الميت لاربعينه عليه تحزن ناس
حاولت اقتنع بس روحي ما قنعت
كلي شلون اعيد كلي بله شلون
وسبعه حيدر لهساهه ما طلعت
من ضربوا علينا وطاح بلمحراب
صح طاح الجبل بس ضلت سفوحه
وشفنا هناك موقف لمن يشيعون
شفنا احنه الامير يشيع بروحه
علي يهز الارض بلحرب لو بس صاح
بس لمن يناجي النبره مبحوحه
علي الكعبه امه وهذا شي معروف
باوع علمصيبه العدنا مطروحه
كل ام تنجرح لو بس ابنها انصاب
وتخيل الصوره الكعبه مجروحه
بيت الله انجرح شيتاني رب الكون
واضن اعرف سبب خلاه ما يحجي
كالوا غيمه مطرت من علينا انصاب
عزرائيل جان اعله الجرح يبجي
ومن طاح الولي وتوسد المحراب
مد ايده اعله جرحه اتلمس شكبره
شاف الماضي كله الحاضر ويه الجاي
مو حجم الجرح بس موضع الطبره
باوع باب فوك اعله الجرح مطبوك
فك الباب بيده وشاهد الزهره
وجابوا للجرح الابره عود تروف
وتدرون بعلي شتخيل الابره
تخيلها رمح وصاح يا عباس
علي يدري برمحهم يضرب الكمره
باوع علجرح والصفنه ماتت بي
بقه يفكر علينا وحاير بامره
تخيلها الطفوف وهوه ما موجود
وشاف حسين لم ينكطع نحره
يبو الفقره الفقره تنادي وينك دوم
بعدك يبو الفقره شحالهه الفقره
صح العيد اجه والفطره اجت وياه
كالوا من اجت نقصانه هلفطره
شمروها ونفوها وما خذوها اليوم
كالوا شلنا بيها الفطره مو حلوه
نريد وياها حيدر غيره لا منريد
فطره بلايه حيدر كلشي ما تسوه
................
عظم الله لكم الاجر
للشاعر عمر العزاوي
رد مع اقتباس
