درر العراق

★ نـجـمــــة شـتـــــاء ★ · 15/September/2016

شوي القصة طويله راح احاول قدر الامكان اختصر

من جنت بالمتوسطه جانو يجون بيت خالتي فنلعب كولنا سوه جانت عدنا لعبه اسمها التجسس هاي تنلعب بالليل وبشرط نطفي كل الاضويه بالحديقه بحيث يصير ظلام حديقتنا جبيره كلش وبيها هواي زوايا واماكن مال واحد يلبد بيهن

بطل اللعبه شخص مكار وكوميدي بنفس الوقت اله شخصيتين ساعه مسكين وساعه يصير وحش بحيث الشخصيه المسكينه كوميديه هوه يمثلها حتى يخدع المقابل وينطيهم الامان ومن يأمنون بيه يبين على حقيقته ويقضي عليهم وها مهمه الباقي يجسسون عليه ويشردون منه فأنا جنت العب دور هذي الشخصيه مرات امثل على انو سكرانه ومرات امثل على ابو مجديه ومرات امثل على ابو رجال يتصل بشخص قريب عليه صديقه او اقاربه ويطلب منه شغله او فلوس همه من امثل هيج يطمنون ويتقربون مني وبس يصيرون قريبين انقض عليهم

فمره من المرات ضلو يراقبوني الا ان ضيعتهم دخلت للبيت شافو النعال يم الباب اطمنو انا داخل البيت فضلو هناك ينتظرون بهذي الاثناء طفرت من الجهه الخلفيه من الشباك ربطت خيوط مجهزتهن قبل لا نبدا اللعب من طرفين الطريق وانوب رجعت الهم وركضت وراهم وصلو للمكان ويركضون بسرعتهم ويوصلون للممر ابو الخيوط هذا الي عثر وطاح وهذا الي انردم وماكدر يكمل حجزته الخيوط وضلو يصرخون هذا شنو شو ماكو شي يبين (طبعا الخيوط جانت ناعمه حيل بس قويه ولان ظلمه ماتبين ابد) بعدين عرفو خيوط انوب تركتهم وهم رجعت دخلت للبيت وغيرت ملابسي للون الترابي ولبست شفقه ترابيه هم حتى اغطي شعري وماينكشف لان شنو اللون الترابي مايبين بالظلمه واصير حالي حال الحايط ومرات اصلا ماينشاف ابد فضليت اتقرب منهم واوكف على الحايط واطلع اصوات مرعبه فهمه يلتفتون على الجهه الي انا بيها مايشوفوني فضلو حايرين ومره من المرات لكيت اثنين بمكان واحد مجمعين ويراقبون نزعت نعالي حتى لايطلع صوت المشي واتقربت منهم وسطرت بنت خالتي راشدي فدارت على اختي ولعبت بيها لعب عبالها هيه السطرتها وهيه تحلف ومايفيد لان باوعو ماشافو شي انا لبدت على الحايط بعد ما ابين

وازاعلن وكل وحده راحت بطريق .. (من خلصنا اللعبه كلتلهم السالفه مال الراشدي

)
جان عدنا بيت دجاج رحت اخذت دجاجه سوده ولبدت بزاويه فهمه اجو يركضون بأتجاه الزاويه بس وصلو طيرت الدجاجه بأتجاهم مع اصوات الدجاجه بقبق بق بق

وصار صريخهم ماله والي ماجانو متوقعين الحركه ابد

انوب رحت لبدت جوه السياره بدون مايدرون عود اجو يلبدون مني فدارو وره السيارة مايدرون انا لابده جواها فلزمت رجليهم وخليتهم يطافرون ويصرخون

ومره نزلت على التلفون صوت وحش مرعب كلش وخليته نغمة رنين وخليت التلفون بمكان من اماكنهم الي يلبدون بيها بس ضميته بحيث مايشوفونه فجنت اراقبهم من وصلو للمكان اخذت تلفون الوالد واتصلت على التلفون الثاني ودك ودكت كلوبهم رعب رعب وياه هم صار صريخهم وطشارهم بفلس ..
نجي لاقوى مقلب هذا المقلب خرافي ومرعب بشكل

