باچر سجله بيدك كلمة الوفاية باچر إلا نسد عين الشمس بالراية
يا بو علي وسبعينك بالحومه قرة عينك
إلا نسد عين الشمس بالراية
إلا نسد عين الشمس بالراية

باچر على ارگاب الزلم يوصل نفر لخيامك
ونظر على السبعين الف نذبحه تحت اجدامك
بينه انتفض واغزي الارض انصارك وخدامك
صح الاخو حزام الظهر اسمح نصير احزامك
لاجلك .. بتلاثه طلگنه النسه و دنيانه
لأجلك .. نگلبها والزهرة اعلى ابن مرجانه
خلينه تحت ايمينك بالحومه قرة عينك
إلا نسد عين الشمس بالراية

يا بو علي جيش العدو مو كثرة من انعدهم
همه نعم سبعين الف بس كل وفه ما عدهم
احسبنه كل واحد بألف حتماً نصير بگدهم
قادتنه انته و الگمر همه الشمر قائدهم
حيدر لو صحنه والله انزلزل المعمورة
حيدر شبه الزلم باجر تذل مجبوره
جربنه مترجينك بالحومة قرة عينك
إلا نسد عين الشمس بالراية

يمته يطر فجر الحرب للملتقه اشتاگينه
جنه وحواري تنتظر يا مرحبا تنادينه
عفنه الاهل عفنه الوطن موت الشرف شارينه
من تدوي نيران الحرب انخانه و افرح بينه
عابس من يزعل و يجدح جمر بعيونه
عابس يمزگ قميصه ويعترف بجنونه
أمرنه منتظرينك بالحومه قرة عينك
إلا نسد عين الشمس بالراية

باچر اذا شفنه ابرهه بالحومه راكب فيله
احنه ابابيل السمه نمطر حجر سجّيله
تتراكض اخيول وزلم و الما ركض يا ويله
و اليدعي بيها يجي و الما يجي نمشيله
زفه لهفه حبيب و ينزف لمحبوبه
زفه وإنته اليحبك يشرق من غروبه
و اعيونك امكفينك بالحومه قرة عينك
إلا نسد عين الشمس بالراية

يا سيدي عدنه طلب چفك نريد نبوسه
ردنه نهوس بالفرح يم زينب المحروسه
بلغها يا ابن حيدرا بس يمها تحلى الهوسه
هوستنه وفايه نظل واليوصللها اندوسه
زينب يعرفنه حيدر و اخوتچ درّايه
زينب ماكو مثلنه اعلى الارض وفايه
وحسينچ اموصينه بالحومه قرة عينك
إلا نسد عين الشمس بالراية

جون و حبيب و عوسجه و برير و الهمداني
نافع وهب والشاكري انصاري والشيباني
باچر تسابق حيدري كلمن يگلك اني
و اليوگع اول ينتظر لمن يوصي الثاني
يوصي ها خوتي ها لحد يعوفه حسيني
يوصي گلولي إبشر حتى اغمض عيني
گولوا وفيت بدينَك بالحومه قرة عينك
إلا نسد عين الشمس بالراية

خل ينبني طف كربله دولة ضماير حره
باچر ملايين البشر تتنومس بهـــالثورة
عاشر محرم عالوعد كلمن يقدم نحره
و الما يكفيه اللطم رد اعلى راسه ايطبره
غاية من يلزم السيف وبده بتطبيره
غاية قصده يگلهم هذا دم الغيرة
بالحضرة منتظرينك بالحومه قرة عينك
إلا نسد عين الشمس بالراية

باچر مثل عابس تجي طف كربله احبابك
بيهم جنون الشاكري بيهم عشگ لترابك
كلمن يجي لابس چفن ويسجل اسمه اببابك
احنه بحضورك نوفي لك همه وفوا بغيابك
شيعة رايتنه عدهم هيه نفس الرايه
شيعة تطوي الصحاري وتوصلك مشاية
بالموزمه إمكفينك بالحومه قرة عينك
إلا نسد عين الشمس بالراية

السيد عبد الخالق المحنه