ابوذيات للشاعر نبيل الحمزاوي
حبيبي اسمك وشم بالكلب دكيت
وتدري لخاطرك جم باب دكيت
شعجب وياي دكة نذل دكيت
ربيتك وتالي تكص اديه
............
غصب شتلوج بكليبي يدايه
وحسافه بدمي يتحنن يدايه
يريتج سم رضعتيني يدايه
وموتن لا غرام ولا اذيه
...............
الكلب ماشاف منك ماتمنى
وفرحنه الجان عامر ماتم ألنه
ذبحتنه ورحت تنصب ماتم ألنه
ويديك ملطخه بدم الضحيه
................
عداوه وياي عكب العشك شديت
ومثل شدة القايش علي شديت
عليكم راية العباس شديت
ولابد ماتبين حوبه أليه
..............
محبتك كدرتني كدار كدها
وعمت روحي وهواك بليل كدها
أزامط بيك حسبالي أنت كدها
عفتني والهوى ذبني بهبيه
رد مع اقتباس