اكتب عذابي انتحابي اغترابي
ريح الصبا لمن يهب ياخذ كتابي
بعينك لو تراني و انه ميته بسيف بعدك
حيرني زماني جسمي عندي روحي عندك
بسم الله بسم الآه
من بعد التحيه و بالغ اجلالي
ابضرف الشوگ اكتب فوگ
الى حضرة جناب الوالد الغالي
اشكي الحال بالمرسال
ضل يگطر عتب ودموع مرسالي
العلة تزيد و انته بعيد
و بنار المفراك ذاب دلالي
شبه الي مغشي اعليه جفني بفركتك بات
لاني من الاحياء انحسب لاني من الأموات
بويه وحن عليه اعليك امشي الهادي جدك
رحت و تدري بيه جسمي عندي روحي عندك
عتبي اعليك منك ليك
يمن بالهيمه عايفلك غصن ريحان
ع المكتوب رد مكتوب
وي ريح الصبا لو وي نسيم البان
اصفج راح علي راح
خمس چلمات تشرح حالي بالهجران
دهري خان موتي هان
حزني بان عظمي لان يومي حان
بعيوني بحر من الدمع وبقلبي نيران
يا بوية مثلي هم شفت محترگ غرگان
يا ريتك شفتني حتى تدري اشلوني بعدك
بالمنزل عفتني جسمي عندي روحي عندك
يا قرآن بالأضعان
شايل ع الهوادج اية التطهير
يمتى اتعود ليه اردود
ليلي طويل عگبك وانا جفني گصير
قلبي صاح ما مرتاح
طمني عليكم ليش هالتأخير
من تسألون صحت إشلون
انا بخير ما دامك يبويه بخير
الطارش لمن يوصلكم و تاخذ كتابه
سلم على العباس عني بالنيابه
گله يبو فاضل يمته احط راسي إعلى زندك
عگبك دمعي هامل جسمي عندي روحي عندك
اگضي الليل بالياويل
رافجت الگمر و مسامرة النجمات
بموت النور ضلمة تدور
البگه براسك يبويه و كلشي عگبك مات
عفت النوم وانحب دوم
شبه طير العويدي من يجر ونات
تريد اشهود عندي و زود
صفرة لون وجهي ودمعي و الآهات
گتلي اذا أمري استقر يگطع نحيبچ
گتلي اوديلچ علي الأكبر يجيبچ
يـالطول رحيله واعدتني و اوينه وعدك
تدريني عليلة جسمي عندي روحي عندك
قلبي ارتاب ردت اجواب
عن موقف جرى بتفسيره ما أعلم
إبرايك شُور و بعاشور
ليش أم سلمة اعليه الجزع خيم
برهبه وخوف لنه تشوف
قارورة اللي بيها اتراب صارت دم
تصيح بصوت فات الفوت
ما ضن يا العليلة والدچ يسلم
شافت رسـول الله بحلم و امفرع الراس
واگف يشوف احسينه تحت الخيل ينداس
ايناديه بنحيبه جيتك احفر يبني لحدك
وانه بهـالمصيبه جسمي عندي روحي عندك
لا احتار گلي اشصار
اصدگ بالأمل لو صدگ الرؤيا
من بلواي تاه الراي
ما أدري ترد لو ما ترد ليه
بوية احسين راسك وين
صدگ فوگ الرمح و الشيبة مدميه
لو مچتول يعني انگول
زينب عالهزل ودوها مسبيه
لو عمتي راحت بالسبي و معصمها مچتوف
معناها كافلها وگع مگطوع الچفوف
چن صوت العقيلة يالگمر وفيته عهدك
وانا ع الهزيلة جسمي عندي روحي عندك
عندي اضنون مترجعون
هاجس خوف بيه بس صعب شرحه
و الغدروك لو ذبحوك
اضن عبدالله هم ما يسلم بذبحه
فوگ ارماح راسك لاح
راس الطفل كوه ثابت برمحه
تعلگ بيه خوفي اعليه
اقل هبة هوه تهز رمحه و تطيحه
كافي يبويه انتظر مرسول الضعون
انچان مترجعون گلي ما ترجعون
بوية بهالمقاله رد علي منتظره ردك
وتوقيع الرسالة جسمي عندي روحي عندك
اكتب عذابي
الميرزا : عادل اشكناني
الرادود : ملا باسم الكربلائي
ليلة ٣ محرم ١٤٣٨ هـ
طبعت بأنامل العبد المذنب علاء 3laa
رد مع اقتباس
