تسيورة وكت
عبدالسادة العلي
تانيت يعصرني العشگ
ويفرز أحلامي العتيجه الدافيه
واتّنه يغرگني الحنين...
وفوگ بستان الأمل...
تمطر اغيومه العافيه
يا ريت ينزعنه الدمع...
وتگمّر انجوم الكحل...
وتفيض نهران المحبه الصافيه
لا و.. ووين يشربنه التعب...
وبكل محطات الوصل...
ضويات شوگك طافيه
آنه اجذف ابروج السهر...
ونته ترس شط النعاس...
اعيون عندك غافيه
كلما يدگ باب الحزن...
تتخيل اچفوف الفرح..
روحي أو تگوطر حافيه
بالك تصاوغني ابجرح...
سورة اجروحي البلگلب ما شافيه
كل شهگه بيّه إتغير إلك...
مهرة ربيع.. أمضمّره او متعافيه
روحي مثل خيط السمه..
إتسافر ابكل نسمة هوه...
تمطر ترافه.. او فاضيه
تاخذني بيدر مستحه...
وتردني إلك..
غفوة خيال...
ابكل مناجل ذكرياتك راضيه
لفني يمن حضنك دفو...
الدنيه تسيورة وكت...
ها يوم... ساعه.. او گاظيه
زتني ابمداراتك شمس...
ويّ رمشة إجفون الصبح...
سورة انجومك ماضيه...
يلي چنت شهگة فجر..
تغبش ابجنحان الضوه..
وجروح طيفي الماضيه....
يمته يرد بينه الوكت..
وتعشّب ابجرف النهار...
اسنين عمري الماضيه....
لا وين أجذف بالسهر...
وانته ترس شط النعاس..
اعيون عندك غافيه
أفيش...
غرگني الحنين
او فوگ بستان الامل...
مطرت اغيومه العافيه
تمطر اغيومه...
الـ .. ع .. ااا ... ف ... يه
ــــــــــــ
رد مع اقتباس
المشاركة الأصلية كتبت بواسطة ★ نِجمـٌــٍة شتـٍـٌــاء ★
