سواد گلوبكم تيه ..
بياض گلوبنه وعداه ..
ببالغ الحزن والأسى ننقل لكم خبر وفاة الشاعرة البغدادية (وجدان عبد الاله النقيب) قبل قليل بعد صراع مع السرطان دام سنيناً ثقيلة عليها صارعتها بأبتسامتها الدائمة .. أنا لله وأنا اليه راجعون
=====================
قصة وجدان (رحمها الله ) كتبتها قبل 6 أشهر .
اني وجدان عبدالاله النقيب مواليد 1991 يسموني محاربة سرطان وشاعرة ، خليني احچيلكم عن المرض الي مچانت عندي جرأة قبل كم سنة انو اگول عنديا خوف من نظرة الشفقة الي ممكن اشوفها بعين الناس ، من سنة 2010واني اعاني من اعراض بسيطة مثل الضعف المفاجئ والالام بالظهر وصخونة الخ ..
ورة سنة ازدادت الاعراض جنت ما اقبل اراجع دكتور بس بالاخير استسلمت ورحت راجعت من 2011 انطوني كمية علاجات رهيبة لكل الامراض ومچانوا يعرفون شعندي ب 2012 سويت عملية وطلع عندي كانسر من نوع هودچكن اخذت اول كورس كيمياوي جنت فرحانة موگع شعري رجعت صحتي شوية احسن وبديت اشتغل لكن مشفيت وچان المرض منتشر وراها اخذت جرع قوية وگع شعري جنت مرعوبة من اول خصلة وگعت استحي من نفسي أگابل المراية وأبجي بالشغل يگلولي ليش رموشچ ماكو اگلهم ماسكارا موزينة استعملت ووگعت ،بعدين صفنت على روحي ليش خجلانه اني اقوى من كل الي ويايه عندي كانسر واشتغل وما اشكي ويحسدوني هلگد ما اضحك فمعناها اني اقوى من كل الموجودين ومعندي شي اخجل منه گمت اگلهم بيه كانسر كلش طبيعي خلصت الكورس وهم مطبت وهم اخذت كورس ثالث ورابع وخامس ومگمت اخجل من نفسي حبيت روحي واني "صلعة" بنهاية المطاف عرفت انو العلاجات بعد متفيد وياية وممكن اعيش اربع سنين بعلاجات "تصبيرة" ههه تخفف الالم وتوگفه فترة بس متعالجه اني اكتب شعر قررت انو لازم اسوي شي بما انو حالتي متسمحلي بالشغل المتعب بديت من 2015 اكتب مجموعة شعر شعبي اسمها (حجل وأحلام وطفولة) وكملتها وجان يوم 1/1/2016 حفل التوقيع وناوية اكمل واكتب اكثر وفعلاً احس روحي افضل رغم التعب اليومي الي اتعرضله والصخونة والسعال جداً سعيدة بانجازي البسيط وكل الاعرفهم او اغلبهم يگلولي انتٍ تنطينه شجاعة وقوة وهالشي جداً يسعدني الخلاصة عيش قوي لخاطر نفسك واهلك والي تحبهم ويحبوك ولتستلمون أبداً الدنيا لازم اطوعها الي بإرادتي
رد مع اقتباس
المشاركة الأصلية كتبت بواسطة *R.F.A*
