اليوم راح احجيلكم عن سالفتي ويا الشرطه والجيش (السالفه شوي طويله بس صدكو الي يقراها مايخسر راح يتونس بالاحداث المشوقه)
قبل فتره جان عدنا اربعينيه ورحنه حمله جماعيه انا واهلي وبيت جدي وبعض الاقارب من العشيره اخر يوم قبل لا نرجع جنت كاعده بالغرفه انا وامي واختي ضايجين ومالنا خلك الدنيا شوي واجه ابن خالتي الله يرحمها كال ها شو كاعدين كلها طلعت راحو يفترون بالسوك انتم هم اطلعو بس اليوم باجر راجعين غيرو جو شوي امي كالت مابيه حيل ومالي خلك افتر كالي اكلج شرايج نطلع للسوك ونفتر شوي هنا بالشوارع كلتله مالي خلك بعدين قنعوني هوه وامي وقررنا نروح اختي هم خطيه ضايجه اخذناها ويانا وياريت ما رحت وياهطيحني بسالفه وطلع منها
تجيكم الاحداث ....
قبل لا نطلع امي كالت مادام رايحين بدربكم اخذو هاي البطاله مال الماي اترسوهن باجر ورانا روحه واخذنا علاكه مال بطالة الماي صرنه مثل امهات القواطي
من دخلنا كالت امي ها ترستو البطاله كلنالها اي كالت شو اتأخرتو ابن خالتي كال جا غير انلاصت علينا واتورطنا واختي كالت انشلع كلبنا كالت ها خير شكو كاللها ابن خالتي خل دينا تسولفلج انا تعبان مابيه حيل عاد انا اتورطت شحجاني .. كالتلي احجي شصار
كلتلها احنه رحنه نترس ماي من هاي البرادات مال الشارع الي يم الامام بس المحلات كلها معزله والشارع ظلمه وجان بيه بس الجيش واحنه نمشي فلتت العلاكه من ايد اختي وطاحن البطاله وسون صوت والجيش ضل يباوع علينا لميناهن ومشينا ورحنه نترسهن واحنه كاعد نترس البطاله اجت علينا سيارة جيش وطبكت كالو هاي شجاي تسوون تهربون مخدرات وممنوعات شعدكم بهذا الليل هسه حتى ماكو محلات شسوون بهالوقت كلنالهم جاي نترس ماي كالو جذب هاي خدعه حتى تبعدون الشبهات وفتشو مالكو شي كالو لازم نفتشهم تفتيش دقيق فأجه الضابط باوع على ابن خالتي ومو امه متوفيه فما مزين ولحيته صايره مال وهابيهفاشر عليه الضابط وكاله هاي شنو شوفو لحيته هذا داعشي عاب هالخلقه .. اختي جانت لابسه نظارة طبيه كال شوفو هاي مسويه روحها عود عجوز ولابسه نظارات حتى تبعد الشبهه .. باوع عليه شاف ايدي بيها جروح كال هاي شوفوها ايديها كلها جروح هاي اظاهر ضاربيها وجابريها على هاي الشغله فكالي الضابط ابو شوارب بنتي اعترفي واحنه نساعدج لان انتي مبين اشتغلتي بالتهريب تحت العنف والتهديد كلتله لا مو صح احنه ابرياء ورفضت اعترف فكالو لازم ناخذهم نبيتهم يمنا بالمركز ونحقق وياهم بس اول شي لازم هسه نجيب كادر نسائي يفتش البنات وجابو وفتشونا وكلشي مالكو .. بعدين كالو لازم نجيب جلب بوليسي الحل الوحيد حتى يشم المخدرات والممنوعات وين واكو بالبطاله لو لا فجابو الجلب وشم البطاله ومالكه شي ابن خالتي عطش كالوله اشرب من البطل كال شنووو اشرب من بطل شامه جلب ويييييع .. كالو هسه لازم الجلب يشمكم اخاف ضامين المخدرات ههههه فاختي كالت لا شنو هالحجي شنو جلب انا اخاف (طبعا امي تسمع وميته ضحك وتكول هاي شنو وابن خالتي واختي هم خربانين من الضحك
) وعود انا من احجي لامي السالفه اقلد اصوات وحركات يعني مو سوالف عاديه اتخيلو شكل وصوت الضابط ابو شوارب
نكمللكم السالفه فالضابط ابو شوارب كال انتم وحدكم لو وياكم احد اهلكم وين مو حرام بعدكم صغار وشباب ليش ادمرون مستقبلكم بتجارة المممنوعات كلناله والله مامتاجرين وجاي نترس مايكال بابا احنه هالحجي مار علينا ومايمشي عبالكم نصدك دموع التماسيح والجذب مالكم
كال دلونا على اهلكم كلناله بالفندق وما نندله كال خابروهم كلناله تلفوناتنا بالفندق ماجبناها ويانا كال هاي شنو اضحكون علينا كال انتم منين كلناله من البصره كال هلا هلا جاين مناك لهنا حتى اتاجرون شلون جيل لوتي جيل اخر وكت اليوم اسجنكم انا اذا ماتعترفون (هنا امي راحت لبست عبايتها وكالت راح اروح احجي لخالتكم السالفه وجها صاير جنه طماطه من الضحك) وكوه لزمناها وضليت اكمل السالفه طبعا كلنا متنا من الضحك حتى انا راسي صار بيه صداع من كد ماضحكت نسينا الفتاحه ونسينا الموته ونسينا الدنيا كلها ضحكنا من كل كلبنا المهم نكمل السالفه طبعا ما راح احجيلكم اكثر لان هواي وكله نفس الشيبالاخير قررنا نحجي الصار للباقي فراح ابن خالتي جاب اخته وحجينالها وهم امي وهيه وابن خالتي ميتين ضحك انوب راح جاب اخته الثانيه وهم حجينالها ونفس الشي بالاخير كلتلهم اكلكم تره انتم جنتو ابرنامج صادوه وهاي الحجيته كله جذب وتسفيط من يمي
وكل شوي يسألوني عليج الله عود صدك الصار لو تجذبين خطيه مامتحملين الصدمه
من رجعنا ثاني يوم طبعا انقسمنا البقيه بقو رجعنا بس عائلتنا وابن خالي وعائلته وابن خالتي بالطريق وكفونا سيطره شفنا ضابط شواربه ضبه مال جتانا متت ضحك وابن خالتي واختي هم ضلو يضحكون
من وصلنا للبيت حجيت القصه لاخوي انا اتوقعت هسه يكشفنا ويكول وين اكو هيج حجي هاي شلكم بيها شو اتفاجئت بأخوي اندمج ويا الاحداث لا وانوب يكول عود ضدك تحجون يعني مصدك لحد ماحلفتله جذبومات من الضحك
فتعلمت من هالسالفه مالازم نجذب ونسوي مقالب ونمثل حتى لايضلون يشكون بينا
اسفه طولت عليكم ان شاء الله استمتعتو بالقراءة
انتظروني بسوالف وقصص جديده
رد مع اقتباس
المشاركة الأصلية كتبت بواسطة عاشقه امي
