أبّني من جلّدي سِگيفة
لكل فقير بجوعة غافي..
وأُخذّ دمعي لكل يتيم
بعيني بير احزان صافي..
كون أصير لكل طفل
ضحكة ومراجيح وعوافي..
آني اتمنى احّترگ
وأحَرّگ سنيني
لكل گمر بالظلمة طافي..
ومدري ليش لكل
نعش تلهث جتافي!..
يمتة ملك الموت يوگّف
بالنجف ويصِيح
يمعودين كافي؟!..
عدنا شبان بطعم
برحي الجنوب
أنطوها لحّلوگ المنافي!..
وأمي مكسورة عمر
زَتّتْ ولدها
إعلى الجنابر حافي حافي..
لا تمس خاطر حجلها
ولاتحَرّمّها الهلاهل والجفافي..
أرسم بجرحي ملاعب للصغار..
وگعّد بگلبي العروس
العَرْسَت بغرفة أِجار..
وعالمدارس ..
روحي طشّرّها خضّار..
افرش عيوني حصيرة لكل فقير
وملجأ لكل شيلة خافت..
يلي ما شافت عيونك دم أبوك
عيوني دم أعظامة شافت..
يلي ما عايف بشر ما بُگت حلمه
وأمي بگبور النجف شبان عافت!..
وآني خايف
حيل خايف..
لا يمر يوم وأموت
وتندفن أحلام فقرة
إعلى الشفايف..
تندفن بية طوايف..
تندفن بية سوالف !..
حيل خايف
لا يمر يوم وأشوف
الدنيا تفتح كل حلگها
وتبّلع أطفال الصرايف..
رد مع اقتباس
