جوع الدموع...! شعر: احمد خالد العقابي
الدمعه لو رادتْ تسافرْ...
تاخذ الها امتاع وياها دموعْ
خافنْ الدمعه تجوعْ
وآنه عمري بالدمع جوعْ اعلى جوعْ...!
والشموعْ...،
الما تزف دمعاتها شهكًة قصايد
ينذبح موّالها ابسيفْ الشموعْ...!
الجمره بالحبْ ماهيْ جمره
كونْ ما تقرا حزنها
وما تسولفْ مستحاها
اعلى الضلوعْ....!
والصلاه..،
الصلاه
الما تترجمْ لجمة المجروح كًلبه
باهته...
ومحرابها ما بيه خشوعْ....!
او شمسْ الله
كونْ ما تبجي ضواها
الظلام ايهيجْ جيشه
او تنكسر راياتها ابجفْ الطلوعْ...!
والصهيلْ الما يلمْ أحزان روحه
دمعه دمعه...،
الخيلْ ماتعشكً نغمته
وما تدوَنه أقلام حافرْ بالربوعْ...!
والضروعْ...،
كونْ ما ينزلْ دمعها
قطره قطره..،
تيبسْ احروفْ الأطفالْ
ومنهو يقراها الضروعْ...؟!
هيجي علَّمني الشعر
ابنص دمعتي
أبجي وأقرا اكتابْ كاتبته الدموعْ....!
رد مع اقتباس
المشاركة الأصلية كتبت بواسطة ضياء الصافي
