مهند العزاوي
ما شايف كمر بسماي
ربيت الصفار بوجهي وبمكفاي
كدامي الشمس والشجرة صارت خيط
وانا وحدي بجزيرة
منين اجيب فياي
صار هوي امدد عل جرف سكران
اريد انسى الحبيب انباكـّ
اغمض واحلم ابموزين
افز ومن جديد اشتاكـّ
كافي فراكـ
كافي فراك يا لذة حلات التين من ينضاكـ
كافي فراكـ يا اخر دقيقة بموعد العشاكـ
احجي وعاند ابفيروز علمهة البلابل يا لحن التغريد
بعد لا تنتضر رمضان
بس اشرلي بيدك راح اجيب العيد
واعزفلك فرح عل ناي
صار هواي
عايش عيشة الصبير ما بين العطش والماي
الخيال كبالي من يصير اكوم اتعثر ابممشاي
يلمفارك حنينك زاد
اسمعني وبدون اعناد
مو شغلة ردن وزنود
خلقلك ايد حتى تكّود
ربك ما يبارك بيد ما تنكاد
مشيت وصار هجرك سالفة صوبين
تعال وخل اغور بيك حور العين
عشكّك مال اهلنة ربات خبز الطين
وسواليفك ملح دنياي صار هواي
موضوعك كّبالي من الهجر يبدو
انا بلياك شايب ولدة ما يردو
عصرت جفوني بعدك دمعة ما خليت
عانس والجٍناين تارسات البيت
الهوة اليعبر عليهة تكول بي مشاي
صار هواي ما مسترسل بطرواك
يا صوت الترافة العبر ذاك الصوب
يا جنة عدن ما بيك ريحة عيب
جيتك تعدل الميزان
مايرضى بحديقة الفاركـ البستان
ارسمك واحسد الطبشور
واتلعثم خجل واندار
وامسح كل معاني الشيب
واجيك بروح مال صغار
مافكرت ابوسك عيب هاي البوسة مال كبار
ادلل عليمن وانتة ما موجود
انا بلياك فارش مستحاي بساط
ومفرفح واتاني تعود
تعال الحكّلي غيرك دندل العنكّود
اعارك مشتهاي ابيش
عفتي بطركـ كلمة ليش
انا بلياك ما مستطعم بنعمة
دليل متيه النجمة
الاعمى من الصغر ميشيل هم الشوف
بس شلون حال الشايف ويعمة
يلبوجهك برائة تنرفز العصفور
ماخذ جم ربيع وياك
مرني وكزبر النسمةاريد الكاك واكشخ بيك
يا مي الورد يا هيل
فراكك بالنهار يهون
بس شلون اخلص الليل
اذا مامش كمر بسماي
صار هواي
رد مع اقتباس
