأكيد هو يدرك هذا الأمر
كلُّ امور يحل بالمناقشة والصبر وتيسير الأمور من الله لاتنفصلي أصبري وربي يسهلها ويحلها

[كاظم الذهب]

عزيزتي الغالية ...الغربة شي صعب والاصعب من الغربة هو الغريب في البلد الغريب ...هذه الحاله ...مرت بنت خالتي في كربلاء عمره 19 سنه معاونه طبيبة حبتله واحد معيدي متزوج سابقاً...واخذه وسافر الى المانيا ..كال اله راح اعيشج احسن حيات سعيدة ..بعدين الموازين اختلفت طلع كلب ابن كلب ..1- اول مرحل باع الذهب مالته بالقران الكريم . 2- ثانياً سحب الموبايل مالته وباعة لواحد عراقي بالمانيا 3- كام يبسطه بدون سبب ومنعه من اهله تماما وهي مصار اله شهر متزوجه من عنده كام يجتفه للصبح المهم وصلت المرحلة كام يطلعه بره الشقة بطرك الملابس ..حتى الغيره راحت منه تريد تعرف السبب ميخليهه تحجي ..حتى الاسير ميعاملو هيج ...ما اريد اطيل عليج الحجي القصة الطويلة المهم ........شنوه الحل والله نجى بنت خالتي من عنده ......جانت بره الشقة بليل مطلعه ميريده تنام جوه بالشقه ..وبالصدفة اجت مرة عراقية مهاجرة فكلتله ليش خاله طالعة بره ..حجتله القصة كله وهي تبجي ...المرة اتخبلت وطبت على زوجه هانته ورزلته رزالة ناشفة وكالتله انته ماعندك غيرة ...واجتهه ثاني يوم وبلغت الشرطه عليه لان المواطن هناك الدولة تتبناه عكس العراقين ...فطلبت المساعدة من شرطة الانتربول ان يرجعوه الى العراق وساعدته المرة وكالتله كليلهم هو خطفني من اهلي ...والحكومة الالمانية رجعته البلده العراق ..وهسة يم اهله وطلبت الطلاك من القاضي ..ورجعت الوضيفتة وعده ولد منه ومعززه ومكرمه ..هسه لو ينطيهه ملاين بعد ما ترجلعه ولا تغلط هاي الغلطة ... فارجو من عندج الاستعانة بالشرطة اوالسفاره اوصديق عراقي ...لان زوجج ميكدر سويليج شي هناك يشكون حلكة ويذبونة بالسجن ..هذا الحل الوحيد .. لان هسه انتي في مقبرة الاحياء ......عذرا لطول الكتابة لاني تكلمت بالعامية حتى توصلج الفكرة ...اتمنالج التوفيق والعوده الى اهلج سالمة ياربي ...اللهم ارجع كل غريب الى اهلة بحق هذا الشهر الحرام ...