چي تعرف دليلي وياك ماقصر
عفتني بدرب طوله اسنين جدم ابليس بي يعثر ..
وانه بطبعي حنين وياك
اتحزم بدهلة شوف لو تتهندم بعنبر !
وانه بطبعي حنين وياك
خلگي اينسم اعذيبي اذا خلگك بيوم احتر ..
تحن ياريت
انه محَني الچفوف بغيبتك بدموع وانته ولاعليه بيوم شو حنيت
من فرگاك
بروحي اتنام كل ضحكه وفقط طاري اليغثني ايفز
الليل عنودي وشما شاف بشفافي عثگ چلمات
يتشلبه عليهه ويظل بيهه ايهز
واذن الليل صحره وخاف الهه من ارد اسولف چلمتي اتغرز
عگب ما أيست وياك هذا الصار شيعگبه
ادور بلكي شي موجود اچلب بي
والغرگان لو أيس يجر اردان اي گصبه
ضوه وما وجديتك جاي .. انه متانيك
بيك الشوف يترس راد ماعونه
وتدري المايوچد الضوه
الحسره اتضوي بعيونه
انه متانيك
لفلفني بسوالف خوش واظفرني بحريرك صوف
افتهم چلماتي فدوه شبيك اذن الماي تفهم بس حچي المشحوف
ولا تصفن بوجه اجفاي
التصفن عينه ومأيسه نقص عنده حنان طيوف
شد حيلي علمودي شبيك واشبچني على اديك چفوف
صرت بچفاك اظفر واهسي بحسرات واعصرهه على شفتي الاوف
بّلل واهسي بملگاك
اليظفر واهسه بحسرات تطلع وي حسرته زلوف
وانه ادريك اعمه وياي
الاعمى الصفنه عنده اصغاء وبعين الصواب يشوف
اليحب بالنهر ماينقاس
النهر لو فارگ جروفه يسولف ماي سالفة النهر روجه
اليحب لو فارگ المحبوب سالفت اليحب عوجه
يالعاصر بهجرك گلب تنگط بقت دگاته
تره الماشاف وجه المحب لشكم يوم تصبح سحت نظراته
المفارگ تره مايحجي اخرس شوك
بس بعيونه تقره الناس چلماته
جبينك مايه ميت ليش تلزم كصتة العده التموت بوجهه گطراته
وانه وجهي بغيابك مات ماتدريبهه شمالك الوجهه يموت تتيتم امراياته
رد مع اقتباس
المشاركة الأصلية كتبت بواسطة حنين الفهداوي
