ليش ربي.،
ليش تخلق بيه شاعر..
ليش تخلق واحد بگلبه مشاعر..
ليش ما تخلقني صخره..
ليش ما تخلقني فوگ
شفاف كل بطران حسره..
ليش ما تخلقني غيمه..
وليش غيمه..
هواي غيمه ليش ما تخلقني گطره..
ليش ما تخلقني فراشه چبيره
وماتت إعلى اغصان شجره..
ليش ما تخلقني
ريشه وي الهوه المجنون طاير
ليش ما تخلقني آخر نظره
من عين الشهيد لعين ساتر
ليش شاعر؟
ياهو احمله ذنوب دمي..
ذنوب همي..
ذنوب كلشي البيه صاير
ذنوب كل سنين عمري الضاعت..
بصفنات دخان الجكاير..
ذنوب اول دمعه نزلت فوگ خدي
وكسرت بنص گلبي خاطر..
ليش ربي؟!
ليش تخلق هيج ناس وهيج ناس..
ليش تخلق ناس ما ترمش محنه؟
وناس ما تكدر تعيش
بكثر ما تحمل احساس..
ليش تخلق ناس تتنفس سعاده..
وناس حسرات المشاعر بيها
تطلع ويه حسرات الانفاس..
ابدي بيه من البدايه..
اخلق لهمي نهايه..
اخلق لوجهي توازن..
ماكو شي يربط ضحكتي
وأثر دمعاتي الهوايه..
ليش يا يا اجمل حمامه..
ليش تَيهت ولدك دروب السلامه..
آنه اريدك تخلق لكل واحد
بصدره حديقه يعيش بيها..
حتى لا يسمع الناس
وحتى ليجرحه حچيها..
وحتى لا يشعر بوحده..
تخلق لحبه حمامه..
يعيش حتى يشوف
طفله ونخله وانهار وخضار
وحتى لا يسمع..
بأسير وموتى وجروح ويتامى..
مدلي چفك ارد اعيش..
رايد اضحك من جديد..
مو مهم جروحي بيه..
المهم وياها منك خيط عيد..
المهم الگاك يمي
وما احسك يا ترف هلكد بعيد..
ما اريد تگلي بيدك..
الضحكه بيدي..
الدمعه بيدي
(واخلق من الدمعه فرحه)
ماكو بيدي..
آنه اريدك..
وكله بيدك..
الدمعه بيدك ..
الضحكه بيدك..
حتى هذا العيد عيدك..
ماكو شي بيدي فقط گطف الجكاره..
ربي اريد بصدري اسمعك..
مو فقط فوگ المناره..
ربي ختلني بمغاره..
ربي خايف خذني يمك..
دنيا كلها چفوف وآنه آخر جگاره..
دنيا مليانه تناقض..
گودني لدنيا جديده..
لدنيا ما تقبل تناسب..
لو مگابر لو هلاهل..
وهذا شي واضح بديهي
وابد ما يحتاج اعيده..
مد اديك وطلّع البسمه
الچبيره من المتاهات البعيده..
وخلي حد..
بين عين الطلقه وعيون القصيده..
صنّف الام التحبها بجرح واحد..
ماكو داعي لارمله وثگله وشهيده..
شلون عايف گلبي وحده..
وانت عگدة شفة الجرح بوريده..
ليش يا اترف قصيده؟
رد مع اقتباس
المشاركة الأصلية كتبت بواسطة *زينتي حجابي*
