كان ياماكان في قديم الزمان ......
كان ياماكان في قديم الزمان ملك يحب القصص والسوالف ومثل ماتدرون بذاك الوكت لاأكو انترنيت ولا فضائيات ولاحتى راديو حتى يسمع بي سالفه لوقصه. المهم صاحبنه ماخلّه سالفه ماسمعهه وبيوم من الايام گعد من الصبح وگال اريد سالفه الماتخلص الوزراء والحبربش اللي حواليَّ اتعجبوا !! مولاي عَدِلْ بَدِل گول غيرها ... مولاي تره ماكو سالفه ماتخلص گاللهم أبد هسه تعلنون بالمملكه وبكل الولايات اللي يحچيلي سالفه ماتخلص أزوجه بنتي وأخلي وزيري الاول واذا سالفته تخلص بدون ماآني أأمر وأگله كافي آخذ راسه .. انتشر الخبر بين الولايات واجت الوادم عالملك كلمن عنده سالفه طويله يحچيهه ويسولفهه بلكي الملك يمل ويگول كافي . ماأطول السالفه عليكم حديقة الملك انترست روس كل اليجي ينگطع راسه لان سالفته لازم تخلص وخيّم عالولايه حزن وهدوء وبطلت الوادم من هاي السالفه الى ان فد يوم إجه شخص غريب طب الولايه ومبين عليّ الفگر والضيم والقهر وسأل وين قصر الملك يابه وين ليش شتريد منين انت ؟ گال أريد الملك وآني عندي السالفه الماتخلص الناس انقهروا عليّ وگالوله تره ياخذ راسك گاللهم أبد المهم طب القصر وقابل الملك وسمع من الملك الشروط وقبل بيهن وبده يسولف ...
وگال للملك مولاي آني يوميه أگعد من الصبح أصلي وأتريّگ ونام ومن يصير الظهر أگعد من النوم أصلي واتغده ونام و لُمن يصير الليل أگعد أصلي وتعشه ونام . وثاني يوم مولاي اگعد الصبح أصلي وتريگ ونام و الظهر أكعد أصلي وتغده وارجع انام وبالليل أکعد أصلي وتعَشّه وانام .... وظل على هاي الحاله يومين يسولف والملك ابو ابوه مسموط ويگله کَمِلْ وهوه يستلم الملك أگعد الصبح أصلي اتريّگ انام يصير الظهر أصلي أتغده أنام يجي الليل أصلي اتعشه انام أكعد ثاني يوم اصلي اتريگ انام وظل الملك محتار وصاحبنه مستلمه من الصبح لليل اتريگ أتغده أتعشه أنام والملك فاك حلگه حايّر شيحچي وشيگول الى أن طگت روحه بثالث يوم مدري الرابع وصاح كاااااااااااااااافي ولك منين جبتلي هالطرگاعه السوده الماتخلص لعنة الله عليك وعلى والديك ...هسه يااخوان احنه سالفتنه هم صارت السالفه الماتخلص صار 13 سنه نگعد الصبح نتريگ وصار انفجار للظهر طگت عبوه بالليل أحترگت مستشفى ثاني يوم الصبح طگت سياره للظهر اتعاركو الحراميه بالبرلمان ثاني يوم صار انفجار وعلى هالرنه طحينچ ناعم ومثل ماگال صاحبنه لعنة الله عليكم وعلى والديكم منين جبتونّه هالطرگاعه السوده من سوّد الله وجوهكم
مدري عليمن جبناها ،،،!!!؟؟؟
==================================
رد مع اقتباس
المشاركة الأصلية كتبت بواسطة أمير الأحزان
شكرا لمرورك العطر