هم دخلت للبيت واوهمتهم انا داخل من خلال ترك نعالي يم الباب ورحت اتنكرت جان عدنا قناع مال رعب هذا

لبسته ولبست عبايه واخذت سجينه وحطيت بيها صبغ احمر وطفرت من الشباك ورحتلهم من الجهه الثانيه ضليت اطلع اصوات بحيث الفت انتباهم للجهة الي راح اجي منها فهمه كالو هاي شنو ولكم اجت مناك فضلو يباوعون وطلعتلهم انا بقناعي وعبايتي وسجينتي الي كلها صبغ احمر جنه دم واسويلهم وااااااااااع بصوت مرعب

انسحنت روحهم ولا واحد كدر يتحرك

بنت خالتي تقريبا جانت بالخامس ابتدائي هاي خطيه فصلت لا حس ولا نفس من اتقربت منهم رأسا ضلت تبجي وتصرخ بس ماتكدر تشرد رجليها يبسن

انا رأسا نزعت القناع وكلتلهم شبيكم هاي انا ما اكوللكم كم دفره وكم راشدي وكم حمسه وكم جلده بالصونده اكلت منهم بس من كد ماضليت اضحك حتى ماكدرت ادافع عن نفسي ضليت ابجي بجي من الضحك وهمه همين

ثاني يوم سويت سالفه اكبر منها واكثر رعب

بس بنت خالتي كلتلها ماتلعبين انتي تخافين وتضلين تبجين فأصرت وكالت انا عرفت كلشي يصير بسببج بعد ما اخاف كلتلها وكلت للكل انا موافقه بس ما اتحمل المسؤوليه اي واحد يخاف لايلعب

فهالمره كلت سالفة التنكر عرفوها فهالمره خيطت القناع على العباية وحطيت حبل من السطح للحايط وعلكت القناع والعبايه بيه بحيث بس افلت الحبل ينزل القناع طاير بالجو

فهمه اجو يمشون وطبعا انا راويتهم مكاني حتى كلش الوحش الي يطير مالي اي علاقه بيه يعني وحش صدكي

فهمه بس وصلو للموقع المحدد فلتت الحبل ونزل الوحش بالحبل طاير بالسما وضليت اسوي اصوات وحوش ما اسولفلكم موقفهم شون جان انتم من يمكم اتخيلو

نتائج هاي القصة شوفو شصار بسبب هاي المقالب:

بعد هذا كله وبعد ماعرفو بمقالبي وشبعت كتل منهم ومتت من الضحك
خلصنا لعب ودخلنا للبيت انام الكل نام فزيت على صوت بجي باوعت كلهم نايمين بعدين شفت بنت خالتي تبجي بفراشها كلتلها شبيج يمعوده كالت مابيه شي وبعد الحاح طويل كالتلي خايفه فأنا جبت فراشها يمي وحطيتها بحظني ولزمت ايدها وطمنتها وضليت اسولفلها اشياء حلوه لحد مانامت كعدت الصبح انا رحت ويا ابوي رجعت الظهر بوقت الصلاة بدلت ورحت عود اصلي كالولي وين تصلين روحي اسبحي وانوب تعاي صلي كلتلهم ليش كالو بنت خالتج مسويتها عليج ومتلفه فراشج وفراشها وغسلناهن وعود اشطفي ملابسج هم بالطريق

يمصبتي السوده ما اكولكلم شصار بيه ضليت اسب بروحي نعله على يومي ونعله على الي يلعبكم هوه انا صوجي هوه انتم الجبناء مال واحد يلعبكم بس انا غبيه وانا ثوله وانا كلشي ما افتهم وبعد اكص ايدي اذا لعبتكم هاي اللعبه