درر العراق

★ نـجـمــــة شـتـــــاء ★ · 11/September/2016

من جنت طفله بالابتدائيه بصف اول او ثاني ما اذكر بالضبط جنت العب كرة قدم بالشارع ويا بنات وشباب المنطقة الي اكبر مني بكم سنه

برغم صغر سني بس جان لاسمي قيمه بينهم خصوصا بكرة القدم والركض يوم من الايام جنه نلعب كرة قدم فريقين طبعا قبل الفرق مختلطه فشباب وبنات لعب فريق الدور الي ساكنين بيها وفريق الدور الثانيه بنص اللعبه واحد من ولد فريقنا شات الطوبه بكل قوته واجت بنص وجهي

حسيت عبوة وطكَت بوجهي

ضل خشمي ينزف وضليت ابجي وكفو اللعبه وكعدو يسكتون بيه ومايفيد اشترولي حلويات وما قبلت بيهن وماسكتت اخر شي كلتلهم مزاعلتكم بعد ولا احجي وياكم وما العب وياكم

ورحت اشتكي لبابا عليهم

فأثنين شباب وبنيه من فريقنا اجو وراي لكَوني اشتكي لبابا فعرف الولد مو بقصده حاول يسكتني ويرجعني وياهم ماقبلت كاللهم روحو انتم خلوها , ثاني يوم اجو انا جنت بالباب شفتهم عود سويت نفسي زعلانه دخلت وسديت الباب همه ضلو يصيحون يله دنو يله راح نلعب بعدج زعلانه يله مو راضيناج كلتلهم من وره السياج روحو بعد ولا العب وياكم هاهيه ضلو يصرخون علمود اطلع سمع بابا الهوسه كَال هاي شنو كلتله الفريق اجو وانا ما اريد اروح العب وياهم كَالي لو تسكتينهم لو تروحين وياهم وتفضيها شنو هالهوسه هاي رحت كَلتلهم هسه شون ماتسكتون كَالو لا لو تروحين ويانا لو نبقى نهوس كَلتلهم يعني مابيها مجال انا ما اريد العب وياكم بعد هاهيه انتهت (اليسمعني يكول جايتها عروض من برشلونه

) فهمه بقو يم السياج ويصيحون كلتلهم خوش بكيفكم رحت جبت سطل صعدت على السياج وجبت الصونده وترست السطل همه واكفين وره السياج كلبت السطل عليهم وانوب زكَيتهم بالصونده وضلو يطافرون

خلو وشردو , اليوم الي بعده رحت للمدرسه الصبح همه جانو بصف خامس ابتدائي وياي بنفس المدرسه بالدرس الاخير اجت بنيه من صفنا كالت دينا المعلمه تريدج تنطيج كتب روحي للمخزن مال الكتب رحت دخلت ماكو احد بس دخلت انسد الباب طلعو شنو متفقين همه وهاي البنيه حتى ينتقمون مني على الي سويته بيهم صارت حله محد يدري انا بالمخزن المخزن جان بنهاية المدرسه فمحد يوصل يمه الكل طلع بقيت وحدي محبوسه بالمخزن خفت اجيت ابجي انوب شفت شباك المخزن مامقفول يعني اكدر افتحه فسطرت كم كتاب وصعدت عليهن وطفرت من الشباك رحت ردت اطلع لكَيت الباب مقفول طبعا جان الدوام الثاني مال المتوسطه شسويت ماكلت للحارس رحت للمديرة وحجيتلها السالفه دزتني بيد بنيه وصلتني لاهلي لكَيت اهلي رايحين لبيت معلمتي يسألون عليه لان اتاخرت كَلتلهم السالفه وراح ابوي رزلهم واهلهم سمعو بالسالفه وكتلوهم انوب المديره مال المتوسطه كالت لمديرة مدرستي فبسطتهم وفصلتهم يومين
ومن بعد هاي السالفه لا انا احجي وياهم ولا همه يتقربون مني صارت شون العداوة

لحد ماكبرنا ودخلت المتوسطه وكعدت للبيت يله انسدت سالفة العداوة بيني وبينهم

اتعلمت من هاي السالفه انو الولد مرات يصيرون مساكين يتنازلون عن حقهم او الحق يرجع عليهم اذا ضرو بنيه حتى لو البنيه اساس المصايب

انتظروني بالجزء الثاني وشقاوتي ويا اهلي هالمره