يالمسافر
على عيونك درب شوكَ وحمامة
على شفافك ورد يزهي ابتسامة
على خدودك غفت شامة ويتامة
يل مسافر ترد النة بسلامة
يا مهدينة الصبر من غبشة صاحي
انتظرك ضوة يفزز صباحي
على صدر الفجر ناشر وشاحي
طير وغربتك كسرت جناحي
تروح وتسافر واعيش بعذابك
يا غالي دخيلك اموت بغيابك
انتة بية وحبك قدر وانت بية
انة ضامي ووجهك نهر وانت بية
انة صحرا واسمك مطر وانت بية
انة عش وجفك شجر وانت بية
يسهرون اليحبونك اثاري
يتانونك نهر عاشكَ كناري
يقدمولك نواظرهم جواري
يا جنة الله ورموشك حواري
═══════════
ترافكَني حلم ساحر خيالي
عليك من الصبح مشغول بالي
عنك يا مطر دايم سؤالي
بغيابك سأل حالي على حالي
توضيتك شمس صلت نهاري
عشت صابر مثل صبر الغفاري
اسأل عنك طيور البراري
من حقي واظن ترضى اعتذاري
ادور واناشد واحير بغيابك
اودي الرسايل واتاني جوابك
مالة ثاني حبك ابد مالة ثاني
يلي اسمك طعم الشهد مالة ثاني
يل كلامك كلمة ووعد مالة ثاني
بية شوكَك بعد وبعد مالة ثاني
تلاكَيني طفل شايل وسادة
يسولفلي قصص عن السعادة
يامن شلتك حرز من الولادة
على جفوفي انكتب يومك معادة
═══════════
انغسل وجه الصبح واني اتاني
وعذال العشكَ كَالوا نساني
وانت الما غبت عني ثواني
محد شافنة بس انتة واني
تلكَيتك نبي وجاي بسفينة
طشيتك فرح لاهل المدينة
يامن جيت جية نبينة
مثل بدره طلع بدرك علينة
تانيتك تجيني وارميهة الرسايل
وبجيتك يا غالي اقهرهة العواذل
يمتة اشوفك جيتك بدر يمتة اشوفك
ارد اشبكَك واشتم عطر يمتة اشوفك
والله بعدك خنجر غدر يمتة اشوفك
صبري مل من كلمة صبر يمتة اشوفك
خلص وكت الهجر كافي الملامة
حل وكت السهر محلى كلامة
طلع بدر الفجر تم بتمامة
ويالمسافر رجعت النة بسلامة
═══════════
يالمسافر
♬من البوم غرامك شهد♬
كلمات الشاعر - صفاء الدفاعي
الحان علي الدلفي
═══════════
رد مع اقتباس
المشاركة الأصلية كتبت بواسطة همس الحنان
