أدواره
أدواره يتبده الشمع
بين جيات الكَبل
البيه يتلفت حزن فيّ الستاير
جي دريت مؤونة الشباج موكلها ستر
جي دريت بجات الوادم تعز الله اعله ليله
شما ثكَل طيفك يمر
جي دريت
جي دريت برجفة السنبل بريد اوداع كل روحة فجر
شكثر وين
شكثر وين تفرهدت بالمايجون
وآنا اكت اعله النفس شيبة شتل
ماضكَت هندس غريب بحجة عيوني حلال
ومن زمان
من زمان اليبيس بالهوى بروحه نزل
الشاهد الله الچول عاهر لو عزل للصفنه ماي
وصفنة الماكو عذر
وهاي كلها خيروني المالهم عفيه بحزنهم
ابين اشد اوزار ديرة من الرماد
وبين اظل حسرة تمايم لو زهكَـ بيها طفل
هيه هاي
هيه هاي الدنيا ركضة تايهين
تلكَه بيها الموت ماصاح القطار غير عبريتك بخور وآلمين
تلكَه بيها تراب يتغنى اعله فدعه بطور ماجايسله عين
وتلكَه بيها العوز كآس وينشرب بـ الله كريم
***********************
شلون
شلون ماراوس كَناطر جفي بجيوب الكَمر أضحك خساره
شلون ما الكَي النجم ريحة جرس لباب أندم الدكَه مافضت بكائه
***********************
وأهدنت روحي
وأهدنت روحي وكَلت بيه كَصب
كلها صارت هور ومربيه الشلب
وشجرة الغار التوجدني اعله طولي تفرهدت مني
بحجي ولاية حطب
جان ظني الليل فصليه لحسبتي
دوم اشوف احلامي طفله بعمري تلعب
ومادريت
الطين مكروه اعله صغره
ومن يشب تنور ينحب
*****************
ليش ماراضي اعله حسنك
شو كذلتك جنها توبة واحد يصلي اعله متنك
شو مشيتك جنها سبحانك ياللهي وهيه ظنك
وشو رفكَتك
وشو رفكَتك رفكَت بكل شي انعمالله وفضل منك
فضل منك
فضل منك اشتهيك
وفضل منك عيني دفان ودفن شوفك وراه
وراد يسكت صاحي ضحكه ومحد مسودن بجاه
ياهو كَال الليل مانعرف غطاه
وياهو كَال العشكَـ عند اهل الحرام
يراوس اللهفه بصلاه
كلشي ينحب بالحلال
الطير ينحب بالحلال
الكَاع تنحب بالحلال
المطر ينحب بالحلال
المطر لو صار حنة فايضين ردود ينحب بالحلال
وآنا بين زواكَـ دنيا
وبين بس اهذي بـ يمدري
ضحكة الشباج هويه
محسبلها ودكَة الباب اشترتني وصافنلها
كل بخور يمرني استاحش عباتك
كل زوايا الدين لو صاحتلي توب اكفر اشتاكَـ لصلاتك
ايّ يمدري
ايّ يمدري
انت رازونه الجنه المنها اشوف الخمر كله
ومنها اشوف الشمس عدمن نايمه
ومنها اشوف خصرك برمضانه يلعب
وآنا وين بيه فقره وصايمه
رد مع اقتباس
المشاركة الأصلية كتبت بواسطة Bird Seagull
