ضحكت وشافوها طلاب القسم .. علي المياحي
ضحكت وشافوها طلاب القسم
وانا اباوع والعشگ شابع شتم
ضحكت وكالت تعال
انته اعز كل الرجال
انته مو طالب غريب
انه اكثر من حبيب
بس تصير القسمه اصير ام الجهال
شاورتهه وبيه حب يكتل كتل
انتي احلة ابنيه وانه اجمل رجل
نذر انذر يم علي
والله لو زفوج الي
بسم ابو الحسنين ...اسمي اول طفل
خابرتني اتكول
ابويه انطاني الشخص ثاني
واستلم نيشاني
بيدي حطو حلقتي
حبل صار بركبتي
شلون يشتم عطري واحد ثاني
انخطبت الجانت تريد اتشوفني
ليش خطبوها وتريد اتعوفني
اهواي بيني وبينهه
حضرة جنت ابعينهه
تجي يوميه بعشگهه اطوفني
كالت
بعشگي انا وياك ماقبلو هلي
الشيخ كاعد منتظر كلمه بلي
گبالي انته اتخليت
كمت ابجي وافقت
و ردت اكلهم نعم
كتلهم علي
اجه يركض شاف زفتهه وسمع هلهوله
والشماته اتنادسو كلوله
الجانت تحبه امس
هسه بثياب العرس
تضحك بزفتهه ما معقوله
فتح باب العريس وكال
ليش يا ادم خذت تفاحتي
وانه ما ماخذ عشگ مو مالتي
اول مرة ادعي
كون ماتوصل هلك
وحواء ماتصبح الك
والشمس تستيقظ بجربايتي
حجته والدمعه بين عيونهه
علي .. انه مو اول مرة يغصبونهه
روح يا ابن الحلال
راحت ايام الدلال
الورده غيرك راح يشمونهه
ف كالها
روحي الله وياج بس منفوسه
رايحه وروحج عشگ متروسه
حتى لو غيري خذج
وحتى لو ماصرت الج
راح تذكريني باول بوسه
راحت وحسراتهه بوسط الگلب
الزفه مو مالت عرف مالت غرب
بيد واحد مو عرف
صعبه يرتاح الزلف
الورده والله تموت من تنشم غصب
والمهم .. وصلت البيت عيالهه
مو رجلهه وياها جن جتالهه
الطيره راحت تنحبس
بالهه مو بل عرس
يم حبيب الروح صاير بالهه
المهم نامت الوادم و نوم العافيه
الف هنايل العيون الغافيه
العنده حب يكتل كتل
ليش يتحول طفل
ماينام الى بسؤالف دافيه
راحت ايام ..راحت اشهر ..راحت اسنين
وعبرت المسالة
وحده تشبهه شفته بكربله
يجوز هي يجوز لا
يجوز هي بكربله
بلكي مو هي
شفتهه ابمهذله
شلون اعرفها ؟؟؟
شويه صاحتله علي ..علي
و عبالي الي
طلع عدهم ولد و مسمي علي
الما يحصل عل النصيب
يسمي ابنه على الحبيب
باوعتلي و كلشي فز ابداخلي
(اذا قبلتي ف قولي وكلتك نفسي)
شيخنه باطل زواجي من الغريب
انه مغصوبه على واحد مو حلال
ال تخلف من شخص غير الحبيب
لا تحبه ولا تحب طاري الجهال
انه احب انسان تارس روحي شوگ
روحي تركضله قبل كلمه تعال
نصيحه من الشاعر :
اليخطب ابنيه خل يكولها :
بنت الحلال
كولي هم عندج عشك وسط الگلب
خاف اهلج غاصبينج ع الزواج
الورده والله تموت من تنشم غصب
التحب انسان ..وتصير الغريب
الله مايرضه ومحمد تنخطب
لحبي اله كتبته رغم طويله
لكن فد شي
رووعه كلام تستاهل
رد مع اقتباس
